ខេត្តប៉ៃលិន ៖ បុរសម្នាក់ត្រូវបានកម្លាំងនគរបាលចុះទៅចាប់ឃាត់ខ្លួនភ្លាមៗ ក្រោយពីទទួលបានពាក្យបណ្តឹងពីម្តាយក្មេងស្រីរងគ្រោះ ដោយចោទប្រកាន់ថា បានចាប់កូនស្រីរបស់ខ្លួនរំលោ.ភសេពសន្ថវ: ខណៈពេលដែលគាត់ជាប់រវល់ជូនកូនស្រីម្នាក់ទៀតទៅសម្រាលកូននៅមន្ទីរពេទ្យបង្អែកខេត្តប៉ៃលិន ហើយបានផ្ញើកូនស្រីឱ្យមើល ព្រោះទុកចិត្តក្នុងនាមជាអ្នកជិតខាង ដូចយកសាច់ទៅផ្ញើនឹងសត្វខ្លា។
ហេតុការណ៍ខាងលើនេះ បានកើតឡើងកាលពីវេលាម៉ោង១១និង៣០នាទីព្រឹក ថ្ងៃទី០២ ខែកក្កដា ឆ្នាំ២០២២ កម្លាំងប៉ុស្តិ៍នគរបាលរដ្ឋបាលស្ទឹងកាច់ បានទទួលពាក្យបណ្ដឹង០១ករណី (ករណីរំលោ.ភសេពសន្ថវៈលើអនីតិជនក្រោមអាយុ១៤ឆ្នាំ) ដែលបានកើតឡើងនៅចំណុច ស្រុកសាលាក្រៅ ខេត្តប៉ៃលិន។
បើប្រភពព័ត៌មានបានឱ្យដឹងថា ៖ ក្រោយពីទទួលពាក្យបណ្តឹងពីស្ត្រីម្នាក់អាយុ៥៥ឆ្នាំ រស់នៅ ស្រុកសាលាក្រៅ ខេត្តប៉ៃលិន មុខរបរកម្មករ (ត្រូវជាម្ដាយក្មេងស្រីរងគ្រោះ) ដែលក្មេងស្រីរងគ្រោះអាយុ១៣ឆ្នាំ។ ចំណែកជនសង្ស័យវិញមានឈ្មោះ ផន រាត្រី ភេទប្រុស អាយុ២៦ឆ្នាំ រស់នៅភូមិស្រង់មានជ័យ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មុខរបរកសិករ។
ប្រភពដដែលបន្តទៀតថា ក្រោយពីទទួលបណ្តឹងភ្លាមៗ កម្លាំងព្រហ្មទណ្ឌនៃអធិការដ្ឋានស្រុកសាលាក្រៅ បានសហការជាមួយកម្លាំងប៉ុស្តិ៍ស្ទឹងកាច់ ចុះទៅធ្វើការឃាត់ខ្លួនជនសង្ស័យបានភ្លាមៗ នៅចំណុចផ្ទះជនសង្ស័យតែម្តង។
ក្រោយពីសាកសួររួចមក ជនសង្ស័យបានសារភាពថា «រូបគេពិតជាបានរំលោ.ភសេពសន្ថវ:ទៅលើក្មេងស្រីរងគ្រោះពិតប្រាកដមែន»។
ប្រភពដដែលបញ្ជាក់ថា មុនពេលកើតហេតុ ដោយសារឪពុកម្ដាយជនរងគ្រោះជាប់រវល់យកកូនស្រីម្នាក់ទៀតទៅឆ្លងទន្លេ (សម្រាលកូន) នៅមន្ទីរពេទ្យបង្អែកខេត្ត ហើយក៏បានផ្ញើជនរងគ្រោះនៅផ្ទះជនសង្ស័យ ទើបបណ្ដាលឲ្យមានករណីរំលោ.ភតែម្ដង។
ពាក់ព័ន្ធនឹងបញ្ហាខាងលើនេះ បច្ចុប្បន្ន ជនសង្ស័យ ត្រូវបាននគរបាលឃាត់ខ្លួនបណ្តោះអាសន្ននៅអធិការដ្ឋានស្រុកសាលាក្រៅ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕សហការី