ភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ឲ្យដឹងថា បច្ចុប្បន្ននេះមានយានយន្ត១៧១ពាន់គ្រឿងមិនទាន់ឆៀក ខណៈប័ណ្ណបើកបរ២៩១ពាន់ប័ណ្ឌបានហួសសុពលភាព ដូច្នេះសូមអំពាវនាវឲ្យម្ចាស់យានយន្តក៏ដូចជា ម្ចាស់កាន់ប័ណ្ណបើកបរអញ្ជើញបន្តសុពលភាព និងយកយានយន្តទៅឆៀក។
ថ្លែងក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេសយានយន្ត(ឆៀក) ផ្សារដីហុយ នាព្រឹកថ្ងៃទី២០ ធ្នូ ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអំពាវនាវដល់ប្រជាពលរដ្ឋដែលមានយានយន្តហើយមិនទាន់ឆៀកត្រូវយកមកឆៀកឲ្យទាន់ពេលវេលា។
ឯកឧត្តមបានបញ្ជាក់ថា៖«ខ្ញុំសូមជម្រាបថា ឥលូវនេះខ្ញុំមានឡាន១លានគ្រឿងដែលក្នុងនោះមាន១៧១ពាន់គ្រឿងមិនបានមកឆៀកទាន់ពេលវេលា(ផុតសុពលភាព)។ចំពោះប័ណ្ណបើកបរវិញ បច្ចុប្បន្នមានប័ណ្ណបើកបរចំនួន១លាន៨សែនប័ណ្ណ ប៉ុន្តែបើកបរហួសសុពលភាពមាន២៩១ពាន់ប័ណ្ណ ដូច្នេះខ្ញុំសូមយកឱកាសនេះអំពាវនាវដល់អ្នកកាន់ប័ណ្ណបើកបរហួសសុពលភាពមកបន្តរបស់ខ្លួន ដើម្បីគោរពច្បាប់ទាំងអស់គ្នា»។
ឯកឧត្តមទេសរដ្ឋមន្ត្រីបានលើកឡើងទៀតថា ក្នុងមួយឆ្នាំរាជរដ្ឋាភិបាលបានខាតបង់ថវិកាអស់ជាង៤៥០លានដុល្លារដោយសារគ្រោះថ្នាក់ចរាចរណ៍។ដូច្នេះយើងត្រូវរួមគ្នាកាត់បន្ថយគ្រោះថ្នាក់ចរាចរណ៍នេះ។
ក្នុងឱកាសនោះដែរ ឯកឧត្តមថា ពីដើមឡើងប្រជាជនកម្ពុជាភាពច្រើនបានបាត់បង់អាយុជីវិតដោយសារគ្រា.ប់បែកដែលបន្សល់ពីសម័យសង្គ្រាម និងបន្ទាប់មកដោយសារជំងឺអេដស៍ និងបន្ទាប់មក គឺគ្រោះថ្នាក់ចរាចរណ៍។ ប៉ុន្តែបច្ចុប្បន្ននេះគ្រោះថ្នាក់ដោយសារគ្រា.ប់មីនបានថយ ដោយសារជំងឺអេដស៍ក៏ថយ ប៉ុន្តែការគ្រោះថ្នាក់ដោយសារចរាចរណ៍មានការកើនឡើង។
ឯកឧត្តមស៊ុន ចាន់ថុល ក៏បានលើកឡើងថា ក្នុងមួយឆ្នាំៗក្រសួងបានទទួលថវិកាពីសេវាសាធារណៈ គឺប្រមាណ២លានដុល្លារសហរដ្ឋអាមេរិក និងទទួលបានថវិកាពីការដាក់ដំណើរការតាមប្រព័ន្ធអនឡាញក្នុងមួយឆ្នាំៗទទួលបាន៤០លានដុល្លារសហរដ្ឋអាមេរិក។
ការដាក់ប្រព័ន្ធឆៀកតាមប្រព័ន្ធអនឡាញនេះក៏មានភាពងាយស្រួល ក្នុងការប្រមូលថវិកាចូលរជាតិផងដែរ។ទាក់ទិននឹងការយានយន្តដែលហួសសុពលភាពនៃការធ្វើឆៀកនឹងត្រូវផាកពិន័យ គឺក្នុងមួយថ្ងៃផាកពិន័យប្រាក់៥០០រៀល ដែលថវិកាផាកពិន័យនេះចូលក្នុងថវិកាជាតិ៕សហការី
