(កំពង់ចាម) ៖នៅព្រឹកថ្ងៃទី៧ ខែកុម្ភៈ ឆ្នាំ២០២៣ ឯកឧត្ដម អ៊ុន ចាន់ដា អភិបាលខេត្តកំពង់ចាម និងជាប្រធានគណៈបញ្ជាការឯកភាពខេត្តកំពង់ចាម បានអញ្ជើញ ជួបសំណេះសំណាល និងបំពាក់ឯកសណ្ឋានដល់ប្រជាការពារភូមិទាំង៣២ ចំណុះសង្កាត់ទាំង៤ ក្នុងក្រុងកំពង់ចាម ដែលធ្វើឡើងនៅសាលាខេត្ត។
ក្នុងឪកាសនោះ ឯកឧត្តម អភិបាលខេត្ត បានថ្លែងថា ប្រជាការពារត្រូវរាយការណ៍ទៅសមត្ថកិច្ច ក៏ដូចជាមន្រ្តីនគរបាលយុត្តិធម៌ ដើម្បីសហការបង្ក្រាបបទល្មើសដែលអាចកេីតមានឡើងនៅក្នុងមូលដ្ឋានរបស់ខ្លួន ដើម្បីការពារសន្តិសុខ សណ្ដាប់ធ្នាប់ សុវត្ថិភាព ជូនបងប្អូនប្រជាពលរដ្ឋ ការថ្លែងបែបនេះនាព្រឹកថ្ងៃទី៧ ខែកុម្ភៈ ឆ្នាំ២០២៣ ។
ក្នុងឱកាសនោះដែរ ឯកឧត្ដមអភិបាលខេត្ត បានសម្ដែងនូវការកោតសរសើរ និងវាយតម្លៃខ្ពស់ ចំពោះបងប្អូនជាប្រជាការពារទាំងអស់ ដែលបានលះបង់នូវពេលវេលា កម្លាំងកាយ ចិត្ត និងប្រាជ្ញាស្មារតី ចូលរួមសហការជាមួយអាជ្ញាធរដែនដី ធ្វើឲ្យភូមិឃុំរបស់យើងមានសន្តិសុខ សណ្តាប់ធ្នាប់ល្អ ជាភូមិ ឃុំ ប្រកបដោយសុវត្ថិភាព ពិសេសគឺចូលរួមការពារសមិទ្ធផលនានា ដែលជាសម្បត្តិរួមរបស់យើង ឲ្យបានគង់វង់យូរអង្វែង ក្រោយម្លប់ដំបូលសន្ដិភាព ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា បានធ្វើឱ្យប្រទេសមានសុខសន្តិភាព និងបានដាក់ចេញនូវវិធានការជាច្រើនក្នុងន័យពង្រឹង និងធ្វើឲ្យប្រសើរឡើង ដូចជា៖ គោលនយោបាយភូមិ ឃុំ មានសុវត្ថិភាព និងគោលនយោបាយគាំពារសង្គមផ្សេងៗ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ ជាពិសេសប្រជាការពារ គឺជាកម្លាំងដ៏សំខាន់បំផុត ដើម្បីរក្សាសុវត្ថិភាព សន្តិសុខជូនប្រជាពលរដ្ឋ នៅក្នុងភូមិ ឃុំរបស់យើង ហើយកម្លាំងទាំងនេះ ក៏ជាសេនាធិការ របស់ប៉ុស្តិ៍រដ្ឋបាលនគរបាលឃុំ ដើម្បីចូលរួមទប់ស្កាត់ នូវរាល់បទល្មើសដែលកើតមានឡើងនៅក្នុងមូលដ្ឋាន។
គួរបញ្ជាក់ថា ក្នុងពិធីសំណេះសំណាលនេះដែរ ឯកឧត្ដមអ៊ុន ចាន់ដា បានថ្លែងអំណរគុណដល់សប្បុរសជនទាំងអស់ ដែលបានចូលរួមគាំទ្រឧបត្ថម្ភ ជូនបងប្អូនប្រជាការពារ ហើយឯកឧត្ដមអភិបាលខេត្ត ក៏បានផ្ដល់ជូនកម្លាំងប្រជាការពារ ចំនួន៣០៦នាក់ ក្នុងម្នាក់ៗ ទទួលបានឯកសណ្ឋានប្រជាការពារ ២កំប្លេ ថវិកា ៥ម៉ឺនរៀល និងសម្ភារៈមួយចំនួនផងដែរ ៕
