(កំពង់ចាម) :សមាគមអ្នកនិពន្ធខ្មែរ នៅព្រឹកថ្ងៃទី ១៥ ខែធ្នូ ឆ្នាំ ២០២១នេះ បានប្រារព្ធពិធី ប្រគល់ពានរង្វាន់ជ័យលាភី អក្សរសិល្ប៍ទន្លេមេគង្គ លើកទី១១ ដល់បេក្ខនារីពីររូប ធ្វើឡើងនៅមន្ទីរសុខាភិបាលនៃរដ្ឋបាលខេត្តកំពង់ចាម ក្រោមអធិបតីភាព ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ។
លោក ព្រឿង ប្រណិត ប្រធានសមាគមអ្នកនិពន្ធខ្មែរ បានថ្លែងថា យើងគ្រប់គ្នាបានជ្រាបច្បាស់ហើយថា ការបង្កើតស្នាដៃអក្សរសិល្ប៍មួយ ប្រកបដោយការច្នៃប្រឌិត គឺទាមទារឱ្យអ្នកសរសេរមានកម្រិតយល់ដឹងមូលដ្ឋានយ៉ាងច្បាស់លាស់ ការយល់ច្បាស់អំពីបរិបទសង្គមមួយលើគ្រប់ផ្នែក ពិសេស វប្បធម៌ អរិយធម៌ និងជីវភាពពិតរបស់មនុស្សក្នុងតំបន់ទើបស្នាដៃមានភាពប្រាកដនិយម។
ម្យ៉ាងទៀត យើងតែងតែទទួលស្គាល់ថា អក្សរសិល្ប៍ដែលមាននិរន្តរភាព និងតម្លៃ គឺជាប្រភេទស្នាដៃ ដែលបានបង្ហាញ និងប្រៀបធៀបតិចឬច្រើននូវព្រឹត្តិការសង្គម ជីវិតពិតក្នុងសង្គមនោះ។ ការជួបជុំថ្ងៃនេះដែរ ក៏ជានិមិត្តរូបការបន្តពូនជ្រុំរឹតបន្ដឹងចំណងមិត្តភាព បន្តចែករំលែកបទពិសោធ ចំណេះដឹងថ្មីៗ និងកាន់តែយល់ចិត្តអ្នកនិពន្ធ ដែលរស់នៅតាមបណ្តោយទន្លេមេគង្គ ស្ថិតក្នុងប្រធានបទ “ជីវិត និងនិន្តរភាពទន្លេមេគង្គ។ ពិតជាមានសារៈសំខាន់ណាស់ចំពោះប្រជាជាតិរស់តាមដងទន្លេមេគង្គ ។
ឯកឧត្តម អ៊ុន ចាន់ដា អភិបាលខេត្ត បានមានប្រសាសន៍ផងដែរថា ពានរង្វាន់អក្សរសិល្ប៍ទន្លេមេគង្គ លើកទី១១ នេះ ពិតជាមានសារៈសំខាន់ណាស់ ដោយសារការប្រឡង គឺធ្វើឡើងជាអន្តរជាតិ នៃអ្នកនិពន្ធជាច្រើន នៃបណ្ដាប្រទេស ជាប់ដងទន្លេមេគង្គ។ ក្នុងនោះបេក្ខនារី ដែលទទួលបានជ័យលាភីមានពីររូប ទី១ ៖ ឈ្មោះ ឡុង លាភសុជាតា រស់នៅខេត្តកំពង់ចាម និងទី២ ៖ ឈ្មោះ លឹម ផាន់ណា មកពីភ្នំពេញ ។
ឯកឧត្តមអភិបាលខេត្ត បានបញ្ជាក់ថា ការរៀបចំ ឲ្យមានការប្រឡងអក្សរសិល្ប៍ទន្លេមេគង្គនេះ គឺពិតជាមានអត្ថន័យសំខាន់ណាស់ ពោល មិនត្រឹមតែការប្រគល់ពានរង្វាន់លើកទឹកចិត្តដល់បុគ្គល ឬ បញ្ញវន្ត នៃបណ្ដាប្រទេស រស់នៅជាប់ដងទន្លេមេគង្គនោះទេ សំខាន់បំផុតគឺការរឹតចំណងសាមគ្គីភាព កិច្ចសហប្រតិបត្តិការល្អ តាមបណ្ដាប្រទេស ដែលជាប់ដងទន្លេមេគង្គ។ ដូច្នេះត្រូវជំរុញ យន្តការនេះ ឱ្យមានភាពស្អិតរមួត តាមរយៈការបង្កើតឱ្យមានស្នាដៃប្រកួតប្រជែងអក្សរសិល្ប៍ របស់ប្រទេសនីមួយៗ ។ ម្យ៉ាងទៀតទាក់ទងទៅនឹងការចែករំលែកបទពិសោធន៍ ដល់អ្នកនិពន្ធទាំងឡាយដែលស្ថិតនៅក្នុងប្រទេសជាប់ទន្លេមេគង្គផងដែរ ៕សហការី
