(សៀមរាប) ៖ នៅថ្ងៃទី៣១ ខែសីហា ឆ្នាំ២០២៣ នៅសាលប្រជុំរដ្ឋបាលខេត្ត លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានជួបសម្តែងការគួរសម និងប្រជុំពិភាក្សា ស្តីពីការត្រៀមរៀបចំកិច្ចប្រជុំត្រួតពិនិត្យឡេីងវិញលេីកទី៥ នៃអនុសញ្ញាអូតាវ៉ា នៅក្នុងខេត្តសៀមរាប ក្រោមការដឹកនាំ ឯកត្តម លី បញ្ញារិទ្ធិ៍ អគ្គលេខាធិការអាជ្ញាធរមីន លោក Juan Carlos Ruan នាយកអង្គភាព ISU និងមានការចូលរួមពីមន្ត្រីបច្ចេកទេសរបស់អង្គភាព ISU ឯកឧត្តម ម៉ៅ ប៊ុនញ្ញាត្ត ប្រធាននាយកដ្ឋានអាជ្ញាធរមីន លោកនាយករងរដ្ឋបាលសាលាខេត្ត លោកនាយកទីចាត់ការ និងមន្ត្រីសាលាខេត្តមួយចំនួនផងដែរ។
ការជួបសម្តែងការគួរសម និងប្រជុំពិភាក្សានេះ អាជ្ញាធរមីន និងក្រុមការងារអង្គភាព ISU គ្រោងនឹងចុះធ្វើដំណើរទស្សនកិច្ចចុះពិនិត្យទីតាំង និងប្រជុំពិភាក្សាការងារដើម្បីត្រៀមរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា នៅក្នុងខេត្តសៀមរាប ចាប់ពីថ្ងៃទី៣០ ខែសីហា ដល់ថ្ងៃទី០២ ខែកញ្ញា ឆ្នាំ២០២៣។ ជាមួយគ្នានោះផងដែរ គណៈប្រតិភូគ្រោង នឹងចូលជួបសម្តែងការគួរសម និងពិភាក្សាស្តីពីការត្រៀមរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា ជាមួយក្រុមការងារក្រុងសៀមរាបផងដែរ៕
