(បាត់ដំបង) ៖ ក្រោយពីមន្ត្រីជំនាញសួរដេញដោលជីកប្ញស ជីកគល់ដល់ម្ចាស់ផ្ទះអំពីរឿងចោរគាស់ផ្ទះចូលលួចប្រាក់និងគ្រឿងអល័ង្ការ ស្រាប់តែចម្លើយចុងក្រោយរបស់ម្ចាស់ផ្ទះបានសារភាពថា «មិនមានចោរគាស់ផ្ទះចូលលួចលុយនិងគ្រឿងអល័ង្ការអីទេ គឺខ្ញុំបានប្រព្រឹក្តខ្លួនឯងយកទ្រព្យសម្បត្តិទាំងនោះទៅលេងល្បែងចាញ់អស់ ហើយខ្ញុំបំប៉ោងរឿងបែបនេះ ដើម្បីកុំឲ្យក្រុមគ្រួសារស្ដីបន្ទោស»។ នេះបើតាមមន្ត្រីជំនាញបានបញ្ជាក់ កាលពីថ្ងៃទី២៩ មីនា នៅពេលចុះទៅសួរនាំម្ចាស់ផ្ទះឡើងវិញ ក្រោយពីមានមន្ទិលសង្ស័យ ។
ម្ចាស់ផ្ទះឈ្មោះ តឿន សាវ័ន្ទ ភេទប្រុស អាយុ៥០ឆ្នាំ មានមុខរបរលក់ត្រី រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ។ ដំបូងឡើយ អ្នកលក់ត្រីរូបនេះបានប្ដឹងទៅសមត្ថកិច្ចដោយអះអាងថា ខ្លួនជាជនរងគ្រោះត្រូវចោរគាស់ផ្ទះចូលលួចប្រាក់ និងគ្រឿងអល័ង្ការអស់គ្មានសល់ ក្រោយពេលខ្លួននិងប្រពន្ធងើបពីយប់ដឹកត្រីយកទៅលក់នៅផ្សារ ។ ប៉ុន្តែតាមការពិតខ្លួនឯង លួចទ្រព្យខ្លួនឯងយកទៅលេងល្បែងចាញ់សោះ ហើយប្រឹងបំប៉ោងហេតុការណ៍ក្នុងចេតនាកុំឲ្យក្រុមគ្រួសារជេរប្រទិច ។
លោកវ៉ាន់ តារា នាយរងការិយាល័យព្រហ្មទណ្ឌកំរិតធ្ងន់បានប្រាប់ថា លោកបានចុះទៅជួបសួរនាំផ្ទាល់ជាមួយម្ចាស់ផ្ទះឈ្មោះតឿន សាវ័ន្ត នេះ ក្រោយពីមានភាពមិនប្រក្រតីជាច្រើនជុំវិញករណីចោរគាស់ផ្ទះលួចទ្រព្យសម្បត្តិអ្នកលក់ត្រីខាងលើនេះ ។ លោកបានប្រាប់ថា មានហេតុផលជាច្រើន ដែលគួរឲ្យយើងមានមន្ទិលសង្ស័យ ទើបលោកស្នងការបញ្ជាឲ្យលោកចុះទៅសួរនាំម្ចាស់ផ្ទះនេះឡើងវិញ ។
ក្រោយពីលើកហេតុផលមិនប្រក្រតីជាច្រើនសួរនាំដេញដោលជាន់កែង ទើបម្ចាស់ផ្ទះកំហូចនេះទាល់ច្រកក៏ឆ្លើយសារភាពថា «ពុំមានចោរគាស់ផ្ទះគាស់ចូលលួចមាស ឬលុយ ក្នុងផ្ទះគាត់ទេ គឺជារឿងផ្ទៃក្នុង ក្នុងគ្រួសារគាត់តែប៉ុណ្ណោះ ទើបគាត់បំប៉ោងរឿងទម្លាក់កំហុសទៅលើចោរបែបនេះ» ហើយចុងក្រោយម្ចាស់ផ្ទះរូបនេះ បានសុំអង្វរសមត្ថកិច្ចដកពាក្យបណ្ដឹងវិញ ។
សូមបញ្ជាក់ថា ករណីអ្នកលក់ត្រីបំប៉ោងរឿងចោរគាស់ផ្ទះចូលលួចទ្រព្យសម្បត្តិខាងលើនេះ ត្រូវគេអះអាងថា បានកើតឡើងនៅវេលាម៉ោង៤ទៀបភ្លឺថ្ងៃទី២៦ មីនា នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ក្រោយពេលម្ចាស់ផ្ទះពីរនាក់ប្ដីប្រពន្ធនេះ ងើបពីយប់ដឹកត្រីយកទៅលក់នៅឯផ្សារ ។ នៅថ្ងៃកើតហេតុដំបូង អ្នកលក់ត្រីរូបនេះមិនបានប្ដឹងទៅសមត្ថកិច្ចទេ រហូតដល់រឿងនេះបែកធ្លាយដល់សមត្ថកិច្ច នៅព្រឹកថ្ងៃទី២៧ មីនា ទើបជននេះបង្ខំចិត្តទៅដាក់ពាក្យបណ្ដឹងនៅអធិការស្រុកឯកភ្នំ ។
