ភ្នំពេញ ៖ គ្រាន់តែរឿងគ្រោះថា្នក់ចរាចរណ៍បន្តិចបន្តួចសោះ បុរសម្នាក់បានដកកាំភ្លើ.ងបាញ់ទៅលើភាគីម្ខាងទៀត បណ្តាលឲ្យរងរបួស ហើយក៏បានជិះម៉ូតូរត់គេចខ្លួនបាត់ស្រមោលតែម្តង បង្កឱ្យមានការភ្ញាក់ផ្អើលកាលពីវេលាម៉ោង៩និង១០នាទីយប់ ថ្ងៃទី១៩ ខែធ្នូ ឆ្នាំ២០២២ ជាប់របងវត្តសន្សំកុសល ផ្លូវលេខ៣១ ស្ថិតក្នុងភូមិសន្សំកុសល សង្កាត់បឹងទំពន់ទី១ ខណ្ឌមានជ័យ ។
គួរបញ្ជាក់ថា ជនរងគ្រោះមិនបានអោយស្គាល់អត្តសញ្ញាណនៅឡើយទេ។ ចំណែកបុរសដែលដកកាំភ្លើ.ងបាញ់នោះបានរត់គេចខ្លួនបាត់ស្រមោល ក្រោយបាញ់ទៅលើជនរងគ្រោះ ។
បើតាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ ភាគីជនរងគ្រោះ និងភាគីខាងជនបង្កបានជិះម៉ូតូម្នាក់មួយគ្រឿង ដោយជនរងគ្រោះជិះម៉ូតូហុងដាឌ្រីម ពណ៌ខ្មៅ ចំណែកភាគីខាងជនបង្កជិះម៉ូតូម៉ាក ZOOMER X មិនចាំស្លាកលេខ ខណៈពេលនោះភាគីទាំង២ក៏បានប៉ះដៃចង្កូតគ្នា បណ្តាលឲ្យដួលរងការខូចខាតតិចតួច ហើយក៏ស្រាប់តែភាគីខាងអ្នកជិះម៉ូតូ ZOOMER X បានដកកាំភ្លើ.ងខ្លីបាញ់ទៅខាងភាគីអ្នកជិះហុងដាឌ្រីម បណ្តាលឲ្យរងរបួសត្រូវស្មាខាងស្តាំ បន្ទាប់ពីបាញ់រួច ភាគីខាងអ្នកជិះម៉ូតូ ZOOMER X ក៏បានលើកម៉ូតូជិះរត់គេចខ្លួនបាត់ស្រមោលតែម្តងទៅ។ ចំនែកភាគីខាងម៉ូតូហុងឌ្រីម បន្ទាប់ពីរងរបួស ហើយត្រូវបានបងប្អូនប្រជាពលរដ្ឋជួយដឹកយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ហៅពេទ្យរុស្ស៊ីភ្លាមៗផងដែរ។
Picture
ក្នុងករណីខាងលើនេះដែរ បន្តិចក្រោយមក ទើបផ្អើលដល់សមត្ថកិច្ចមូលដ្ឋានបានចុះទៅកន្លែងកើតហេតុ ធ្វើការសួរនាំដំណើរ និងបានដកហូតក្បាលគ្រា.ប់កាំភ្លើ.ងមួយគ្រា.ប់យកទៅរក្សាទុកផងដែរ ។
ចំពោះករណីនេះផងដែរ សមត្ថកិច្ចក៏មិនទាន់អាចបញ្ជាក់បានថា ផ្តើមចេញពីរឿងអ្វីអោយប្រាកដនោះទេ ដោយភាគីរងគ្រោះកំពុងតែព្យាបាលរបួសនៅមន្ទីរពេទ្យ ចំណែកជនបង្កក៏បានរត់គេចខ្លួនបាត់ តែទោះជាយ៉ាងក្តី សមត្ថកិច្ចក៏កំពុងធ្វើការស្រាវជ្រាវ ដើម្បីឈានទៅរកការឃាត់ខ្លួនជនបង្កយកមកចាត់ការតាមនីតិវិធីច្បាប់ផងដែរ៕សហការី