(ភ្នំពេញ) ៖ ជនសង្ស័យម្នាក់បានធ្វើសកម្មភាពលួចម៉ូតូដែលម្ចាស់ចតទុកនៅក្បែរផ្ទះជួលមួយកន្លែង ហើយរវល់ចូលទៅដកប្រាក់នៅផ្ទះវីងជិតនោះ លុះពេលលួចបានសម្រេចជនសង្ស័យរូបនេះបានព្យាយាមជិះរត់គេចខ្លួន ប៉ុន្តែត្រូវបានម្ចាស់ឃើញទាន់ស្រែកឆោឡោ បង្កឱ្យមានការភ្ញាក់ផ្អើល ហើយអ្នកជិតខាងក៏បានជិះម៉ូតូឌុបដេញតាមរហូតឃាត់ខ្លួនបានតែម្តង។ ហេតុការណ៍នេះបានកើតឡើងកាលពីវេលាម៉ោង១និង៣៥នាទីរសៀល ថ្ងៃទី០៩ ខែមករា ឆ្នាំ២០២៣ ស្ថិតនៅក្នុងភូមិព្រៃទា២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យខាងលើនេះមានឈ្មោះ ភោគ កុសល ភេទប្រុស អាយុ៣៣ឆ្នាំ មានទីលំនៅភូមិខ្នាចជើង ឃុំបឹងត្រាច់ខាងជើង ស្រុកសំរោង ខេត្តតាកែវ នឹងស្នាក់នៅក្នុងភូមិកើតហេតុខាងលើ។ ជននេះបានសារភាពប្រាប់នគរបាលថា «មកពីខ្លួនគ្មានលុយចាយ ជាពិសេសកន្លងមក ខ្លួនក៏ធ្លាប់ត្រូវចោរលួចម៉ូតូអស់១គ្រឿងផងដែរ ទើបពេលនេះ ខ្លួនលួចយកម៉ូតូអ្នកផ្សេងជាការសងសឹកវិញ»។
ជនសង្ស័យខាងលើនេះបានធ្វើសកម្មលួចម៉ូតូ១គ្រឿងម៉ាកហុងដាឌ្រីម ស៊េរី២០១៣ ពណ៌ខ្មៅ ពាក់ស្លាកលេខ ភ្នំពេញ 1BU-8591 ដែលជាកម្មសិទ្ធិរបស់យុវជនម្នាក់ឈ្មោះ ជា វីរ៉ា ភេទប្រុស អាយុ២៣ឆ្នាំ មុខរបរកម្មករសំណង់ ស្នាក់នៅផ្ទះជួលភូមិព្រៃទា២ សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើត ភូមិបឹងម្នង ឃុំម្រាម ស្រុករមាសហែក ខេត្តស្វាយរៀង ។
តាមប្រភពព័ត៌មានបានប្រាប់ឲ្យដឹងថា នៅមុនពេលកើតហេតុ បុរសខាងលើបានជិះម៉ូតូឌុបកូនទៅរៀន បន្ទាប់មកក៏ឆ្លៀតទៅដកលុយនៅផ្ទះវីងមួយកន្លែង ហើយពេលទៅដល់បានទុកម៉ូតូនៅជិតផ្ទះជួលក្បែរផ្ទះវីងដែរ។ ខណៈពេលកំពុងតែជាប់រវល់ដកប្រាក់ ស្រាប់តែក្រឡេកឃើញជនសង្ស័យលួចយកម៉ូតូជិះរត់គេចខ្លួន ពេលនោះជនរងគ្រោះក៏បានស្រែកឆោឡោបង្កឱ្យមានការភ្ញាក់ផ្អើលតែម្តង។
ប្រភពដដែលបន្តថា ក្រោយពេលជនរងគ្រោះស្រែកឆោឡោភ្លាម ពេលនោះអ្នកជិតខាងក៏បានយកម៉ូតូជិះឌុបបុរសរងគ្រោះចេញទៅ ដើម្បីជិះដេញតាមជនសង្ស័យបណ្តើរ និងស្រែកថា «ចោរៗបណ្តើរ» រហូតដល់ចំណុចស្ពានអាកាសចោមចៅ ស្ថិតក្នុងភូមិព្រៃជីសាក់ សង្កាត់ចោមចៅទី៣ ទើបចាប់ខ្លួនជនសង្ស័យបាន បន្ទាប់មកក៏បានប្រគល់ជនសង្ស័យឱ្យសមត្ថកិច្ច ដើម្បីនាំខ្លួនយកទៅសាកសួរ និងចាត់ការតាមច្បាប់៕សហការី