ចៅក្រមបើកការស៊ើបសួរជនជាតិចិន៥នាក់ ពាក់ព័ន្ធរឿងជម្រិតទារប្រាក់១លានដុល្លារ !!

(ភ្នំពេញ) ៖ កាលពីពេលថ្មីៗនេះ សមត្ថកិច្ចបានចាប់ខ្លួនជនជាតិចិន៥នាក់ពាក់ព័ន្ធករណីជនជាតិចិនចាប់ជនជាតិចិនដូចគ្នាជម្រិ.តទារប្រាក់ប្រមាណ១លានដុល្លារអាមេរិក មុនថ្ងៃចូលឆ្នាំប្រពៃណីខ្មែរ២ថ្ងៃ។។ ក្រោយការចាប់ខ្លួនជនជាតិចិនទាំង៥នាក់ត្រូវបានបញ្ជួនទៅសាលាដំបូងរាជធានីភ្នំពេញ។

លោក ម៉ុត ដារ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី១៧ ខែមេសា ឆ្នាំ២០២៣ បានបើកការស៊ើបសួរលើសំណុំរឿងព្រហ្មទណ្ឌឧក្រិដ្ឋមួយ ពាក់ព័ន្ធករណីជនជាតិចិនចាប់ជនជាតិចិនទាំង ៥ នាក់។

ជនសង្ស័យទាំង៥នាក់ខាងលើនេះ ត្រូវតំណាងអយ្យការបើកការស៊ើប២នាក់ នៅសល់៣នាក់ទៀត តែដោយសារផុតម៉ោងរដ្ឋបាល ក៏ផ្ញើទៅឱ្យសមត្ថកិច្ចវិញ និងតម្រូវឲ្យនាំមកសាកសួរបន្ត ដើម្បីចោទប្រកាន់ជាផ្លូវការ ដាក់ជូនទៅខាងចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន។

ជនសង្ស័យទាំង៥នាក់នោះរួមមាន ៖
១- ឈ្មោះ tian hengwei ភេទប្រុស អាយុ៣៨ឆ្នាំ,
២- ឈ្មោះ bai Fu jun ភេទប្រុស អាយុ៥១ឆ្នាំ,
៣- ឈ្មោះ miao qianlong ភេទប្រុស អាយុ៤១ឆ្នាំ,
៤- ឈ្មោះ xu panpan ភេទប្រុស អាយុ៣៨ឆ្នាំ
៥- ឈ្មោះ zhu xinyu ភេទប្រុស អាយុ៣៩ឆ្នាំ។

សូមជម្រាបថា មុនថ្ងៃចូលឆ្នាំប្រពៃណីខ្មែរ២ថ្ងៃ មានករណីចាប់បង្ខាំ.ងជនជាតិចិនម្នាក់ ដើម្បីជម្រិ.តទារប្រាក់ប្រមាណ១លានដុល្លារអាមេរិក នៅចំណុចចំណតរថយន្តនៃអគារស្នាក់នៅស្កាយវីឡា ដែលមានអាសយដ្ឋានអគារលេខ១៩២ ផ្លូវ១៦៣ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។ ហើយត្រូវកម្លាំងនគរបាលស្រាវជ្រាវបង្ក្រាបបានឧក្រិដ្ឋជនជនជាតិចិនដូចគ្នាចំនួន៧នាក់ នៅ២គោលដៅផ្សេងគ្នា ស្ថិតក្នុងខណ្ឌដង្កោ ខណៈក្រុមគ្រួសារជនរងគ្រោះ សូមស្នើឲ្យតុលាការផ្តន្ទាទោសជនសង្ស័យតាមច្បាប់។

