ព័ត៌មានអន្តរជាតិ

ក្រុមជំនាញស៊ើបអង្កេតប្រភពដើមជំងឺកូវីដដឹកនាំដោយ WHO នឹងទៅទីតាំងណាខ្លះក្នុងទីក្រុងអ៊ូហាន?

ក្រុមអ្នកជំនាញដឹកនាំដោយអង្គការសុខភាពពិភពលោក (WHO) ស៊ើបអង្កេតប្រភពដើមនៃជំងឺរាតត្បាតកូវីដ ១៩ បានចាប់ផ្តើមជួបជាមួយក្រុមអ្នកវិទ្យាសាស្ត្រចិននៅថ្ងៃសុក្រនេះ ហើយ WHO បាននិយាយថា ក្រុមនេះគ្រោងនឹងចុះពិនិត្យមន្ទីរពិសោធន៍ ផ្សារ និងមន្ទីរពេទ្យនៅទីក្រុងអ៊ូហាន ។

កាលពីថ្ងៃព្រហស្បតិ៍ក្រុមនេះបានបញ្ចប់ការធ្វើចត្តាឡីស័ករយៈពេល ២ សប្តាហ៍ បន្ទាប់ពីការមកដល់របស់ខ្លួននៅក្នុងប្រទេសចិន បានធ្វើដំណើរទៅសណ្ឋាគារមួយនៅកណ្តាលប្រទេសចិនជាកន្លែងដែលវីរុសដ៏សាហាវនេះបានផ្ទុះឡើងកាលពីចុងឆ្នាំ ២០១៩ ។

ក្រុមនេះត្រូវបានគេរំពឹងថានឹងចំណាយពេល ២ សប្តាហ៍ទៀតនៅក្នុងប្រទេសចិន ហើយនឹងទៅមើលទីផ្សារអាហារសមុទ្រជាចំណុចកណ្តាលនៃការផ្ទុះឡើងដំបូងនៃវីរុសកូរ៉ូណា ។ ពួកគេក៏នឹងធ្វើទស្សនកិច្ចនៅវិទ្យាស្ថានវីរុសក្រុងអ៊ូហាន ផងដែរ ។ សម្មតិកម្មមួយដែលត្រូវបានច្រានចោលដោយប្រទេសចិនគឺថាការផ្ទុះឡើងនេះបណ្តាលមកពីការលេចធ្លាយនៅមន្ទីរពិសោធន៍រដ្ឋាភិបាល ។
បេសកកម្មនេះត្រូវបានញាំញីដោយការពន្យាពេល ការព្រួយបារម្ភអំពីការចូលប្រទេសចិន និងការឈ្លោះប្រកែកគ្នារវាងចិន និងសហរដ្ឋអាមេរិកដែលបានចោទប្រកាន់ប្រទេសចិនថាបានលាក់បាំងវិសាលភាពនៃការផ្ទុះដំបូង និងបានរិះគន់លក្ខខណ្ឌនៃដំណើរទស្សនកិច្ចនេះ ខណៈដែលអ្នកជំនាញចិនកំពុងធ្វើការស្រាវជ្រាវនូវដំណាក់កាលដំបូង ។

ក្រុមស៊ើបអង្កេតរបស់ WHO គ្រោងនឹងទៅដល់ទីក្រុង អ៊ូហាន កាលពីដើមខែមករា ហើយការពន្យាពេលនៃដំណើរទស្សនកិច្ចរបស់ប្រទេសចិនបានទាក់ទាញការរិះគន់ជាសាធារណៈដ៏កម្រពីប្រមុខ WHO ដែលអតីតប្រធានាធិបតីអាមេរិកលោក ដូណាល់ ត្រាំ បានចោទប្រកាន់ថាជាអាយ៉ងប្រទេសចិន ។

ប្រទេសចិនបានជំរុញគំនិតដែលថាវីរុសនេះមាននៅបរទេសមុនពេលវាត្រូវបានគេរកឃើញនៅទីក្រុងអ៊ូហាន ដោយសារព័ត៌មានរដ្ឋបានដកស្រង់វត្តមានរបស់វីរុសលើការវេចខ្ចប់អាហារក្លាស្សេដែលបាននាំចូល និងឯកសារវិទ្យាសាស្ត្រនិយាយថាវាបាននិងកំពុងសាយភាយនៅអឺរ៉ុបក្នុងឆ្នាំ ២០១៩ ៕

rsn

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *