(កំពង់ចាម) ÷នាព្រឹកថ្ងៃទី២៩ ខែធ្នូ ឆ្នាំ២០២០ រដ្ឋបាលខេត្តកំពង់ចាម បានរៀបចំ ពិធីប្រគល់រថយន្តដឹកសម្រាមចំនួន ០២គ្រឿង អំណោយរបស់ ឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន បានផ្ដល់ជូនរដ្ឋបាលស្រុកជើងព្រៃ និងរដ្ឋបាលស្រុកបាធាយ ក្រោមអធិបតីភាព ឯកឧត្ដម ចាយ សាមិត្ត រដ្ឋលេខាធិការក្រសួងបរិស្ថាន និងឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ដោយមានការអញ្ជើញចូលរួមពី ឯកឧត្ដម លោកជំទាវអភិបាលរងខេត្ត មន្ទីរ អង្គភាពពាក់ព័ន្ធ លោកអភិបាលស្រុកទាំងពីរ និងមន្ត្រីពាក់ព័ន្ធផងដែរ។
ឯកឧត្ដម អ៊ុន ចាន់ដា អភិបាលខេត្ត បានថ្លែងអំណរគុណ ចំពោះ ឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន ដែលបានផ្ដល់ជូននូវមធ្យោបាយធ្វើការងារ ដល់រដ្ឋបាលស្រុកទាំង២ ដើម្បីជាមូលដ្ឋាន នៃការចូលរួមជាមួយប្រជាពលរដ្ឋ ក្នុងការប្រមូលសម្រាម ក៏ដូចជា ការថែរក្សាសោភ័ណ្ឌភាព សណ្ដាប់ធ្នាប់ នៅក្នុងមូលដ្ឋាននីមួយៗ កាន់តែល្អប្រសើរផងដែរ។ ឯកឧត្ដមអភិបាលខេត្ត មានប្រសាសន៍ថា ក្នុងបរិបទ នៃជម្ងឺកូវីដ-១៩ បានផ្ដោតជាសំខាន់ លើការលើកកម្ពស់ ក្នុងការពង្រឹងវិធានការអនាម័យ ដែលជាវិធានការ នៃការទប់ស្កាត់ការឆ្លងរីករាលដាល នៃជម្ងឺកូវីដ-១៩ នៅក្នុងសហគមន៍ ហើយការពង្រឹងនូវអនាម័យនេះ ក៏ជាផ្នែកមួយ ក្នុងគោលនយោបាយបរិស្ថាន ផងដែរ។ ឯកឧត្ដម ចាត់ទុកថា ការផ្ដល់ជូនរថយន្ត ជាពេលនេះ គឺជាការចូលរួមចំណែក យ៉ាងសំខាន់បំផុត សម្រាប់ការគាំទ្រនូវមធ្យោបាយធ្វើការងារ ដល់រដ្ឋបាលថ្នាក់ក្រោមជាតិ ជាពិសេស គឺអាជ្ញាធរស្រុកទាំងពីរផ្ទាល់ តែម្ដង។ ដូច្នេះសូមឲ្យរដ្ឋបាលស្រុកទាំង២ រៀបចំផែនការប្រមូលសម្រាមឲ្យបានច្បាស់លាស់ និងប្រើប្រាស់រថយន្តនេះ ឲ្យអស់លទ្ធភាព ជាពិសេស ការផ្ដោតលើគោលដៅ ក៏ដូចជា ទីតាំងដែលប្រឈម ក្នុងការប្រមូល និងការរក្សាទុកសម្រាមផងដែរ។
នាឱកាសនោះ ឯកឧត្តម ចាយ សាមិត្ត រដ្ឋលេខាធិការក្រសួងបរិស្ថាន បានបញ្ជាក់ថា ក្រសួងបរិស្ថាន បានអនុវត្តតាមគោលការណ៍ នៃគោលនយោបាយកំណែទម្រង់វិមជ្ឈការ និងសហវិមជ្ឈការ ជាគោលការណ៍គ្រឹះនៃកំណែទម្រង់នេះ។ ក្នុងនោះ ការផ្ទេរមុខងារ នៃការគ្រប់គ្រងសម្រាម សំណល់រឹង នៅតាមទីប្រជុំជន មកឱ្យរដ្ឋបាលថ្នាក់ក្រោមជាតិ គឺជាគោលការណ៍ នៃការផ្ទេរមុខងារមករដ្ឋបាលថ្នាក់ក្រោមជាតិ ដែលរាជរដ្ឋាភិបាល តម្រូវឱ្យក្រសួង ស្ថាប័ន ទាំងអស់ អនុវត្តលើគោលការណ៍ ៣សំខាន់ៗ គឺ៖ ១-ការផ្ទេរមុខងារ ២-ការផ្ទេរធនធានថវិកា និង៣-សម្ភារៈ និងធនធានមនុស្ស មកឱ្យរដ្ឋបាល ថ្នាក់ក្រោមជាតិ។
ឯកឧត្តមរដ្ឋលេខាធិការ បានផ្តាំផ្ញើ ដល់រដ្ឋបាលស្រុកទាំងពីរ ក្រោយទទួលបានរថយន្តទាំងពីរនេះហើយ ត្រូវយកទៅប្រើប្រាស់ ប្រកបដោយប្រសិទ្ធភាព សំដៅឱ្យមូលដ្ឋានមានសោភ័ណ្ឌភាព និងទទួលបានលទ្ធផលល្អប្រសើរ ក្នុងការងារគ្រប់គ្រងសម្រាម សំណល់រឹង នៅតាមទីប្រជុំជននីមួយៗ៕
