(ខេត្តព្រៃវែង) នៅថ្ងៃទី២៧ ខែសីហា ឆ្នាំ២០២១នេះឯកឧត្តម ជា សុមេធី អភិបាលនៃគណ:អភិបាលនៃគណ:អភិបាលខេត្តព្រៃវែង និងលោកជំទាវ ព្រមទាំងក្រុមគ្រួសារ បានចូលរួមដង្ហែសព មហាឧបាសិកា សុ គម ( ភរិយា ឯកឧត្តម ជា សុទ្ធ ) ដែលត្រូវជាម្តាយបង្កើតរបស់លោក ចាន់ វ៉ាន់ធឿន និងលោកជំទាវ ព្រមទាំងបុត្រ លោកចាន់ វន្ថា និងភរិយា ព្រមទាំងបុត្រ លោកស្រី ចាន់ សុខា និងស្វាមី ព្រមទាំងបុត្រ និងឯកឧត្តម ចាន់ សុខុម និងលោកជំទាវ ព្រមទាំងបុត្រ ដែលបានទទួលមរណភាព នៅថ្ងៃពុធ ២រោច ខែស្រាពណ៌ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៥ ខែសីហា ឆ្នាំ២០២១ ដោយជរាពាធ ក្នុងជន្មាយុ៧៦ឆ្នាំ។
ក្នុងឱកាសប្រកបដោយក្តីខ្សឹកខ្សួលរំជួលចិត្ត ក្រៀមក្រំឥតឧបមា ឯកឧត្តម ជា សុមេធី និងលោកជំទាវ ព្រមទាំងក្រុមគ្រួសារ សូមសម្តែងនូវសមានទុក្ខប្រកបដោយអនិច្ចលក្ខណធម៌ដ៏មហាជ្រាលជ្រៅ ព្រមទាំងក្តីសង្វេគដ៏មហាធំធេង និងពោរពេញដោយក្តីសោកស្តាយស្រណោះ អាឡោះអាល័យជាអនេកប្បការចំពោះការបាត់បង់ មហាឧបាសិកា សុ គម ដែលនេះជាការបាត់បង់អ្នកម្តាយបង្កើត អ្នកម្តាយក្មេក ជីដូន ជីទួត ប្រកបដោយព្រហ្មវិហារធម៌ ដែលបានលាចាកលោក លាចាកពីក្រុមគ្រួសារ និងជាការបាត់បង់ព្រឹទ្ធាចារ្យដ៏ឆ្នើមមួយរូប ក្នុងការលើកស្ទួយតម្លៃព្រះពុទ្ធសាសនា ដោយសទ្ធាជ្រះថ្លាបរិសុទ្ធ ព្រមទាំងលាចាកពីយើងខ្ញុំទាំងអស់គ្នា។
