មួយរយៈចុងក្រោយនេះសកម្មភាពនៃការនាំទំនិញសាច់បង្កកឆ្លងដែនភាគច្រើន តាមបណ្ដាខេត្តភាគខាងកើតពោលគឺឆ្លងដែនក្នុងដែនសមត្ថកិច្ចលោកអួន សុវណ្ណារ៉ាមេគយចល័តតំបន់១។ ភាពងាយស្រួលរបស់លោកមេគយ គឺមិនចាំបាច់ខ្វល់អំពល់អ្វីទាំងអស់ ដោយចាំតែអូខេ ហើយយកលុយគឺជាការស្រេច ព្រោះសមត្ថកិច្ចត្រួតពិនិត្យទំនិញទាំងនោះ គឺពួកអស់លោកគយនៅតាមបណ្ដាច្រកទ្វារតាមព្រំដែន ជាអ្នកមើលការខុសត្រូវត្រួតពិនិត្យឬមិនត្រួតពិនិត្យរួចហើយ ដូច្នេះក្រុមការងារលោក អួន សុវណ្ណារ៉ា ចាំតែយកលុយប៉ុណ្ណោះ។
ប្រភពពីមន្ត្រីគយនិងភ្នាក់ងារគយបានឲ្យដឹងថា ចាប់តាំងពីលោក អ៊ួន សុវណ្ណារ៉ា ទទួលបានតំណែងជាមេគយចល័តតំបន់១ គឺលោកតែងតែឃុបឃិតឲ្យឈ្មួញធំៗ បង់ពន្ធតាមរបៀបម៉ៅការហើយឈ្មួញទាំងនោះអាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗគ្រប់បណ្ដាខេត្តនានាចូលក្នុងទីក្រុងភ្នំពេញ។ អ្វីដែលសំខាន់ជាងគេនៅពេលនេះ គឺទំនិញសាច់បង្កករាប់រយតោនកំពុងសម្រុកចូលដែលលោកគយតំបន់១ចង់ទៅយកលុយស្រួលៗ ហើយពេលខ្លះក្លាយទៅជាទំនាស់នៅក្នុង ចំណោមពួកគយ ពេលដែលសមត្ថកិច្ចផ្សេងចុះចាប់ទំនិញសាច់បង្កកទាំងនោះ។
ឈ្មួញដឹកជញ្ជូនទំនិញពីពប្រទេសវៀតណាមឆ្លងកាត់ច្រកទ្វារអន្តរជាតិព្រំដែនត្រពាំងផ្លុង,ច្រកទ្វារអន្តរជាតិព្រំដែនមុឺនជ័យ ពិសេសមកពីច្រកទ្វារអន្តរជាតិព្រំដែនបាវិត តាមបណ្តោយផ្លូវជាតិលេខ១ ព្រមទាំងច្រកផ្សេងៗទៀតមានរថយន្តធំៗដឹកទំនិញពីគ្រប់បណ្ដាខេត្ត ចូលមកទីក្រុងភ្នំពេញ ក្នុងថ្ងៃៗមិនក្រោមពី៣០០ ទៅ៥០០ គ្រឿងនោះទេ ហើយរថយន្តដឹកទំនិញទាំងនោះត្រូវបង់ឲ្យ មេគយចល័តតំបន់១ក្នុងរថយន្តនីមួយៗបង់ចន្លោះពី២០០ដុល្លារទៅ៥០០ដុល្លារឲ្យទៅមេគយចល័ត ទើបចូលទីក្រុងភ្នំពេញបានដោយសុវត្ថិភាព ។ រីឯទំនិញសាច់បង្កកត្រូវនិយាយតម្លៃផ្សេង ដោយមិនគិតអំពីចំនួនជើងឬចំនួនរថយន្តនាំចូលនោះទេ។
ប្រភពពីមន្ត្រីគយចល័តតំបន់មួយឲ្យដឹងថា ចាប់តាំងពីលោក អ៊ួន សុវណ្ណារ៉ា ត្រូវបានតែងតាំងជាប្រធានគយចល័តតំបន់មួយ រួចមកគឺមន្ត្រីគយរូបនេះប្រើតួនាទីនិងអំណាចប្រព្រឹត្តអំពើពុករលួយយ៉ាងពេញបន្ទុកដោយគ្មានញញើតអ្វីទាំងអស់ ។ គេថាដោយសារលោក អ៊ួន សុវណ្ណារ៉ា ចំណាយដើមទុនយ៉ាងច្រើនក្នុងការទទួលបានតំណែងជាប្រធានគយចល័តតតំបន់១ ទើបប្រើគ្រប់វិធីដើម្បីប្រមូលលុយតាមរបៀបពុករលួយស្រេចតែអំពើចិត្តរបស់ខ្លួន។ ហេតុនេះហើយទើបឈ្មួញធំៗជាច្រើនអាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមតាមបណ្ដាលខេត្តចូលមកទីក្រុងភ្នំពេញ កាន់តែច្រើនឡើងៗហើយលោក អួន សុវណ្ណារ៉ា តែងប្រើឈ្មោះមន្ត្រីគយធំៗនៅក្នុងអគ្គនាយកដ្ឋានគយនិងរដ្ឋាករកម្ពុជាដើម្បីបិទបាំងទង្វើរបស់ខ្លួនផងដែរ៕សហការី