(បាត់ដំបង) អគ្គិភ័យដ៏សន្ធោរសន្ធៅបានលេបត្របាក់លំនៅឋានអស់ចំនួន១២ល្វែង កាល
ពីវេលាម៉ោង៥និង២០នាទីល្ងាចថ្ងៃទី ០៦ កក្កដា នៅម្ដុំផ្លូវលេខ១និងលេខ១កន្លះ (ខាងជើងផ្សារណាត់៥០ម៉) ស្ថិតក្នុងភូមិព្រែកមហាទេព សង្កាត់ស្វាយប៉ ក្រុងបាត់ដំបង ដែលគេអះអាងថា បានផ្ដើមចេញពីផ្ទះលក់ពូកដ៏ធំមួយ តែគេមិនទាន់ដឹងពីមូលហេតុនៅឡើយទេ។
យោងតាមរបាយការណ៍បឋមរបស់សមត្ថកិច្ច ដែលបានស្រង់ក្រោយពេលកើតហេតុបានឲ្យដឹងថា លំនៅឋានដែលខូចខាតទាំងស្រុងមានចំនួន១២ល្វែង ដែលភាគច្រើនធ្វើពីឈើ ថ្ម និងស័ង្កសី តែនៅមានលំនៅឋានមួយចំនួនទៀត ដែលរងផលប៉ះពាល់ដោយសារអណ្ដាតភ្លើង ។ របាយ
ការណ៍បានបញ្ជាក់ថា អគ្គិភ័យដ៏មហន្តរាយនេះ បានផ្ដើមចេញពីផ្ទះលក់ពូកដ៏ធំមួយនៅចំកណ្ដាលនៃទីតាំងកើតហេតុ ដែលថៅកែពូកនោះឈ្មោះ អ៊ា អេងហុង ប្រុសអាយុ៧០ឆ្នាំ ។
ប៉ុន្តែភ្លាមៗ គេមិនទាន់ដឹងពីមូលហេតុ ដែលនាំឲ្យមានអគ្គិភ័យកើតឡើងនៅឡើយទេ។ ជនរងគ្រោះម្នាក់ នៅក្នុងគ្រោះមហន្តរាយអគ្គិភ័យនេះ ឈ្មោះ ហេង សុខន ស្រីអាយុ៣៦ឆ្នាំ មានមុខរបរជាងទង បាននិយាយយ៉ាងដូច្នេះថា «ខ្ញុំគ្មានសេសសល់អ្វីទេ ក្រៅពីខោអាវមួយចង្កេះ។ ទាំងផ្ទះទាំងទ្រព្យនៅក្នុងផ្ទះ ត្រូវភ្លើងឆេះគ្មានសល់។ ខ្ញុំឆកយកបានតែម៉ាស៊ីចិតគ្រឿងអល័ង្កាបានតែ០២គ្រឿងប៉ុណ្ណោះ ក្រៅពីនេះត្រូវភ្លើងឆេះអស់ហើយ»។
អ្នកស្រីហេង សុខន បានរៀបរាប់ថា ផ្ទះរបស់គាត់នៅក្បែរផ្ទះលក់ពូកនោះរំលងពីគ្នាតែមួយល្វែងប៉ុណ្ណោះ។ ពេលភ្លើងកំពុងឆេះគាត់នៅក្នុងផ្ទះមិនបានឃើញទេ តែពេលនោះមានក្លិនឈ្ងៀមខ្លាំងណាស់។ គាត់ប្រាប់ថា គ្រានោះមានគេរត់មកប្រាប់គាត់ថា ភ្លើងឆេះផ្ទះលក់ពូកហើយ នៅក្នុងផ្ទះធ្វើអីទៀត ? ពេលឮបែបនេះគាត់ក៏រត់ចេញទាំងភ័យស្លន់ស្លោរ លុះមកដល់ក្រៅផ្ទះ ស្រាប់តែឃើញផ្ទះលក់ពូកនោះកំពុងឆេះយ៉ាងសន្ធោរសន្ធៅមែន ទើបមានការផ្អើលឆោឡោម្ដង។
