(កំពង់ចាម) ៖អភិបាល នៃគណៈអភិបាលខេត្តំពង់ចាម ឯកឧត្តម អ៊ុន ចាន់ដា បានណែនាំដល់មន្ត្រីនៃមន្ទីរសុខាភិបាលត្រូវខិតខំបម្រើសេវារដ្ឋបាល និងសេវាសាធារណៈ ជូនប្រជាពលរដ្ឋឱ្យបានល្អប្រសើរ ពិសេសត្រូវពង្រឹងឥរិយាបថ ឱ្យបានល្អ ឱ្យសាកសមជាមន្ត្រីផ្តល់សេវា ហើយត្រូវខិតខំដោះស្រាយបញ្ហាដែលមាននៅក្នុងមូលដ្ឋាន ក្នុងអង្គភាព ក៏ដូចជានៅក្នុងវិស័យរបស់ខ្លួន ពោលគឺត្រូវបង្កើនភាពជឿជាក់ពីសំណាក់អ្នកជំងឺ ធ្វើយ៉ាងណាឱ្យប្រជាពលរដ្ឋមានការជឿទុកចិត្តលើវិស័យសុខាភិបាល ក៏ដូចជារាជរដ្ឋាភិបាលផងដែរ។ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ថ្លែងបែបនេះនៅក្នុងពិធីបិទកិច្ចប្រជុំបូកសរុបការងាររបស់មន្ទីរសុខាភិបាល នៃរដ្ឋបាលខេត្តកំពង់ចាម ប្រចាំឆ្នាំ២០២២ និងលេីកទិសដៅការងារបន្តឆ្នាំ២០២៣ និងពិធីប្រកាសតែងតាំងបំពេញបន្ថែម អនុប្រធានមន្ទីរសុខាភិបាលនៃរដ្ឋបាលខេត្ត ជាស្រ្តី ដែលពិធីនេះធ្វើឡើងនៅសាលប្រជុំមន្ទីរសុខាភិបាលខេត្ត។
