(សៀមរាប) ៖នៅព្រឹកថ្ងៃអង្គារ ៩ កើត ខែផល្គុន ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៨ ខែកុម្ភៈ ឆ្នាំ២០២៣ លោក ប្រាក់ សោភ័ណ អភិបាលរងខេត្ត និងជាអនុប្រធានគណៈកម្មការវាយតម្លៃកម្រិតកែប្រែខ្លួនរបស់ទណ្ឌិតសម្រាប់បន្ធូរបន្ថយទោស និងលើកលែងទោសតំណាងឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំត្រួតពិនិត្យវាយតម្លៃកម្រិតកែប្រែខ្លួនរបស់ទណ្ឌិត ដែលត្រូវដាក់ស្នើសុំបន្ធូរបន្ថយទោស និងលើកលែងទោសក្នុងឱកាសពិធីបុណ្យចូលឆ្នាំខ្មែរ និងពិធីបុណ្យពិសាខបូជា ឆ្នាំ២០២៣ ដែលរៀបចំនៅបន្ទប់ប្រជុំអង្គភាពពន្ធនាគារខេត្តសៀមរាប ។
បន្ទាប់ពីអង្គប្រជុំពិនិត្យ ពិភាក្សា និងបូកសរុបកិច្ចប្រជុំរួចមក លោក អភិបាលរងខេត្តបានដឹកនាំគណៈកម្មការវាយតម្លៃកម្រិតកែប្រែខ្លួនរបស់ទណ្ឌិតសម្រាប់បន្ធូរបន្ថយទោសចុះបេីកប្រអប់សំបុត្រសិទ្ធិរបស់ជនជាប់ឃុំនៅក្នុងពន្ធាគាររបស់គណៈកម្មាធិការជាតិប្រឆាំងទារុណកម្ម និងចុះពិនិត្យមេីលស្ថានភាពជាក់ស្តែងរបស់ជនជាប់ឃុំ៕
