(ព្រៃវែង) ៖ បុរសម្នាក់ ត្រូវបានកម្លាំងនគរបាល នៃអធិការដ្ឋាននគរបាលស្រុកកំពង់ត្របែក ឃាត់ខ្លួន ក្រោយធ្វើសកម្មភាពយកប៉ូវថៅ វាយបំបែកទូ តាំងទូរសព្ទចំនួន ០១គ្រឿង ទូតាំងសម្ភារទូរសព្ទចំនួន០១ បណ្តាលឱ្យប្រេះស្រាំទាំង ០២ ហើយនៅក្រោយកើតហេតុភ្លាម កម្លាំងនគរបាលបានចុះដល់ទីតាំង ដើម្បីអន្តរាគមន៍ ក៏ត្រូវបានជនសង្ស័យ ចូលក្នុងផ្ទះ យកចំពាមកៅស៊ូបាញ់ ត្រូវមន្ត្រីនគរបាលចំក្រោមដើមទ្រូងខាងឆ្វេង និងយកកាំបិតគំរាមកាប់មកលើកម្លាំងនគរបាល ថែមទៀត ។
ហេតុការណ៍នេះ បានកើតឡើងនៅវេលាម៉ោង១៦និង៤២នាទី ថ្ងៃទី១០ ខែកក្កដា ឆ្នាំ២០២៣ ត្រង់ចំណុចផ្ទះរបស់ឈ្មោះ ចិន ពៅតួ ភេទប្រុស អាយុ ២៤ឆ្នាំ ស្ថិតក្នុងភូមិស្វាយចេក ឃុំព្រៃឈរ ស្រុកកំពង់ត្របែក ខេត្តព្រៃវែង ។
ជនសង្ស័យដែលត្រូវបានឃាត់ខ្លួន មានឈ្មោះ ប៊ី នឿន ភេទប្រុស អាយុ៥១ឆ្នាំ រស់នៅភូមិស្វាយចេក ឃុំព្រៃឈរ ស្រុកកំពង់ត្របែក ខេត្តព្រៃវែង ។
ក្រោយពីទទួលបានបណ្ដឹងពីជនរងគ្រោះ កម្លាំងនគរបាលខេត្តព្រៃវែង បានចុះទៅដល់ផ្ទះជនសង្ស័យ ដើម្បីកោះហៅមកសាកសួរ តែជនសង្ស័យមិនព្រមសហការណ៍ និងបានចូលក្នុងផ្ទះយកចំពាមកៅស៊ូបាញ់ ត្រូវចំនគរបាលចំនួន ០១ គ្រាប់ បណ្ដាលឱ្យរងរបួស និងយកកាំបិតគំរាមកាប់មកលើនគរបាលថែមទៀតផង ។
បច្ចុប្បន្ន ជនសង្ស័យខាងលើ ត្រូវបានឃាត់ខ្លួនយកមកអធិការដ្ឋាននគរបាលស្រុកកំពុងត្របែក ដើម្បីចាត់ការបន្តតាមនីតិវិធី ៕សហការី