(បាត់ដំបង) ៖ ករណីគ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង១១និង៣០នាទីថ្ងៃត្រង់ ថ្ងៃទី ២៧ មិថុនា នៅលើផ្លូវជាតិលេខ៥ចំណុចភូមិកកោះ ឃុំកកោះ ស្រុកមោងឬស្សី ។
តាមប្រភពពីលោក
នាយប៉ុស្ដិ៍រដ្ឋបាល ឃុំកកោះ លោក គិត សារ៉ង បានប្រាប់ថា៖ ឧប្បតិ្តហេតុគ្រោះថ្នាក់ចរាចរណ៏រវាងរថយន្តបុកជាមួយរថយន្តខាងលើនេះ បានធ្វើឲ្យមនុស្សចំនួន០៦នាក់គ្រោះថ្នាក់ ក្នុងនោះមានកុមារាអាយុប្រហែល០២ឆ្នាំម្នាក់បានស្លាប់។
លោកមេប៉ុស្ដិ៍បានបន្តរថា រថយន្តម្ខាងប្រភេទដឹកទំនិញ រីឯរថយន្តម្ខាងទៀតរបស់ក្រុមហ៊ុនដឹកអ្នកដំណើរ ។ រថយន្តទាំង០២នាក់ បានធ្វើដំណើរក្នុងគោលដៅផ្ទុយគ្នា ពីកើតទៅលិច លុះមកដល់ចំណុចខាងលើក៏បុកគ្នាពេញទំហឹងតែម្តង។
លោក គិត សារ៉ង បានបញ្ជាក់ថា បើតាមការពិនិត្យជាក់ស្ដែងទៅលើស្លាកស្នាម គេសន្និដ្ឋានថា រថយន្តដឹកទំនិញដែលធ្វើដំណើរមកពីទិសខាងកើតបានរេចង្កូតជ្រុលទៅបុករថយន្តដឹកអ្នកដំណើរដែលធ្វើដំណើរច្រាស់ទិសគ្នាមកពីទិសខាងលិច។ លោកថា អ្នកដំណើរជិះរថយន្តក្រុង បានរងរបួសចំនួន០៤នាក់ និងស្លា.ប់កុមារាម្នាក់អាយុប្រហែល០២ឆ្នាំ ។ រីឯព្រូរថយន្តដឹកទំនិញម្នាក់រងរបួសធ្ងន់ ខណៈអ្នកបើកបររថយន្តនេះ ដាក់មេប្រូចក្រោយបង្កគ្រោះថ្នាក់។
របាយការណ៍សមត្ថកិច្ចបានឲ្យដឹងដែរថា រថយន្តដឹកទំនិញ(រថយន្តបង្ក) ម៉ាកហ៊ីយាន់ដាយ ពាក់ស្លាកលេខបាត់ដំបង 3A-2079 អ្នកបើកបរបានរត់ចោលរថយន្ត។ ដោយឡែក រថយន្តក្រុមហ៊ុនដឹកអ្នកដំណើរ ពាក់ស្លាកលេខ ភ្នំពេញ 3D-3838 អ្នកបើកបរឈ្មោះ យ៉ន គ្រើន អាយុ៣៦ឆ្នាំ។
សមត្ថកិច្ចបានប្រាប់ថា កំណាត់ផ្លូវដែលគ្រោះថ្នាក់នោះ គឺខណៈដែលក្រុមហ៊ុនកំពុងសាងសង់នៅឡើយ ដែលអាចធ្វើដំណើរបានតែម្ខាងបុណ្ណោះ។ បើពិនិត្យលើស្ថានភាព នៃគ្រោះថ្នាក់នេះ អាចបណ្ដាលមកពីភាគីរថយន្តដឹកទំនិញបើកលឿន ហើយទំនងអាចងងុយដេកមួយភាំងផង ទើបជ្រុលទៅបុករថយន្តដឹកអ្នកដំណើរទាំងកំរោល បណ្ដាលឲ្យគ្រោះថ្នាក់ធ្ងន់ធ្ងរបែបនេះ។
អ្នករងគ្រោះមួយចំនួនកៀបជាប់ក្នុងរថយន្ត ជាពិសេស ព្រូរថយន្តដឹកទំនិញតែម្ដង។ ពេលនេះមន្ត្រីចរាចរណ៍បានធ្វើការវាស់វែង និង នាំយកទៅកាន់ការិយាល័យចរាចរណ៏ ដើម្បីដោះស្រាយតាមច្បាប់ហើយ៕សហការី