(ភ្នំពេញ) ៖ កម្លាំងជំនាញ នៃអធិការដ្ឋាននគរបាលខណ្ឌប្ញស្សីកែវ បានធ្វើការស្រាវជ្រាវរហូតឃាត់ខ្លួនជនសង្ស័យចំនួន២នាក់ កាលពីវេលាម៉ោង១៦និង០០នាទីរសៀលថ្ងៃទី១២ ខែមីនា ឆ្នាំ២០២៣ ត្រង់ចំណុចបន្ទប់ជួល ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ នាំខ្លួនមកកាន់អធិការដ្ឋាននគរបាលខណ្ឌឫស្សីកែវ ដើម្បីសួរនាំពាក់ព័ន្ធករណីឆក់ទូរសព្ទដៃមិនបានសម្រេច ។
ករណីឆក់ទូរសព្ទមិនបានសម្រេច កើតឡើងកាលពីវេលាម៉ោងប្រហែល០៦និង០០នាទីថ្ងៃទី០៤ ខែមីនា ឆ្នាំ២០២៣ ត្រង់ចំណុចផ្លូវលេខ៩០៧ ក្រុមទី៧ ភូមិទួលសង្កែ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ។
ជនសង្ស័យចំនួន០២នាក់ ដែលត្រូវឃាត់ខ្លួន រួមមាន ៖
ទី១. ឈ្មោះអែល រក្សា ហៅសាល ភេទប្រុស អាយុ២២ឆ្នាំ ជនជាតិខ្មែរ មានទីលំនៅបន្ទប់ជួល ផ្លូវបេតុង ភូមិបឹងសាឡាង សង្កាត់ប្ញស្សីកែវ ខណ្ឌប្ញស្សីកែវ (មានសារធាតុញៀន) ។
និងទី២. ឈ្មោះហូ រ៉ូហ្សាត ភេទប្រុស ជនជាតិខ្មែរ មានទីលំនៅបន្ទប់ជួល ផ្លូវបេតុង ភូមិខ២ សង្កាត់ច្រាំងចំរេះទី២ ខណ្ឌប្ញស្សីកែវ។
បើតាមសមត្ថកិច្ចនគរបាលខណ្ឌឫស្សីកែវ បានអោយដឹងថា មុនពេលកើតហេតុ ជនសង្ស័យចំនួន០២នាក់ ជិះម៉ូតូ ០១គ្រឿង ម៉ាក Honda Dream C125 ពណ៌ខ្មៅ ផ្លាកលេខ ភ្នំពេញ 1JJ-6440 បានជិះតាមពីក្រោយជនរងគ្រោះ(មិនស្គាល់អត្តសញ្ញាណ) ហើយធ្វើសកម្មភាពឆក់យកទូរសព្ទដៃពីក្នុងឃ្លុបម៉ូតូរបស់ជនរងគ្រោះ តែពុំបានសម្រេច បណ្តាលឲ្យជនរងគ្រោះដួលម៉ូតូ ហើយជនសង្ស័យក៏បានជិះម៉ូតូគេចខ្លួនបាត់ ក្រោយពេលកើតហេតុ ជនរងគ្រោះពុំបានមកដាក់ពាក្យបណ្តឹងនោះទេ ។ ប៉ុន្តែបន្ទាប់ពីទទួលបានព័ត៌មានរាយការណ៍ពីប្រជាពលរដ្ឋអំពីហេតុការណ៍ខាងលើនេះភ្លាម កម្លាំងសមត្ថកិច្ចជំនាញ នៃអធិការដ្ឋាននគរបាលខណ្ឌឫស្សីកែវ បានចុះទៅត្រួតពិនិត្យកន្លែងកើតហេតុ និងបានធ្វើការស្រាវជ្រាវរហូតឈានដល់ឃាត់ខ្លួនជនសង្ស័យទាំង០២នាក់ នៅថ្ងៃទី១២ មីនា ម្សិលមិញនេះ និងវត្ថុតាងដកហូតបាន រួមមាន ៖ ម៉ូតូម៉ាកសេ១២៥ ពណ៌ខ្មៅ ពាក់ផ្លាកលេខភ្នំពេញ1JJ-6440 ។
បច្ចុប្បន្ន ជនសង្ស័យ និងវត្ថុតាងខាងលើ កម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវីធីច្បាប់ ៕សហការី