(កំពង់ចាម) ៖ សមិទ្ធផលជាច្រើនផ្តើមរីកដុះដាលឆាប់រហ័សនៅក្នុងវត្ត បទុមមុនីវ័ន គឺនៅក្រោយពេលដែលប្រទេសយើងបានទទួលសុខសន្តិភាពពេញលេញ ក្រោមគោលនយោបាយដឹកនាំប្រកបដោយធម៌ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចតែងផ្តោតជានិច្ចលើការកសាងអំពើជាកុសល ព្រមទាំងការអភិវឌ្ឍ ដើម្បីបង្កើតជាផលឱ្យសង្គមជាតិ និងប្រជាជនបានរុងរឿង។ ដូច្នេះ ដើម្បីជាកិច្ចតបស្នងនូវគុណណូបការៈដ៏ធំធេងរបស់សម្ដេចតេជោ គឺសូមបងប្អូនប្រជាពលរដ្ឋគ្រប់រូប រួមគ្នាបន្តថែរក្សា ការពារសុខសន្តិភាពឱ្យបានគង់វង្សយូរអង្វែង។
ប្រសាសន៍បែបនេះ ត្រូវបានឯកឧត្ដម អ៊ុន ចាន់ដា អភិបាលនៃគណៈអភិបាលខេត្ដកំពង់ចាម លើកឡើងក្នុងពិធីបុណ្យពុទ្ធាភិសេក សម្ពាធសាលាធម្មសភា និងសមិទ្ធផលនានា ក្នុងវត្តបទុមមុនីវ័ន ដែលស្ថិតក្នុងភូមិស្ដៅលើ ឃុំស្ដៅ ស្រុកកងមាស នាព្រឹកថ្ងៃទី ២ខែមិថុនា ឆ្នាំ២០២៣នេះ។
ពិធីនេះក៏មានការអញ្ជើញជាគណៈអធិបតីពីឯកឧត្ដម នាយឧត្ដមសេនីយ៍ សេង យូអ៊ាន់ អគ្គយកនៃអគ្គយកដ្ឋានភស្តុភារ និងហិរញ្ញវត្ថុ ក្រសួងមហាផៃ និងប្រតិភូអមដំណើរ រួមនឹងថ្នាក់ដឹកនាំ មន្ត្រីរាជការ មន្ទីរ អង្គភាពជុំវិញខេត្ត តាជី យាយជី លោកគ្រូ អ្នកគ្រូ សិស្សានុសិស្ស យុវជន និងបងប្អូនប្រជាពលរដ្ឋយ៉ាងច្រើនកុះករផងដែរ។
