(ភ្នំពេញ) ៖ ឯកឧត្តម ហ៊ុន ម៉ាណែត បញ្ជាក់ថា ក្រៅពីការវិនិយោគសាធារណៈ ការកសាង និងអភិវឌ្ឍន៍ប្រទេសមកដល់បច្ចុប្បន្ន គឺមានការចូលរួមមួយផ្នែកធំពីវិស័យឯកជន ដែលជាក្បាលម៉ាស៊ីន នៃការរីកចម្រើនរបស់ជាតិ។
ក្នុងពិធីសម្ពោធគម្រោងថ្មីនៃបុរីមេគង្គលែន ខណ្ឌជ្រោយចង្វារ រាជធានីភ្នំពេញថ្មីៗនេះ ឯកឧត្តម ហ៊ុន ម៉ាណែត បានបញ្ជាក់ទៀតថា ការលើកទឹកចិត្តឱ្យវិស័យឯកជនរីកចម្រើន នឹងផ្តល់លទ្ធភាពឱ្យគាត់ចែករំលែកការរីកចម្រើនទៅគ្រប់មជ្ឈដ្ឋាន ក៏ដូចជាការធ្វើឱ្យមានការកែប្រែលើកកម្ពស់មុខមាត់ប្រទេសជាតិ តាមរយៈសមិទ្ធផលធំៗ ហេដ្ឋារចនាសម្ព័ន្ធរូបវ័ន្តនានា ដែលសម្រេចបាននៅក្នុងគម្រោងឯកជន។ នេះគឺការនិន្នាការរួមនៃការអភិវឌ្ឍរបស់បណ្តាប្រទេសនានាលើសាកលលោក។
ឯកឧត្តម បានបន្ថែមទៀតថា តាមរយៈការពង្រីកគម្រោងថ្មីនេះក៏បានឆ្លុះបញ្ចាំងឱ្យឃើញផងដែរអំពីស្ថិរភាព, ភាពធន់ និងសក្តានុពលទីផ្សារនៃវិស័យអចលនទ្រព្យ និងសំណង់នៅកម្ពុជា។ ម្យ៉ាងវិញទៀត ក៏អាចត្រូវបានចាត់ទុកបានថា ជាសញ្ញាវិជ្ជមានមួយនៃការចាប់ផ្តើមស្ទុះងើបឡើងវិញនៃវិស័យអចលនទ្រព្យ និងសំណង់ បន្ទាប់ពីទទួលរងផលប៉ះពាល់ពីការរាតត្បាតសាកលនៃជំងឺកូវីដ-១៩ ក្នុងរយៈពេលជិត០២ ឆ្នាំកន្លងមកនេះ និងស្របពេលដែលប្រទេសយើងកំពុងត្រូវបានបើកដំណើរការពេញលេញឡើងវិញ លើគ្រប់វិស័យ ហើយដំណើរការស្តារឡើងវិញក៏កំពុងមានសន្ទុះទៅមុខយ៉ាងល្អ។
ឯកឧត្តម ហ៊ុន ម៉ាណែត បានបន្ថែមថា អ្វីដែលពិសេស គឺការអភិឌ្ឍទាំងនេះ កើតឡើងពីការចូលរួមរបស់សហគ្រិនក្នុងស្រុក៖ “ខ្មែរអាចធ្វើបាន” តាមរយៈការវិនិយោគកសាងដោយខ្មែរ សម្រាប់ប្រជាជនខ្មែរ ដើម្បីសុខសុភមង្គលប្រជាជនខ្មែរ រួមបង្កើតបានជាមោទនភាពនៃការរីកចម្រើនរបស់ជាតិ។
ឯកឧត្តម បានសង្កត់ធ្ងន់ថា ក្នុងឆ្នាំ២០២០ សេដ្ឋកិច្ចមានកំណើនអវិជ្ជមាន ដោយសារការរាតត្បាតនៃជំងឺកូវីដ-១៩ ហើយវិស័យអចលនទ្រព្យក៏មានការប៉ះពាល់ខ្លះ ប៉ុន្តែអាចរក្សាលំនឹងបាន និងមិនថយក្រោយ ហើយថែមទាំងបានជួយទប់ស្កាត់ផលប៉ះពាល់លើសេដ្ឋកិច្ចជាតិផងដែរ តាមរយៈការធានាបាននូវការផ្តល់ការងារសម្រាប់ប្រជាពលរដ្ឋក្នុងដំណាក់កាលវិបត្តិនេះ។ លំនឹងនេះ ក៏បានបង្ហាញអំពីលទ្ធភាពរឹងមាំ និងស្ថិរភាពនៃជីវភាពរបស់ប្រជាពលរដ្ឋភាគច្រើនដែលបានទិញ និងវិនិយោគអចនទ្រព្យ ក្រោមបរិយាកាសសុខសន្តិភាព ស្ថិរភាពនយោបាយ និងម៉ាក្រូសេដ្ឋកិច្ច ក្នុងរយៈកាលកន្លងមកនេះ៕