(ភ្នំពេញ)៖ ក្រសួងសុខាភិបាល កម្ពុជា នៅថ្ងៃទី១៩ ខែធ្នូ ឆ្នាំ២០២០នេះ បានចេញសេចក្តីប្រកាស ស្តីពី កែសម្រួលការអនុវត្តវិធានការសុខាភិបាល និងការធ្វើចត្តាឡីស័ក សម្រាប់អ្នកការទូត និងមន្រ្តីអង្គការអន្តរជាតិទាំងអស់ ដែលកាន់ទិដ្ឋាការការទូត (Visa A)។
តាមក្រសួងសុខាភិបាល ការចេញសេចក្តីស្តីពី កែសម្រួលខាងលើ បានធ្វើឡើង យោងតាមចំណារយល់ព្រមដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី ចុះថ្ងៃទី ១៨ ខែធ្នូ ឆ្នាំ២០២០។។
ក្នុងសេចក្តីប្រកាសនោះ បានបញ្ជាក់ថា គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ -១៩ តម្រូវឲ្យ អ្នកការទូត និងមន្ត្រីអង្គការអន្តរជាតិដែលកាន់ទិដ្ឋាការការទូត (Visa A) ត្រូវ៖
១. មានវិញ្ញាបនបត្របញ្ជាក់សុខភាព (Health Cartifica) ចេញដោយអាជ្ញាធរសុខាភិបាល ទទួលស្គាល់ដោយប្រទេសសាមី ដោយបញ្ជាក់ថាគ្មានកូវីដ-១៩ ដែលមានសុពលភាពរយៈពេល ៧២ ម៉ោងមុនពេលចេញដំណើរ។ នៅពេលមកដល់កម្ពុជា អ្នកទាំងនោះត្រូវឆ្លងកាត់ការយកសំណាក ទៅធ្វើតេស្តដោយក្រុមគ្រូពេទ្យវិជ្ជាជីវៈកម្ពុជា។
២. ស្ថានតំណាងបរទេស និងក្រុមការងារអង្គការសហប្រជាជាតិនៅកម្ពុជា ត្រូវធានាលើការត្រួតពិនិត្យ ឲ្យបានហ្មត់ចត់ក្នុងការអនុវត្តរបស់ អ្នកទទួលបានទិដ្ឋាការការទូតកម្ពុជា (Visa A) ការធ្វើចត្តាឡីស័ក ១៤ ថ្ងៃពេញលេញ។ ក្នុងករណីមានអ្នកដំណើរណាម្នាក់ ដែលធ្វើតេស្តវិជ្ជមានវីរុសកូវីដ -១៩ ក្រសួងសុខាភិបាល នឹងបញ្ជូនអ្នកវិជ្ជមានវីរុសកូវីដ-១៩ ទៅមន្ទីរពេទ្យតាមការកំណត់របស់ក្រសួងសុខាភិបាល។
៣. ធ្វើចត្តាឡីស័ក ១៤ ថ្ងៃពេញលេញ នៅនិវេសនដ្ឋានរបស់ស្ថានទូត ឬគេហដ្ឋានដាច់ដោយឡែក។ ក្នុងករណ៏អ្នកការទូត ដែលមិនស្នាក់នៅក្នុងនិវេសនដ្ឋានរបស់ស្ថានទូត ឬគេហដ្ឋានដាច់ដោយឡែក ត្រូវធ្វើចត្តាឡីស័ក ១៤ ថ្ងៃពេញលេញនៅសណ្ឋាគារ Himawan និងស្ថិតនៅក្រោមការត្រួតពិនិត្យរបស់ស្ថានទូតអង្គការអន្តរជាតិសាមី និងមន្ត្រីសុខាភិបាល ដោយរាល់ការចំណាយទាំងអស់ជាបន្ទុករបស់សាមីខ្លួនផ្ទាល់។
៤. ក្នុងអំឡុងពេលធ្វើចត្តាឡីស័ករយៈពេល ១៤ ថ្ងៃពេញលេញ មិនអនុញ្ញាត ឲ្យជួបភ្ញៀវឡើយ និង៥.ការធ្វើដំណើរពីព្រលានយន្តហោះ ទៅនិវេសនដ្ឋានរបស់ស្ថានទូត ឬគេហដ្ឋានដាច់ដោយឡែក ត្រូវប្រើប្រាស់តែមធ្យោបាយដឹកជញ្ជូនរបស់ស្ថានទូត ឬអង្គការអន្តរជាតិប៉ុណ្ណោះ៕
