(កំពង់ចាម) រដ្ឋមន្ត្រីក្រសួងកសិកម្មរុរុក្ខាប្រមាញ់ និងនេសាទ ឯកឧត្តម វេង សាខុន និងលោកជំទាវ ព្រមទាំងសហការី នាព្រឹកថ្ងៃទី៥ ខែឧសភា ឆ្នាំ២០២១ បានននាំយកអំណោយដ៏ថ្លៃថ្លាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ប្រគល់ជូន ឯកឧត្តម អ៊ុន ចាន់ដា អភិបាល នៃគណៈខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ សម្រាប់យកទៅប្រេីប្រាស់ក្នុងយុទ្ធនាការប្រយុទ្ធ ប្រឆាំង និងទប់ស្កាត់ការឆ្លងរីករាលដាលនៃជំងឺកូវីដ-១៩ ក្នុងខេត្តកំពង់ចាម។
ក្នុងនាមជាប្រធានគណកម្មការខេត្តប្រយុទ្ធប្រឆាំងនឹងជំងឺកូវីដ-១៩ ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណយ៉ាងជ្រាលជ្រៅ ចំពោះសប្បុរសជន ជាពិសេសសម្តេចតេជោ ហ៊ុន សែន ដែលបានផ្តល់ជាអំណោយ សម្រាប់ឧបត្ថម្ភជូនរដ្ឋបាលខេត្ត ដែលកំពុងត្រូវការជាចាំបាច់ក្នុងដំណាក់កាលបិទខ្ទប់ភូមិ និងការធ្វេីចត្តាឡីស័ក ជាពិសេសការផ្គត់ផ្គង់ដល់ប្រជាពលរដ្ឋដែលប្រឈមនឹងការខូចខាត និងពលករចំណូលស្រុក ដែលកំពុងធ្វើចត្តាឡីស័ក ក្នុងភូមិសាស្ត្រខេត្តកំពង់ចាម ។
ជាមួយគ្នានោះឯកឧត្តមអភិបាលខេត្ត ក៏បានជូនពរ និងសង្ឃឹមជឿជាក់ថា បងប្អូនសប្បុរសជន ឬម្ចាស់ក្រុមហ៊ុននានា នឹងបន្តជួយឧបត្ថម្ភគាំទ្រដល់រដ្ឋបាលខេត្ត ក្នុងការចូលរួមប្រយុទ្ធប្រឆាំងនឹងជំងឺឆ្លងកូវីដ-១៩ ជាបន្តផងដែរ ។
សូមជម្រាបថា អំណោយដែលត្រូវបានប្រគល់ជូននាពេលនោះរួមមាន÷ អង្ករចំនួន ៥០តោន មី ២ពាន់កេស ត្រីខ ២ពាន់យួរ និងម៉ាសចំនួន ៥ម៉ឺនម៉ាស៕ ចៅ វង្ស i.k.