(កណ្ដាល) ÷ព្រឹកថ្ងៃសុក្រ ១១រោច ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១១ ខែធ្នូ ឆ្នាំ២០២០ ឯកឧត្តម គង់ សោភណ្ឌ័ អភិបាលនៃគណៈអភិបាលខេត្តកណ្តាល បានដឹកនាំកិច្ចប្រជុំគណៈអភិបាលខេត្តប្រចាំខែវិច្ឆិកា ដេីម្បីត្រួតពិនិត្យលទ្ធផលការងារដែលបានអនុវត្តកន្លងមក ពិភាក្សា ដោះស្រាយបញ្ហាប្រឈមនានា និងលើកទិសដៅការងារសម្រាប់អនុវត្តបន្ត។
កិច្ចប្រជុំសម្រាប់ខែនេះ សមាសភាពត្រូវបានកាត់បន្ថយ ដើម្បីរក្សាគម្លាតសុវត្ថិភាពបុគ្គល ពាក់ម៉ាស់ ឆ្លងកាត់ម៉ាស៊ីនសម្លាប់មេរោគ វាស់កម្តៅ និងលាងដៃដោយអាល់កុល ឬជែល តាមការណែនាំរបស់ក្រសួងសុខាភិបាលត្រូវបានអនុវត្តយ៉ាងម៉ឺងម៉ាត់បំផុត ដើម្បីចូលរួមបង្ការ ទប់ស្កាត់ការឆ្លងរីករាលដាលនៃជំងឺកូវីដ-១៩ ៕
