ខេត្តបន្ទាយមានជ័យ៖ ហេតុការណ៍ណគ្រោះថ្នាក់ចរាចរណ៍ផ្លូវដែកនេះបានកើតឡើងកាលពីវេលាម៉ោង២១និង០០នាទីថ្ងៃទី១៦ ខែមិថុនា ឆ្នាំ២០២២ ត្រង់ចំណុចខាងលិច ផ្សារអូរស្ងួត ស្ថិតនៅភូមិអូរស្ងួត ឃុំអូរប្រាសាទ ស្រុកមង្គលបូរី។
អ្នកបើកបររថយន្តមានឈ្មោះ ពាន់ ពៅ ភេទប្រុស អាយុ២១ឆ្នាំ រស់នៅភូមិលៀប ឃុំពាក់ស្នែង ស្រុកអង្គរធំ ខេត្តសៀមរាប។
នគរបាលចរាចរណ៍ស្រុកមង្គលបូរីបានប្រាប់អោយដឹងថា៖ នៅពេលគ្រោះថ្នាក់ចរាចរណ៍កើតឡើងគឺរថភ្លើងដែលមានលេខពីមុខ៦៦៥៧បានបើកបរពីខេត្តបាត់ដំបងមកខេត្តបន្ទាយមានជ័យ នៅពេលយប់ដល់ចំណុចផ្លូវបំបែក ពីផ្លូវជាតិលេខ៥ នៅភូមិស្ងួតស្រុកមង្គលបូរី ឆ្ពោះទៅស្រុកបវេលខេត្តបាត់ដំបងបានបុកចំពាក់កណ្តាលរថយន្តធុនធំប្រភេទផ្លូវ៥ពាក់ស្លាកលេខភ្នំពេញ3D.5575ដែលដឹកដំឡូងមីស្ងួតពេញបុកហើយរុញ ជិត៤០ម៉ែត្រ ក្រឡាប់ នៅខាងកើតផ្លូវដែកតែសំណាងគ្មានរងបួស។ គ្រោះថ្នាក់ចរាចរណ៍នេះ បណ្តាលឲ្យខូចខាតរថយន្តធុនធំប្រភេទផ្លូវប្រាំកំពិតចំពាក់កណ្តាល និងដំឡូងមីស្ងួតជាង២០តោនត្រូវបានក្រឡាប់ចាក់ចោលចំណែក រថភ្លើងកំពិតមុខផ្នែកខាងស្តាំ។
ម្ចាស់រថយន្តបានប្រាប់ថា៖ មុនពេលគ្រោះថ្នាក់ចរាចរណ៍កើតឡើងគាត់បានដឹកដំឡូងមីស្ងួតទំងន់ជាង២០តោនពីខេត្តឧត្តរមានជ័យ គោលដៅដឹកទៅព្រំដែនក្នុងស្រុកសំពៅលូន ខេត្តបាត់ដំបង ដល់ចំណុចកើតហេតុ បានបើកឆ្លងកាត់ផ្លូវដែក ត្រូវរថភ្លើងបុកហើយរុញប្រមាណ៤០ម៉ែត្របណ្តាលក្រឡាប់តែម្តង។
ប្រជាពលរដ្ឋនៅក្បែរផ្លូវដែកបានប្រាប់ថា៖ មួយរយៈនេះមិនដែលឃើញរថភ្លើងចរាចរណ៍ទៅមកទេហើយកាលពីមុននៅពេលរថភ្លើងឆ្លងកាត់ឃើញមានអ្នកមកចាំធ្វើចរាចរណ៍ហើយបើកស៊ីភ្លេខ្លាំងៗ២ទៅ៣ដង តែពេលនេះរថភ្លើងបើកពេលយប់ហើយគ្មានអ្នកមកធ្វើចរាចរណ៍ ទើបបណ្តាលឲ្យបុករថយន្តក្រឡាប់តែម្ដង៕សហការី