នៅក្នុងរបាយការណ៍សមត្ថកិច្ច ទ្រព្យសម្បត្តិដែលលោកចោរផ្ទៃក្នុងលួចនោះរួមមានខ្សែកមាស០២ខ្សែទម្ងន់១,៦ដំឡឹង, ខ្សែដៃមាស០២ខ្សែទម្ងន់១,៣តំឡឹង, ចិញ្ចៀនមាស០២វង់ទម្ងន់០៤ជី, ក្រវិលមាស០២ទម្ងន់០២ជី និង ប្រាក់ខ្មែរចំនួន៩លានរៀល ។ នៅក្នុងរបាយការណ៍ដដែលបានបញ្ជាក់ដែរថា ខាងលើនេះគឺជាទ្រព្យសម្បត្តិដែលបាត់បង់ តែនៅមានទ្រព្យមួយចំនួនទៀត ដែលអ្នកលក់ត្រីវរូបនេះបានប្រាប់ថា នៅ «សេសសល់ពីចោរលួច» ក្នុងនោះមាន ខ្សែដៃប្លាទីន០១ខ្សែ, ក្រវិលប្លាទីន០១គូ, ប្រាក់ខ្មែរចំនួន០២លានរៀល, ប្រាក់ដុល្លាចំនួន១២០ដុល្លា, ប្រាក់ថៃចំនួន២៧០បាត និង ទូរស័ព្ទចំនួន០១គ្រឿង ។
លោក វ៉ាន់ តារា ដែលសួរជីកឬស ជីកគល់ តាមជាន់កែងម្ចាស់ផ្ទះកំហូចនេះផ្ទាល់បាននិយាយថា ចំណុចដែលមិនប្រក្រតី គឺត្រង់រឿងគ្រឿងអល័ង្ករ និងប្រាក់មួយចំនួនដែលនៅសេសសល់ពីចោរលួចនេះឯង ។ លោកបានចោទជាសំណួរទៅកាន់ម្ចាស់ផ្ទះថា គ្រឿងអល័ង្ការ លុយកាក់ និងទូរស័ព្ទដែលសេសសល់ទុកនៅជាមួយគ្នា និងគ្រឿងអល័ង្ការ និងលុយមួយចំនួន ដែលត្រូវចោរលួចយកទៅ ចុះហេតុអ្វីបានជាចោរមិនលួចយកទាំងអស់ ? តើហេតុអ្វីបានជាចោរលួចតែគ្រឿងមាសដែលមានតម្លៃ រីឯគ្រឿងប្លាទីននិងប្រាក់មួយចំនួនចោរមិនលួច ?
ត្រង់ចំណុចនេះហើយ ដែលធ្វើឲ្យម្ចាស់ផ្ទះរូបនេះទាល់តម្រិះក៏ព្រមឆ្លើយសារភាពថា «មិនមានចោរចូលលួចទេ គឺ ជារឿងផ្ទៃក្នុង ក្នុងគ្រួសារគាត់ ហើយគាត់សុំដកពាក្យបណ្ដឹងវិញ»។ ជុំវិញករណីនេះ លោក ឡុង យោធាវីរៈ អធិការស្រុកឯកភ្នំ បានថ្លែងប្រាប់ដែរថា ករណីចោរគាស់ផ្ទះអ្នកលក់ត្រីខាងលើនេះ តាមពិតពុំមានកើតឡើងដូចម្ចាស់ផ្ទះបានប្ដឹងនោះទេ ក្រោយពីការស៊ើបអង្កេត គឺម្ចាស់ផ្ទះបំប៉ោងសភាពការណ៍ ។
លោកថា ម្ចាស់ផ្ទះបានប្រឹងបំប៉ោងរឿងនេះ ដោយទម្លាក់កំហុសទៅលើចោរ លុះសួរនាំដេញដោល ទើបម្ចាស់ផ្ទះរូបនេះសារភាពថា ខ្លួនបានយកគ្រឿងអល័ង្កានិងលុយចំនួន៩លានរៀល ទៅលេងល្បែងចាញ់អស់ ទើបបំប៉ោងចោទប្រកាន់ថា «ចោរគាស់ផ្ទះគាត់ចូលលួចទ្រព្យសម្បត្តិគាត់» ។
លោកអធិការបានបញ្ជាក់ថា ជាមួយនឹងការសារភាពទទូលកំហុស ជនបំប៉ោងសភាពការណ៍ម្នាក់នេះ ក៏បានអង្វរសុំដកពាក្យបណ្ដឹងវិញដែរ ហើយពេលនេះយើងបានបញ្ចប់សំណុំរឿងនេះហើយ ត្រឹមម្ចាស់ផ្ទះសារភាពថា «ខ្លួនជាអ្នកលួចទ្រព្យខ្លួនឯង យកទៅលេងល្បែងចាញ់អស់» ៕សហការី