យោងតាមរបាយការណ៍របស់សមត្ថកិច្ចឲ្យបណ្ដាញព័ត៌មាននៅព្រឹកថ្ងៃទី១៨ ខែមេសា ឆ្នាំ២០២៣ នេះ បានឲ្យដឹងថា ករណីចាប់បង្ខាំ.ង ដើម្បីជម្រិ.តទារប្រាក់១លានដុល្លាអាមេរិករនេះ បានកើតឡើងនៅម៉ោង២យប់រំលងអធ្រាត្រឈានចូលថ្ងៃទី១២ ខែមេសា ឆ្នាំ២០២៣។ ពេលនោះ ក្រុមជនសង្ស័យមានគ្នាចំនួន៣នាក់ បានប្រើប្រាស់រថយន្តម៉ាក Vellfire ពាក់ផ្លាកលេខភ្នំពេញ 2BQ-0560 (ផ្លាកលេខក្លែងក្លាយ) និងផ្លាកលេខ ភ្នំពេញ 2BT-1768 ប្រដាប់ដោយអាវុ.ធគ្រប់ដៃ។

បន្ទាប់ពីទទួលពាក្យបណ្ដឹងពីក្រុមគ្រួសារជនរងគ្រោះភ្លាម សមត្ថកិច្ចជំនាញរបស់នាយកដ្ឋានចា.រកម្ម និងនាយកដ្ឋានកណ្ដាលសន្តិសុខ នៃអគ្គស្នងការដ្ឋាននគរបាលជាតិ សហការជាមួយសមត្ថកិច្ចពាក់ព័ន្ធចុះប្រតិបត្តិការបង្ក្រាបករណីខាងលើនេះ នៅយប់ថ្ងៃទី១៣ ខែមេសា ឆ្នាំ២០២៣ ស្ថិតនៅចំណុច២គោលដៅផ្សេងពីគ្នា រួមមាន ៖ គោលដៅទី១- នៅក្នុងបុរីមួយកន្លែង នៅផ្លូវ៦០ម៉ែត្រ ស្ថិតក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ។ គោលដៅទី២- ក្នុងបុរីមួយកន្លែង នៅផ្លូវ៥០ម៉ែត្រ ផ្ទះលេខ១៨ ផ្លូវលេខM26 ស្ថិតក្នុងខណ្ឌដង្កោ រាជធានីភ្នំពេញ។

សមត្ថកិច្ចបញ្ជាក់ទៀតថា នៅក្នុងប្រតិបតិ្តការនេះ កម្លាំងជំនាញធ្វើការឃាត់ខ្លួនជនសង្ស័យចំនួន០៧នាក់ ព្រមទាំងដកហូតវត្ថុតាងរួមមាន ៖

គោលដៅទី១- រថយន្ដម៉ាក Alphard ពណ៌ស ផ្លាកលេខ ភ្នំពេញ2BZ-9995 ចំនួន១គ្រឿង, រថយន្ដម៉ាក Alphard ពណ៌ខ្មៅ ផ្លាកលេខ តាកែវ2D-8888 ចំនួន១គ្រឿង, ផ្លាកលេខរថយន្ដ (មុខក្រោយ)១គូ លេខ ភ្នំពេញ2BQ-0560, កាំភ្លើ.ងវែង១ដើម មានបង់២. កាំភ្លើ.ងខ្លី១ដើម មានបំពាក់ឧបករណ៍ខ្ទប់សំឡេង, បង់ចំនួន១, គ្រាប់កាំភ្លើ.ងវែងខ្លីមួយចំនួន, គ្រាប់បែក១ (ប្រគល់ជូន CMAC), កូនកាំបិ.ត២, ខ្នោះដៃ៣គូ, វិទ្យុទាក់ទងចំនួន៣គ្រឿង, ទូដែកចំនួន១, ទូរស័ព្ទដៃ២គ្រឿង, កាតសម្គាល់ខ្លួនចំនួន២, អាវការពារគ្រាប់ចំនួន១ និងឯកសារមួយចំនួនទៀត។

