(បាត់ដំបង) បេីយោងតាមប្រភពព័ត៌មានពីរបាយការណ៍របស់អគ្គស្នងការនគរបាលជាតិ បានឱ្យដឹងនៅព្រឹកថ្ងៃអាទិត្យទី០៤ ខែកញ្ញា ឆ្នាំ២០២២នេះថា៖ បុរសម្នាក់ ត្រូវរន្ទះបាញ់ស្លាប់ ខណៈទៅមើលគេភ្ជួរដីស្រែពេលមេឃស្រទុំ កាលពីរសៀលថ្ងៃទី០៣ ខែកញ្ញាម្សិលមិញនេះ ត្រង់ចំណុចវាលស្រែខាងកើតស្វាយជួរ ស្ថិតនៅភូមិចកតូច ឃុំកកោះ ស្រុកមោងឫស្សី ខេត្តបាត់ដំបង ។
របាយការណ៍ដដែលបន្តថា ជនរងគ្រោះឈ្មោះ ធិញ ធឿត ភេទប្រុស អាយុ៥៦ឆ្នាំ រស់នៅភូមិចកតូច ឃុំកកោះ ស្រុកមោងឬស្សី ខេត្តបាត់ដំបង ត្រូវបានរន្ទះបាញ់ស្លាប់ខណៈពេលដែលគាត់កំពុងទៅមើលគេភ្ជួរដីស្រែនៅចំណុចកើតហេតុខាងលើ ។
ប្រភពដដែលបន្តថា ក្រោយពីទទួលបានពត៌មាន កម្លាំងនគរបាលផ្នែកជំនាញសហការជាមួយលោកគ្រូពេទ្យជំនាញ បានចុះត្រួតពិនិត្យនិងវិភាគទីកន្លែងកើតហេតុខាងលេី ដោយសន្ឋិដ្ឋានថាជនរងគ្រោះឈ្មោះ ធិញ ធឿត ពិតជាត្រូវរន្ទះបាញ់ស្លាប់ពិតប្រាកដមែន ។
បច្ចុប្បន្ន សាកសពជនរងគ្រោះត្រូវបានប្រគល់ជូនទៅឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕
