(ភ្នំពេញ) ÷សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ នារសៀលថ្ងៃទី ២៩ ខែធ្នូ ឆ្នាំ២០២០នេះបន្ទាប់ពីបានអញ្ជើញចុះពិនិត្យមើលសមិទ្ធផលនានានៅក្នុងបរិវេណវិមានឈ្នះ ឈ្នះ និងបួងសួងសុំសេចក្តីសុខចម្រើន
(ភ្នំពេញ)÷ សម្តេចពិជ័យសេនា ទៀ បាញ់ បានផ្តល់បទសម្ភាសន៍ដល់អ្នកសារព័ត៌មានដោយបញ្ជាក់ថា៖ វាជាប្រវត្តិសាស្ត្រជោគជ័យយ៉ាងធំធេងរបស់កម្ពុជា នាពេលនេះដែលប្រេងនៅក្នុងឈួងសមុទ្ររបស់កម្ពុជា បានស្រក់ចេញចំថ្ងៃខួបអនុស្សាវរីយ៍លើកទី២២របស់កម្ពុជា ដែលបានកើតចេញពីគោល នយោបាយ ឈ្នះ ឈ្នះនោះ។
សម្តេចពិជ័យសេនា ទៀ បាញ់ បានថ្លែងឲ្យដឹងថា ដំណក់ប្រេងកាតដំបូងរបស់កម្ពុជា បានកើតឡើងចំថ្ងៃខួបលើកទី២២ នៃនយោបាយឈ្នះ ឈ្នះ ហើយនឹងរៀបចំឆ្លាក់ជាប្រវត្តិសាស្ត្រនៅក្នុងបរិវេណវិមាន ឈ្នះ ឈ្នះ នាពេលខាងមុខនេះ ដើម្បីទុកឲ្យកូនខ្មែរជំនាន់ក្រោយៗបានដឹង។
សម្តេចពិជ័យសេនា ទៀ បាញ់ បានបញ្ជាក់ថា៖ «កិច្ចការងារប្រវត្តិសាស្ត្រយោធា បានក្លាយជាកិច្ចការងារមួយដ៏មានសារសំខាន់បំផុតដែលជួយជំរុញ និងលើកតម្កើងនយោបាយឈ្នះឈ្នះ គឺបានចូលរួមបង្ហាញគុណតម្លៃឱ្យកាន់តែខ្លាំងក្លាបន្ថែមទៀត ហើយប្រសិទ្ធភាពនយោបាយឈ្នះឈ្នះ វាបានគ្របដណ្តប់ពាសពេញគ្រប់ទិសទីទាំងអស់ ក្នុងប្រទេសកម្ពុជា»។
ជាមួយនឹងសុខសន្តិភាព ស្ថិរភាពពេញផ្ទៃប្រទេសនោះ សម្តេចពិជ័យសេនា ទៀ បាញ់ បានបន្តថា បើទោះបីប្រទេសកម្ពុជា កំពុងតែជួបវិបត្តិរាតត្បាតជំងឺកូវីដ-១៩ក្តី ប៉ុន្តែមិនបានរារាំងដល់ការងារជំរុញគុណតម្លៃសុខសន្តិភាព ដែលកម្ពុជាទទួលបាននៅរយពេល ២២ឆ្នាំមកនេះនោះទេ។
«រឿងនេះពេលវេលា មិនទាន់អនុញ្ញាតឱ្យខ្ញុំនិយាយគ្រប់គ្រាន់ទេ ប៉ុន្តែ គឺចាប់បាច់ណាស់ ដើម្បីខ្ញុំនិយាយឱ្យបងប្អូនមួយចំនួន ស្ថាប័នខ្លះ អ្នកខ្លះ មនុស្សខ្លះឱ្យយល់ច្បាស់អំពីប្រវត្តសាស្ត្រយោធាដែលយើង បាននឹងកំពុងធ្វើនេះ វាមានសារៈសំខាន់ខ្លាំងណាស់ មិនត្រឹមតែពង្រឹងអធិបតេយ្យភាព របស់ខ្លួនទេ តែវាជាការរួមចំណែកយ៉ាងខ្លាំងបំផុតគាស់រំលើងមកពីមនុញ្ញផលទាំងឡាយ នៃនយោបាយឈ្នះឈ្នះ»។
សម្តេចពិជ័យសេនា ទៀ បាញ់ ក៏បានអរគុណដល់ប្រជាពលរដ្ឋទាំងអស់ ដែលតែងតែបានចូលរួម និងគាំទ្រការអនុវត្តនយោបាយឈ្នះឈ្នះ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងន័យបន្តថែរក្សាសន្តិភាព និងការអភិវឌ្ឍដែលកម្ពុជាទទួលបានយ៉ាងលំបាក ដើម្បីភាពប្រសើរឡើងរបស់យើងទាំងអស់គ្នា។
សូមបញ្ជាក់ថា នៅព្រឹកថ្ងៃទី ២៩ ខែធ្នូ ឆ្នាំ២០២០នេះ
សម្តេចតេជោ ហ៊ុន សែន បានថ្លែងអះអាងថា កម្ពុជាបានចាប់ផ្តើមទទួលដំណក់ប្រេងលើកដំបូងរបស់ខ្លួនហើយ ស្ថិតនៅតំបន់ប្លុក A នៃឈូងសមុទ្រកម្ពុជាដោយក្រុមហ៊ុន Kris Energy ដែលបានខួងប្រេងចេញពីបាតសមុទ្រ ក្នុងខេត្តព្រះសីហនុ។
សម្តេចតេជោ នាយករដ្ឋមន្ត្រី បានបញ្ជាក់ថា «ដំណក់ប្រេងលើកដំបូងរបស់កម្ពុជា នឹងចាប់ផ្តើមផលិតចេញពីអណ្តូងប្រេងទី១ ឈ្មោះ A-0ID នៃ ផ្លាតហ្វម A នៅក្នុងប្លុកនៃឈូងសមុទ្រកម្ពុជា នៅថ្ងៃទី២៩ ខែធ្នូ ឆ្នាំ២០២០ ដែលគាប់ជួនជាមួយថ្ងៃខួបលើកទី២២ នៃការបញ្ចប់សង្គ្រាមនាំមកនូវការឯកភាពជាតិ ឯកភាពទឹកដី តាមរយៈនយោបាយឈ្នះ-ឈ្នះ(២៩ធ្នូ១៩៩៨–២៩ ធ្នូ ២០២០)។ ថ្ងៃទី២៩ ធ្នូ ១៩៩៨ បង្កលក្ខណៈសម្បត្តិគ្រប់ យ៉ាងឱ្យយើងមានដំណក់ប្រេងលើក ដំបូងនៅកម្ពុជានាថ្ងៃទី ២៩ ធ្នូ ២០២០នេះ»។
សម្តេចតេជោ នាយករដ្ឋមន្ត្រីក៏បានលើកឡើងផងដែរថា «ទូលព្រះបង្គំ ខ្ញុំព្រះករុណា ខ្ញុំសូមឆ្លៀតឱកាសដ៏មហោឡារិកនេះ សម្តែងនូវអំណរគុណយ៉ាងជ្រាលជ្រៅ និងស្មោះស្ម័គ្របំផុតជូនចំពោះជនរួមជាតិទាំងអស់ ដែលបានចូលរួម និងគាំទ្រយ៉ាងសកម្មជាមួយនិងរាជរដ្ឋាភិបាលនៅក្នុងដំណើរការអភិវឌ្ឍសេដ្ឋកិច្ច និងសង្គមនាពេលកន្លងមក ។
