(សៀមរាប) ៖ ពិតជាមានការភ្ញាក់ផ្អើលមួយ ក្រោយពីតំណាងរបស់គណបក្សលោក ខឹម វាសនា បានដាក់ពាក្យសុំអាជ្ញាធរឱ្យជួយអន្តរាគមន៍ បណ្តេញពលរដ្ឋដែលមានៈមិនព្រមចាកចេញពីចម្ការរបស់ខ្លួន។យោងតាមលិខិតមួយច្បាប់ដាក់ជូន អភិបាលខេត្តសៀមរាប បុរសមួយរូបឈ្មោះ នី ចាន់ពិនិត្យ ដែលជាតំណាងរបស់គណបក្សសម្ព័ន្ធដើម្បីប្រជាធិតេយ្យបានសុំឯកឧត្តម ទៀ សីហា អភិបាលនៃគណៈអភិបាលខេត្តសៀមរាប «ជួយអន្តរាគមន៍ និងចាត់វិធានការចំពោះប្រជាពលរដ្ឋ ដែលបានចូលមកស្នាក់នៅក្នុងដីចម្ការ» របស់លោក ខឹម វាសនា ស្ថិតនៅភូមិថ្ម ជល់ ឃុំត្បែង ស្រុកបន្ទាយស្រី ខេត្តសៀមរាប ហើយពលរដ្ឋទាំងនោះ «មិនព្រមវិលត្រឡប់ទៅផ្ទះវិញ»។
បុរស ឈ្មោះ នី ចាន់ពិនិត្យ ដែលបញ្ជាក់ក្នុងលិខិតចុះថ្ងៃទី ៦ កញ្ញា ម្សិលមិញថា រូបលោកគឺជាតំណាងគណបក្សសម្ព័ន្ធដើម្បីប្រជាធិបតេយ្យ និងជាម្ចាស់ដីស្ថិតនៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប ព្រះរាជាណាចក្រកម្ពុជា ជាតិ សាសនា ព្រះមហាក្សត យោង ឯកឧត្តម អភិបាលនៃគណៈអភិបាលខេត្តសៀមរាប កម្មវត្ថុសំណើសុំជួយអន្តរាគមន៍ និងចាត់វិធានការចំពោះប្រជាពលរដ្ឋ ដែលបានចូលមក ស្នាក់នៅក្នុងដីចម្ការរបស់ខ្ញុំបាទ ហើយមិនព្រមវិលត្រឡប់ទៅផ្ទះវិញ ស្ថិតនៅភូមិថ្ម ជល់ ឃុំត្បែង ស្រុកបន្ទាយស្រី ខេត្តសៀមរាប។
លិខិតរបស់បុរសឈ្មោះ នី ចាន់ពិនិត្យ ដដែលបានបញ្ជាក់ថា រូបខ្លួន និងតំណាងគណបក្សជួង ហើយរូបលោកនិងមនុស្ស៥នាក់ផ្សេងទៀត ធ្លាប់បានកិច្ចសន្យា ចុះថ្ងៃទី៣១ ខែសីហា ឆ្នាំ២០២២ បានជម្រាបជូនអាជ្ញាធរខេត្តសៀមរាបថា គណបក្សសម្ព័ន្ធដើម្បីប្រជាធិបតេយ្យ បានប្រារព្ធកម្មវិធីជួបជុំសមាជិកគណបក្ស ស្ថិតនៅបរិវេណចម្ការ នៅភូមិថ្មជល់ ឃុំត្បែង ស្រុក បន្ទាយស្រី ខេត្តសៀមរាប។
ជាមួយគ្នានេះ ខ្ញុំបាទបានធ្វើកិច្ចសន្យាថា ប្រកាសផ្សព្វផ្សាយឱ្យប្រជា ពលរដ្ឋដែលបានស្នាក់នៅក្នុងចម្ការដីរបស់ខ្ញុំទាំង ០២ទីតាំងចាកចេញត្រឡប់ទៅផ្ទះវិញរៀងៗ ក្នុង រយៈពេល ០៥ថ្ងៃ គិតចាប់ពីថ្ងៃទី០១ ខែកញ្ញា រហូតដល់ថ្ងៃទី០៥ ខែកញ្ញា ឆ្នាំ២០២២ ត្រឹមវេលាម៉ោង ១៧ និង៣០នាទី ប៉ុន្តែរហូតមកដល់ពេលនេះមានប្រជាពលរដ្ឋមួយចំនួនក្រៅពីក្រុមការងារគណបក្ស ពុំព្រមចាកចេញពីដីចម្ការខ្ញុំនៅឡើយ។
