(ភ្នំពេញ) ៖ក្នុងឱកាសអញ្ជើញសម្ពោធដាក់ឲ្យដំណើរការធនាគារវីង សាខាសែនសុខ និងវិមានឯករាជ្យ នៅព្រឹកថ្ងៃទី១៤ ខែមីនា ឆ្នាំ២០២២នេះ ឯកឧត្តមបណ្ដិត ហ៊ុន ម៉ាណែត បានលើកឡើងថា កំណើនគ្រឹះស្ថានធនាគារ និងហិរញ្ញវត្ថុនៅកម្ពុជា ក្នុងរយៈពេល២០ឆ្នាំចុងក្រោយនេះ ជាការចូលរួមចំណែកយ៉ាងសំខាន់ ក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជា។
ឯកឧត្តមបណ្ដិត ហ៊ុន ម៉ាណែត បានបញ្ជាក់ថា បរិយាប័ន្នហិរញ្ញវត្ថុត្រូវបានទទួលស្គាល់ថា បានដើរតួនាទីយ៉ាងសំខាន់ ក្នុងការរួមចំណែកផ្តល់លទ្ធភាពដល់ប្រជាជន ក៏ដូចជាសហគ្រាសធុនតូច និងមធ្យមឲ្យទទួលបានសេវាហិរញ្ញវត្ថុលឿនរហ័ស ងាយស្រួល និងមានតម្លៃសមរម្យ ជាការធានាបាននូវការពង្រីកសក្តានុពលសកម្មភាពសេដ្ឋកិច្ចលើគ្រប់វិស័យ និងការកាត់បន្ថយភាពក្រីក្រនៅក្នុងសង្គម។
ព្រមពេលជាមួយគ្នានេះ ឯកឧត្តមបណ្ដិត ហ៊ុន ម៉ាណែត បានសម្តែងនូវការអបអរសាទរចំពោះជោគជ័យ និងសមិទ្ធផលទាំងឡាយ ដែលក្រុមហ៊ុននឹងខិតខំសម្រេចបានក្នុងរយៈពេល ១៣ឆ្នាំ កន្លងមកនេះ ដែលជាដំណើរជោគជ័យគួរជាទីមោទនៈ មួយទៀតរបស់ក្រុមហ៊ុនក្នុងស្រុក។
ឯកឧត្តមបណ្ដិតបន្ដទៀតថា ការពង្រីកខ្លួនបន្ថែមទៅជាធនាគារពាណិជ្ជ និងការដាក់ឲ្យដំណើរការសាខាចំនួនពីរ ដែលត្រូវបានប្រកាសជាផ្លូវការក្នុងថ្ងៃនេះ ក៏បានឆ្លុះបញ្ចាំងឱ្យឃើញផងដែរអំពីស្ថិរភាព, ភាពធន់ និងសក្តានុពលទីផ្សារ នៃវិស័យហិរញ្ញវត្ថុនៅកម្ពុជា ជាពិសេសក្នុងបរិការណ៍នៃការរាតត្បាតសាកលនៃជំងឺកូវីដ-១៩ ដែលបានបង្កផលប៉ះពាល់ដល់ស្ថានភាពសេដ្ឋកិច្ច-សង្គមទាំងក្នុងកម្រិតសាកល, តំបន់ និងជាតិនីមួយៗ។
ជាមួយគ្នានេះ លោក រ័ត្ន សុវណ្ណនរៈ អគ្គនាយកត្រួតពិនិត្យ នៃធនាគារជាតិនៃកម្ពុជា បានលើកឡើងថា ការពង្រីកបណ្តាញប្រតិបត្តិការរបស់ធនាគារវីង (ខេមបូឌា) ម.ក តាមរយៈការបើកដំណើរការសាខាសែនសុខ និងសាខាវិមានឯករាជ្យនាពេលនេះ គឺជាសក្ខីភាពមួយបង្ហាញអំពីការរីកចម្រើនរបស់វិស័យធនាគារនៅកម្ពុជា ព្រមទាំងជំនឿទុកចិត្តរបស់វិនិយោគិនទាំងបរទេស និងក្នុងស្រុកចំពោះវិស័យនេះ បើទោះបីជាស្ថិតក្នុងបរិបទនៃជំងឺកូដ-១៩ ក៏ដោយ។
ឯកឧត្តមបណ្ដិត ហ៊ុន ម៉ាណែត បានអះអាងទៀតថា ទន្ទឹមនេះនិន្នាការធនាគារវីង (ខេមបូឌា) ម.ក ក៏បាន និងកំពុងរួមចំណែកយ៉ាងសំខាន់ដល់ការលើកកម្ពស់បរិយាប័ន្នហិរញ្ញវត្ថុ តាមរយៈការផ្តល់សេវាហិរញ្ញវត្ថុប្រកបដោយការទទួលខុសត្រូវ វិជ្ជាជីវៈ និងប្រសិទ្ធភាព ជូនប្រជាពលរដ្ឋកម្ពុជា។
សូមជម្រាបថា ធនាគារវីង នឹងប្រើប្រាស់បច្ចេកវិទ្យាទំនើបដែលផ្តល់ដោយដៃគូលំដាប់ពិភពលោក ដើម្បីកាត់បន្ថយការ ចំណាយលើប្រតិបត្តិការធនាគារ និងកាត់បន្ថយពេលវេលាសម្រាប់ដំណើរការផ្តល់ឥណទាន។
ធនាគារវីង នឹងមាន ផលិតផលសន្សំប្រកបដោយភាពច្នៃប្រឌិត និងមានភាពទាក់ទាញដែលមិនត្រឹមតែផ្តល់ឲ្យប្រជាជនកម្ពុជាគ្រប់រូប នូវសមត្ថភាពក្នុងការរៀបចំផែនការសម្រាប់តម្រូវការហិរញ្ញវត្ថុរបស់ពួកគេប៉ុណ្ណោះទេ ប៉ុន្តែថែមទាំងជួយពួកគេឲ្យបង្កើតនូវទំនុកចិត្តឥណទានតាមរយៈប្រតិបត្តិការដែលពួកគេធ្វើដោយប្រើប្រាស់ប្រព័ន្ធអេកូរបស់ធនាគារវីង។ ពួក
គេប្រើប្រាស់សេវាធនាគារវីងកាន់តែច្រើន ពួកគេកាន់តែអាចទទួលបានពិន្ទុឥណទានដើម្បីមានសិទ្ធិទទួលបានកម្ចីរហ័សពីធនាគារវីង។ ធនាគារវីង ប្រើប្រាស់បច្ចេកវិទ្យា AI និង Machine Learning ទំនើបៗសម្រាប់ការអនុម័តឥណទានប្រកបដោយប្រសិទ្ធភាព និងប្រសិទ្ធផល។ ការអនុម័តឥណទាននៅលើកម្មវិធីវឹងចឹងអេប ចំណាយពេលតិចជាង៥នាទី។
អ្នកឧកញ៉ា គិត ម៉េង បានលើកឡើងថា «យើងបានដាក់អាទិភាពខ្ពស់លើការដោះស្រាយបញ្ហា ប្រឈមរបស់សហគមន៍ និងបានរៀបចំផលិតផលជាច្រើនដើម្បីធ្វើឲ្យប្រសើរឡើងនូវជីវភាពរស់នៅប្រចាំថ្ងៃរបស់ប្រជាជនកម្ពុជា ដោយផ្តល់ភាពងាយស្រួលដល់ពួកគេក្នុងការទទួលសេវាហិរញ្ញវត្ថុដែលចាំបាច់ ទោះបីជាពួកគេរស់នៅក្នុងភូមិដាច់ស្រយាលក៏ដោយ។ ក្នុងនាមជាក្រុមហ៊ុនក្នុងស្រុកដែលមានទស្សនវិស័យសកល យើងត្រៀមខ្លួនជាស្រេច ដើម្បីលើកកម្ពស់កំណើនសេដ្ឋកិច្ច និងការកែលម្អលក្ខខណ្ឌសុខុមាលភាពសង្គមរបស់សហគមន៍ក្នុងពេលជំងឺរាតត្បាតបានបញ្ចប់»៕
