(បាត់ដំបង) ៖ បុរស០២នាក់ ត្រូវកម្លាំងសមត្ថកិច្ចឃាត់ខ្លួន កាលពីរសៀលថ្ងៃ ១១ ឧសភា ក្រោយពីជាប់សង្ស័យថា ជនទាំង០២នាក់បានធ្វើសកម្មភាពគាស់ផ្ទះមន្ត្រីនគរបាលម្នាក់ ចូលលួចយកគ្រឿងអល័ង្ការ និងលុយកាក់អស់គ្មានសល់ កាលពីជាង១០ថ្ងៃមុន នៅភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខណៈម្ចាស់មិនបានស្នាក់នៅ។
អធិការស្រុកសំពៅលូន លោក ទឹម វិឆ័យ បានឲ្យដឹងថា ជនសង្ស័យទាំង០២នាក់ ម្នាក់ឈ្មោះ វ៉ាន់ សំណាង អាយុ២២ឆ្នាំ (ក្មួយម្ចាស់ផ្ទះ) និង ម្នាក់ទៀតឈ្មោះ សែន សុផុន អាយុ៣៣ឆ្នាំ ពួកគេរស់នៅក្បែរផ្ទះជនរងគ្រោះខាងលើនេះ រីឯម្ចាស់ផ្ទះរងគ្រោះឈ្មោះ ញឹក សុជាតា ស្រីអាយុ២៨ឆ្នាំ មានមុខរបរជាមន្ត្រីនគរបាលនៅអធិការស្រុកសំពៅលូន។
សូមបញ្ជាក់ថា បើតាមរបាយការណ៍សមត្ថកិច្ច ករណីគាស់ទម្លុះទម្លាយលំនៅឋានខាងលើនេះ បានកើតឡើង កាលពីព្រឹកថ្ងៃទី២៨ មេសា នៅភូមិស្រឡៅជ្រុំ ឃុំសិរីមានជ័យ ស្រុកសំពៅលូន ផ្ទះឈ្មោះ ញឹក សុជាតា ស្រីអាយុ២៨ឆ្នាំ មានមុខរបរជាមន្ត្រីនគរបាល ។ អំពើចោរកម្មនេះ បានបង្កឡើងដោយជនមិនស្គាល់មុខ ដែលពួកគេបានធ្វើសកម្មភាព នៅពេលម្ចាស់ផ្ទះបិទទ្វារចាក់សោទុកចោល រួចចេញទៅបាត់ដំបង រហូតត្រឡប់មកពីបាត់ដំបងវិញ ទើបបានដឹងថា មានចោរគាស់ផ្ទះចូលលួចទ្រព្យសម្បត្តិអស់គ្មានសល់។
បើតាមលោកអធិការស្រុកសំពៅលូនបានប្រាប់ថា ជនសង្ស័យទាំង០២នាក់ ដែលមានម្នាក់ឈ្មោះ វ៉ាន់ សំណាង ត្រូវជាក្មួយម្ចាស់ផ្ទះផង បាននាំគ្នាទៅគាស់ជញ្ជាំងផ្ទះជនរងគ្រោះ រួចចូលលួចអស់គ្មានសល់គ្រឿងអលង្ការ និងប្រាក់មួយចំនួនផង នៅពេលម្ចាស់ផ្ទះជាប់រវល់ទៅបាត់ដំបង។ លោកបានបញ្ជាក់ថា ម្ចាស់ផ្ទះបានដឹងរឿងនេះ នៅពេលត្រឡប់មកពីបាត់ដំបងវិញ ហើយក៏ប្ដឹងទៅសមត្ថកិច្ចជួយអន្តរាគមន៍ រហូតឈានដល់ការឃាត់ជនសង្ស័យចំនួន០២នាក់ ដែលនៅផ្ទះក្បែរគ្នា។
បើតាមរបាយការណ៍សមត្ថកិច្ច ទ្រព្យសម្បត្តិដែលជនរងគ្រោះបាត់បង់រួមមាន៖ ខ្សែ.កប្លាទីន០១ខ្សែ, ចិញ្ចៀនប្លាទីន០១វង់ កងដៃប្លាទីន០៧វង់ និងប្រាក់ថៃចំនួន២ម៉ឺនបាត ។ គ្រឿងអល័ង្ការ និង ប្រាក់ទាំងនេះ ត្រូវជនរងគ្រោះទុកនៅក្នុងកាបូប។ ប៉ុន្តែក្រោយត្រូវចាប់ខ្លួន វត្ថុតាងដែលដកហូតបានពីជនសង្ស័យមាន៖ ខ្សែកប្លាទីនពណ៌.សមានដាំត្បូង០១ខ្សែ និងចិញ្ចៀនប្លាទីនមានដាំត្បូង០១វង់។ ជនដៃដល់បានគាស់ជញ្ជាំងផ្ទះខាងក្រោយចូលលួចគ្រឿងទ្រព្យសម្បត្តិ ពេលម្ចាស់ផ្ទះចាកចេញផុត។
ទោះយ៉ាងណា បើតាមលោក ទឹម វិឆ័យ បានប្រាប់ថា ក្រោយពេលត្រូវឃាត់ខ្លួន ជនសង្ស័យទាំង០២នាក់ បានសារភាពថា ពួកគេពិតជាបានធ្វើសកម្មភាពគាស់ផ្ទះចូលលួចគ្រឿងអល័ង្ការ និង ប្រាក់ចំនួន២ម៉ឺនបាតរបស់ជនរងគ្រោះមែន។ ពេលនេះ លោកស្នងការខេត្ត បានបញ្ជាឲ្យមន្ត្រីជំនាញសួរនាំ និងចាត់ការតាមនីតិវិធីហើយ៕សហការី