គោលដៅទី២- កាំភ្លើ.ងម៉ាក ZOTAKI M9 06-T. គ្រាប់កាំភ្លើ.ងចំនួន៦គ្រាប់, បង់ចំនួន១, ទូរស័ព្ទដៃ២គ្រឿង (ម៉ាក OPPO ១គ្រឿង, ម៉ាក XIAOMI ១គ្រឿង), កាបូបពណ៌ខ្មៅ ចំនួន១, មានកាតមួយចំនួន, លិខិតឆ្លងដែនចំនួន១ និងរថយន្តមួយគ្រឿងម៉ាក Vellfier ពណ៌ខ្មៅ ពាក់ផ្លាកលេខ ភ្នំពេញ 2BT-1768 មួយគ្រឿង។ ចំណែកជនរងគ្រោះដែលត្រូវបានរំដោះ និងមានសុវត្ថិភាព រីឯសុខភាពវិញមានលក្ខណៈទន់ខ្សោយ ដោយសារតែជនរងគ្រោះត្រូវក្រុមជនសង្ស័យធ្វើទារុ.ណកម្មយ៉ាងធ្ងន់ធ្ងរលើរាងកាយ។

ពាក់ព័ន្ធករណីខាងលើនេះ ជនរងគ្រោះ និងមហាជន បានស្នើសុំអនុវត្តតាមច្បាប់ឲ្យតឹងរឹងទៅលើក្រុមពួកជនសង្ស័យដែលជាពួកឧក្រិដ្ឋជន មានអង្គការចាត់តាំង និងចរិតប្រព្រឹត្តបទល្មើស(ធ្វើទារុ.ណកម្ម) ព្រមទាំងធ្វើឲ្យប៉ះពាល់ដល់សន្តិសុខសណ្ដាប់ធ្នាប់សង្គម ជាពិសេសប៉ះពាល់ដល់សន្តិសុខអ្នកវិនិយោគិនទាំងឡាយដែលមកបណ្ដាក់ទុននៅកម្ពុជា។

បន្ទាប់ពីសមត្ថកិច្ចធ្វើការឃាត់ខ្លួន និងដកហូតវត្ថុតាងមួយចំនួនរួមមាន ៖ ទូដែកម៉ាក GOLDEN MODEL GD-110 ពណ៌ទឹកប្រាក់ រកឃើញសម្ភារៈដូចជា កាំភ្លើ.ងម៉ាក 20RAKI M906-T ពណ៌ខ្មៅ លេខ 2204170 ចំនួន១, បង់កាំភ្លើ.ងចំនួន០១ និងគ្រាប់កាំភ្លើ.ងចំនួន៦ គ្រាប់។ កាំភ្លើ.ងម៉ាក Lock 30 ពណ៌ខ្មៅលេខ TWT886 ចំនួន០១, បង់កាំភ្លើ.ងចំនួន០១ និងគ្រាប់កាំភ្លើ.ងចំនួន១០គ្រាប់។ រួមទាំងលិខិតឆ្លងដែនជនជាតិចិនចំនួន៤នាក់មាន ៖ ១- ឈ្មោះ XU PAN PAN លេខ EJ2703940, ២- ឈ្មោះ TIAN HENG WEI លេខ EH1931219, ៣- ឈ្មោះ MIAO QIAN LONG លេខEJ6164745 និង៤- ឈ្មោះ ZHU XINYU លេខ EJ9709133 និងប្រាក់ចំនួន ១.០០០ ដុល្លារអាមេរិកគត់ទៀតផង។ ជនសង្ស័យ រួមនឹងវត្ថុតាង ត្រូវបានសមត្ថកិច្ចកសាងសំណុំរឿង បញ្ជូនបន្តទៅសាលាដំបូងរាជធានីភ្នំពេញ ចាត់ការតាមនីតិវិធី។

សូមជម្រាបទៀតថា ប្រតិបត្តការនោះ ដំបូងសមត្ថកិច្ចបានធ្វើការឃាត់ខ្លួនជនសង្ស័យចំនួន៧ នាក់ ប៉ុន្តែនៅពេលនាំទៅសាកសួរ គឺមនុស្ស២នាក់មិនពាក់ព័ន្ធបទល្មើសនោះទេ ទើបអនុញ្ញាតឲ្យទៅផ្ទះវិញ ដូច្នោះជនដែលពាក់ព័ន្ធមានតែ៥នាក់ប៉ុណ្ណោះ និងបានបញ្ជូនទៅកាន់តុលាការ៕សហការី