ខេត្តសៀមរាប ៖ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នៅថ្ងៃព្រហស្បតិ៍ ទី១៦ ខែមិថុនា ឆ្នាំ២០២២នេះ បានចេញសេចក្តីជូនដំណឹង ស្វែងរក ជនខិលខូចមិនស្គាល់អត្តសញ្ញាណ ដែលបានចូលលួចកាប់ឈើគ្រញូង ចំនួន០៤ដើម នៅចម្ការពូជឈើគ្រញូងក្នុងខេត្តសៀមរាប ។
មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានអោយដឹងថា នាពេលថ្មីៗកន្លងមកនេះ មានជនខិលខូចមិនស្គាល់អត្តសញ្ញាណចូលលួចកាប់ដើមឈើគ្រញូង ចំនួនបួនដើម ដែលពូជប្រភេទគ្រញូងនេះ មានអាយុកាលប្រមាណ៥០ឆ្នាំមកហើយ ដែលជាបទល្មើសឧក្រិដ្ឋ បង្កការបាត់បង់ទ្រព្យសម្បត្តិសាធារណៈ របស់រដ្ឋដ៏មានតម្លៃ នៅក្នុងចម្ការពូជឈើគ្រញូង ដែលមានទំហំ ១,៨៨០ ហិកតា ស្ថិតនៅភូមិសាស្ត្រ ឃុំកន្ទួត ស្រុកស្វាយលើ និងឃុំឃុនរាម ស្រុកបន្ទាយស្រី ខេត្តសៀមរាប ត្រូវបានគ្រប់គ្រង និងអភិវឌ្ឍតាំងពីឆ្នាំ២០០១ ក្នុងគោលបំណងថែរក្សាជីវចម្រុះ អភិរក្សធនធាន សេនេទិចព្រៃឈើ តំបន់លំហែកំសាន្ដ និងសម្រាប់ស្រាវជ្រាវវិទ្យាសាស្ត្រ ។
តំបន់ខាងលើនេះ មានសក្តានុពលធនធានព្រៃឈើដ៏មានតម្លៃ ក្រសួងកសិកម្ម រុក្ខាប្រមាញ់ និងនេសាទ បានចេញប្រកាសលេខ៦០២ ប្រក.កសក ទទួលស្គាល់ជាតំបន់ស្តារ និងអភិវឌ្ឍន៍ព្រៃឈើ ចុះថ្ងៃទី២៣ ខែកញ្ញា ឆ្នាំ២០១៦ ។
មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប សូមអំពាវនាវដ៏ទទូចចំពោះសាធារណជន ដែលបានស្គាល់ ដឹងដំណឹងពាក់ព័ន្ធ និងជនល្មើស ហើយបានរាយការណ៍ និងផ្ដល់ព័ត៌មានដល់សមត្ថកិច្ច រហូតឈានទៅចាប់ជនល្មើសបាន មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នឹងជូនរង្វាន់ជាប្រាក់ ចំនួន ១,០០០ដុល្លារ (មួយពាន់ដុល្លារអាមេរិច) ហើយព័ត៌មានត្រូវបានរក្សាជាការសម្ងាត់ជូនមិនអោយមានបញ្ហាដល់អ្នកផ្ដល់ព័ត៌មានឡើយ ។
សូមទំនាក់ទំនងផ្តល់ព័ត៌មានមកលេខទូរសព្ទរបស់លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប មានដូចខាងក្រោម ៖