ព័ត៌មានជាតិ

ឯកឧត្តម អ៊ុន ចាន់ដា ដឹកមន្ដ្រីជំនាញ អញ្ជើញចុះពិនិត្យការងារបង្កបង្កើនផលស្រូវ របស់ប្រជាពលរដ្ធ នៅស្រុកកងមាស

(កំពង់ចាម) ÷នាព្រឹកថ្ងៃទី០៨ ខែវិច្ឆិកា ឆ្នាំ២០២០ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំមន្ត្រីជំនាញនៃមន្ទីរអង្គភាពពាក់ព័ន្ធ រួមជាមួយអាជ្ញាធរមូលដ្ឋាន បានអញ្ជើញចុះពិនិត្យការងារបង្កបង្កើនផលរបស់ប្រជាពលរដ្ឋនិងចុះពិនិត្យទីតាំងបូមទឹក ពីប្រភពតំបន់បឹងបេ ៦ មកស្តុកទុកនៅក្នុងអាងបឹងកក់ ដើម្បីទុកទឹកសម្រាប់ប្រជាពលរដ្ឋបង្កបង្កើនផលនៅចុងរដូវ ស្ថិត​ស្ថិតនៅក្នុងភូមិកងតាណឹងទី៨ ​ឃុំ​កងតាណឹង​ ស្រុកកងមាស។

គួរបញ្ជាក់ថា៖ ក្នុងឆ្នាំ២០២០ កម្ពស់ទឹកបានត្រឹមតែ ១២,៤៧ម៉ែត្រ អាចនាំប្រភពទឹកចូលតាមព្រែក បឹងបួរ តាមដងទន្លេមេគង្គ បានមួយចំនួន និងមួយចំនួនទៀត ទឹកទន្លេចូលមិនដល់ ដែលអាចប្រឈមនឹងការខ្វះទឹកនៅចុងដៃ ពិសេសក្នុងស្រុកកងមាស កម្ពស់ទឹកទន្លេទាប ទឹកទន្លេចូលមិនដល់តំបន់អាងទឹកបឹងកក់នេះ។ ដោយមើលឃើញពីបញ្ហានេះ ទើបឯកឧត្តម អ៊ុន ចាន់ដា អភិបាលខេត្ត បានចាត់ឲ្យមន្ទីរធនធានទឹក និងឧតុនិយមខេត្ត ប្រើប្រាស់ម៉ាស៊ីនបូមទឹក ចំនួន ២គ្រឿង ចុះអន្តរាគមន៍បូមទឹក ពីប្រភពតំបន់បឹងបេ៦ នៅជាប់នឹងតំបន់អាងទឹកបឹងកក់ ដើម្បីយកមកស្តុកទុកនៅក្នុងអាង សម្រាប់ទុកប្រើប្រាស់ក្នុងការងារបង្កបង្កើនផលស្រែប្រាំង របស់កសិករប្រមាណ ៣៥០ហិចតា នៅឃុំកងតាណឹង ស្រុកកងមាស។

ឯកឧត្តម អភិបាលខេត្ត បានឧបត្ថម្ភប្រេងម៉ាស៊ូត ចំនួន២០០០លីត្រ រួមជាមួយមន្ទីរធនធានទឹក និងឧតុនិយមខេត្ត និងក្រុមការងាររាជរដ្ឋាភិបាលចុះមូលដ្ឋានឃុំកងតាណឹង ស្រុកកងមាស សរុបចំនួន ៤.១២០លីត្រ៕

rsn

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *