(កំពង់ចាម) ៖ នារសៀលថ្ងៃសុក្រ ១៤កើត ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៣ ខែកុម្ភ: ឆ្នាំ២០២៤ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានអញ្ជើញជាអធិបតីក្នុងពិធី បិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា២០២២-២០២៣ និងទិសដៅការងារឆ្នាំសិក្សា២០២៣-២០២៤ ដែលធ្វើឡើងនៅមន្ទីរអប់រំយុវជន និងកីឡា ។
ថ្លែងក្នុងឱកាសនោះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានលើកឡើងថា បើចង់លើកកម្ពស់គុណភាពអប់រំគឺ ត្រូវកែលម្អល័ក្ខខ័ណ្ឌចាំបាច់នានានៃសកម្មភាពបង្រៀន និងរៀន។ បើចង់ពង្រីកបរិមាណអប់រំ គឺត្រូវ កសាងសាលារៀនបន្ថែម បណ្តុះបណ្ដាលគ្រូបង្រៀនបន្ថែម និងបន្ថែមសម្ភារសិក្សា ពីព្រោះថា ចំនួន កុមារដល់វ័យសិក្សាកាន់តែមានការកើនឡើងពីមួយឆ្នាំទៅមួយឆ្នាំ ចំណែកឯតម្រូវការរបស់ទីផ្សារ ក៏ដូច ជាសង្គមជាតិ គឺសុទ្ធតែទាមទាររកធនធានមនុស្សប្រកបដោយសមត្ថភាព និងគុណភាពផងដែរ។
ឯកឧត្ដមអភិបាលខេត្ត បានស្នេីសូមឱ្យមន្ទីរអប់រំ យុវជន និងកីឡាខេត្តកំពង់ចាម ត្រូវយកចិត្តទុកដាក់បន្ថែមទៀតលើការប្រមូលកុមារគ្រប់អាយុឱ្យចូលរៀនបាន ច្រើនប្រកបដោយសមធម៌ ទោះបីជាពួកគេស្ថិតនៅទីកន្លែងណា រស់នៅក្នុងស្ថានភាពបែបណាក៏ដោយ ជាពិសេសនៅតំបន់ជួបការលំបាក និងតំបន់ដាច់ស្រយាល ដោយអនុវត្តតាមទិសស្លោក “សាលារៀនគឺ ត្រូវស្វែងរកកុមារ ត្រូវតែខិតខំកសាងសាលារៀន ហើយបង្កើតបរិស្ថានរៀនសូត្រដល់សិស្សានុសិស្សឱ្យ ប្រកបដោយផាសុកភាព ទាំងផ្លូវកាយ និងផ្លូវចិត្ត ពោលគឺប្រែក្លាយសាលារៀនជាសាលាកុមារមេត្រី ដើម្បីឱ្យពួកគេទទួលបានចំណេះដឹង ចំណេះធ្វើ សមត្ថភាពជំនាញខ្ពស់ មានសីលធម៌រស់នៅល្អ ចេះរួម រស់នៅជាមួយគ្នាដោយសុខដុមរមនាក្នុងគ្រួសារ និងសង្គមជាតិ។
ជាមួយគ្នានោះ ឯកឧត្ដម អ៊ុន ចាន់ដា ក៏បានធ្វើការអំពាវនាវដល់ លោកគ្រូ អ្នកគ្រូ អ្នកពាក់ព័ន្ធជាមួយនឹងការងារអប់រំទាំងអស់ សូមធ្វើការផ្សព្វផ្សាយរាល់សារាចរ សេចក្តី ណែនាំផ្សេងៗ ពិសេសគឺការងារទាក់ទងនឹងវិធានការបង្ការទប់ស្កាត់ និងបង្ក្រាបសកម្មភាព ក្រុមទំនើង” ការអនុវត្តបទបញ្ញតិ នៃច្បាប់ចរាចរផ្លូវគោកថ្មី ការជួញដូរកុមារ និងការប្រើប្រាស់គ្រឿងញៀន ការលុប បំបាត់ពលកម្មកុមារទម្រង់ធ្ងន់ធ្ងរបំផុត ការគោរពបទបញ្ជាផ្ទៃក្នុងរបស់សាលារៀន និងការទប់ស្កាត់ជំងឺឆ្លងឱ្យបានជ្រួតជ្រាបដល់សិស្សានុសិស្សទាំងអស់ ដើម្បីឱ្យពួកគេមានទុន មានគ្រឹះក្នុងការកសាង និងអភិវឌ្ឍខ្លួនឱ្យក្លាយទៅជា “កូនល្អ សិស្សល្អ មិត្តល្អ” នៅថ្ងៃអនាគតផងដែរ ៕