(កំពង់ចាម) នៅក្នុងកិច្ចប្រជុំក្រុមប្រឹក្សាខេត្តកំពង់ចាម លើកទី២៧ អាណត្តិទី៣ នាព្រឹកថ្ងៃទី១០ ខែសីហា ឆ្នាំ២០២១ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានថ្លែងថា រដ្ឋបាលខេត្តបានត្រៀមរួចជាស្រេចនូវទីតាំងថ្មី ចំនួន ១០ កន្លែង សម្រាប់ទទួលពលករ ពលការិនី មកធ្វើចត្តាឡីស័ក នៅពេលបើកព្រំដែនកម្ពុជា-ថៃ ឡើងវិញនៅថ្ងៃទី១២ សីហា ឆ្នាំ២០២១ ហើយអាជ្ញាធរនឹងប្រគល់សាលារៀនជូនសិស្សានុសិស្សវិញដើម្បីបើកបវេសនកាល នាពេលខាងមុខ ។
ឯកឧត្តមអភិបាលខេត្ត បានបន្តថា ឥឡូវយើងបានចាត់វិធានការដាក់ឱ្យអ្នកធ្វើចត្តាឡីស័ក ដែលពាក់ព័ន្ធនឹង ព្រឹត្តិការណ៍ សហគមន៍ ២០-កុម្ភៈ ឱ្យធ្វើចត្តាឡីស័កនៅតាមផ្ទះរៀងៗខ្លួនហើយ គឺដើម្បីជៀសវាងការរស់នៅ ការសម្រាកព្យាបាល នៅលាយឡំជាមួយអ្នកពាក់ព័ន្ធនឹងមេរោគកូវីដ-១៩ បំប្លែងខ្លួនថ្មី «ដែលតា» (DELTA) ។
ឯកឧត្តម អ៊ុន ចាន់ដា ថ្លែងបន្តថា មកពេលនេះរដ្ឋបាលខេត្តបានត្រៀមឃ្លាំងរបស់មន្ទីរពពាណិជ្ជកម្មដែលទំនេរ ចំនួន០៣ កន្លែង ដើម្បីយកទីតាំងនោះមកជំនួសឲ្យសាលារៀន ដែលយើងបានយកមកធ្វើជាកន្លែងចត្តាឡីស័ក និងកន្លែងព្យាបាលកម្រិតស្រាល នាកន្លងមក ហើយយើងនឹងធ្វើការប្រគល់សាលារៀនទាំងអស់នោះឱ្យទៅមន្ទីរអប់រំយុវជន និងកីឡា ផ្តល់ឱ្យសិស្សានុសិស្សបានចចូលរៀនសូត្រឡើងវិញ។
ឯកឧត្តមអភិបាលខេត្ត បន្តថា យើងសម្រេចយកឃ្លាំង ពាណិជ្ជកម្មមួយកន្លែង នៅក្នុងស្រុកកំពង់សៀម សម្រាប់ជំនួសឱ្យវិទ្យាល័យព្រះសីហនុ គឺផ្ទេរការព្យាបាលជំងឺកូវីដ-១៩ កម្រិតស្រាល និងអ្នកជំងឺទាំងអស់ ទៅកាន់ទីនោះវិញ។ ដោយឡែកឃ្លាំងពានិជ្ជកម្មនៅជាប់មន្ទីរពាណិជ្ជកម្ម ខេត្តកំពង់ចាម និងឃ្លាំងពាណិជ្ជកម្មមួយទៀត ស្ថិតនៅក្បែរសាលាស្រុកកងមាស សម្រាបជាកន្លែងទទួលពលករ -ពលការិនី មកធ្វើចត្តាឡីស័ក៕ (ចៅ វង្ស i.k.)