អ្នកស្រីបានបញ្ជាក់ថា តាមពិតផ្ទះមួយល្វែងដែលឆេះនោះ គ្មានមនុស្សស្នាក់នៅទេ ថៅកែពូកគ្រាន់តែស្ដុកពូក ឬសម្ភារផ្សេងៗ រួចបិតទ្វារ តែម្ចាស់ពូកបានលក់នៅខាងមុខ ជួរផ្លូវលេខ១ តែគាត់មិនបានដឹងថា ភ្លើងដែលឆេះនោះបណ្ដាលមកពីអ្វីទេ។ នៅកន្លែងកើតហេតុ នាព្រឹកថ្ងៃទី ០៧ កក្កដា គេឃើញសមត្ថកិច្ចជំនាញ និង អាជ្ញាធរ បានចុះពិនិត្យគ្រោងឆ្អឹងលំនៅឋាន ដែលសេសសល់ពីចំណីព្រះអគ្គីដ៏រន្ធត់ ។
បើតាមការពិនិត្យជាក់ស្ដែង អ្វីដែលសេសសល់នោះ គឺ មានតែសសរឈើ និង ដែកសង្កសីប៉ុណ្ណោះ។ រីឯសម្ភារៈដទៃៗទៀត បានក្លាយជាផេះផង់អស់ទៅហើយ។ អាជ្ញាធរ និង មន្ត្រីជំនាញហាក់មិនទាន់វាយតំលៃអំពីតុល្យការ នៃការខូចខាតនៅឡើយទេ ព្រោះមើលទៅហាក់មានសភាពធ្ងន់ធ្ងរពេក។
លោក គឹម ប៊ុនធឿន ប្រធានការិយាល័យ បង្ការ ពន្លត់អគ្គីភ័យ និង សង្គ្រោះ បានថ្លែងប្រាប់កោះសន្តិភាពតាមទូរស័ព្ទថា ពេលនេះយើងមិនទាន់រកឃើញពីមូលហេតុ ដែលនាំឲ្យមានអគ្គីភ័យកើតឡើងទេ តែយើងគ្រាន់តែទទូលបានការបំភ្លឺបឋមថា «អគ្គីភ័យដ៏មហន្តរាយនេះ ចាប់ផ្ដើមកើតចេញពីផ្ទះលក់ពូក»។ លោកបានបញ្ជាក់ថា បើពិនិត្យលើទិដ្ឋភាពជាក់ស្ដែង អាចខាតបង់ធ្ងន់ធ្ងរណាស់ ហើយពេលនេះទាំងអាជ្ញាធរ ទាំងមន្ត្រីជំនាញរបស់លោកកំពុងសហការគ្នា ចុះត្រូតពិនិត្យ និង ធ្វើការស្រាវជ្រាវរកមូលហេតុ នៃអគ្គីភ័យនេះ។
Picture
យើងនូវមិនទាន់ដឹងថា តើទ្រព្យសម្បត្តិអ្វីខ្លះ សម្ភារៈអ្វីខ្លះ ក្រៅពីផ្ទះសម្បែង ដែលត្រូវភ្លើងឆេះ ? ប៉ុន្តែបើតាមព័ត៏មានបឋម នៅពេលនេះគឺម្ចាស់ផ្ទះទាំងអស់ស្ទើរតែមិនអាចរំដោះអ្វីបានច្រើនទេ ហើយក៏មិនទាន់មានសេចក្ដីរាយការណ៏អំពីគ្រោះថ្នាក់មនុស្សនៅឡើយដែរ។
ទោះយ៉ាងណា បើតាមលោក គឹម ប៊ុនធឿន បានប្រាប់ដែរថា អគ្គិភ័យដ៏មហន្តរាយនេះ បានធ្វើឲ្យមន្ត្រីជំនាញរបស់លោកចំណាយទឹកច្រើនរថយន្តណាស់ ។ រថយន្តពន្លត់អគ្គីភ័យពី៦ទៅ៧គ្រឿង មកពីស្រុកថ្មគោល ស្រុកសង្កែ និងស្រុកឯកភ្នំផង បានផ្គុំគ្នាបាញ់ពន្លត់ និងបាញ់ទប់ស្កាត់៕ដោយ ព្រំ ហន