បុរស ឈ្មោះ នី ចាន់ពិនិត្យ បានសរសេរក្នុងលិខិតដដែលនោះថា «ក្នុងន័យនេះ ខ្ញុំបាទសូមគោរពស្នើសុំ ឯកឧត្តម អភិបាល នៃគណៈអភិបាលខេត្តសៀមរាប មេត្តាជួយអន្តរាគមន៍ ឬចំណាត់ការផ្លូវច្បាប់ឱ្យពួកគាត់ចាក ចេញពីរដីចម្ការខ្ញុំបាទទាំង ០២ទីតាំង។ អាស្រ័យដូចបានគោរពជម្រាបជូនខាងលើ សូម ឯកឧត្តម អភិបាល មេត្តាជួយ អន្តរាគមន៍ និងចាត់វិធានការ ដោយសេចក្ដីអនុគ្រោះ។ សូម ឯកឧត្តម អភិបាល មេត្តាទទួលនូវការរាប់អានដ៏ស្មោះអំពីខ្ញុំ»។
សូមរម្លឹកថា គិតត្រឹមព្រឹកថ្ងៃទី ៧ ខែកញ្ញានេះ ពលរដ្ឋនិងសកម្មជន LDP ជិត២០០០ នាក់ ស្ម័គ្រចិត្ត បន្តរស់នៅក្នុងជំរុំ ដីចម្ការម្រេច របស់ លោកខឹម វាសនា ប្រធានគណបក្ស LDP ទោះបីហួសថ្ងៃទី ៥ កញ្ញា ដែលជាថ្ងៃឱសាន វាទរបស់អាជ្ញាធរខេត្តយ៉ាងណាក៏ដោយ។ តាមប្រភពពីសមត្ថកិច្ចបានប្រាប់នៅយប់ថ្ងៃទី៦ ខែកញ្ញា នេះថា គិតត្រឹមល្ងាចថ្ងៃទី ៦ខែកញ្ញានេះសមត្ថកិច្ចបានធ្វើការស្រង់ស្ថិតិយ៉ាងល្អិតល្អន់ឃើញថា សកម្មជន LDP ជិត២០០០នាក់ កំពុងបន្តក្រាញននៀលស្ម័គ្រចិត្តរស់នៅក្នុងដីចម្ការម្រេចរបស់លោកខឹម វាសនា ដោយមិនព្រមចាកចេញទៅស្រុកកំណើតនោះទេ។
សមត្ថកិច្ច បានបន្ថែមថា ប្រជាពលរដ្ឋ និង សកម្មជន LDP ដែលសមត្ថកិច្ចបានធ្វើការស្រង់ស្ថិតិ រួចហើយនោះគឺ មានចំនួន៣៣៥ គ្រួសារស្មើ នឹង ១,៧ ៣៧ នាក់ ស្រី៧៩៥ នាក់,អនីតិជនចំនួន ៤០០ នាក់,នីតិជនចំនួន១៣៣៧ នាក់។ប្រភពពីសមត្ថកិច្ចបន្ថែមទៀតថា ចំពោះពលរដ្ឋដែលសុំឱ្យសមត្ថកិច្ច ជួយអន្តរាគមន៍មានចំនួន១១៥ ករណី ដើម្បីស្វែងរកបងប្អូនកូនចៅ រកប្តី រកប្រពន្ធ និង រក ឪពុកម្តាយនោះមានចំនួន ២៤០ នាក់,នីតិជនចំនួន ១៤៨ នាក់ និងអនីតិជនចំនួន ៩២ នាក់។
ប្រភពពីសមត្ថកិច្ច បានបញ្ជាក់ថា ពលរដ្ឋដែលកំពុងស្នាក់នៅក្នុងដីចំការរបស់ លោក ខឹម វាសនា ចំនួនជាង ១០០០នាក់ដែលសមត្ថកិច្ច បានស្រង់ស្ថិតិ រួចហើយនេះគឺពួកគាត់យល់ព្រមស្នាក់នៅដោយគ្មានការបង្ខិតបង្ខំពី បុគ្គលណានោះទេ។ គឺពួកគាត់ស្ម័គ្រចិត្តរស់នៅដោយខ្លួនឯង។សមត្ថកិច្ចបញ្ជាក់ថា ចំណាត់ការបន្តគឺរង់ចាំបញ្ជាពីថ្នាក់លើ សិនថាត្រូវធ្វើយ៉ាងណាបន្តទៀត។ទោះបីជាយ៉ាងណាសមត្ថកិច្ចនៅតែបន្តការពារពលរដ្ឋដែលកំពុងស្នាក់នៅក្នុងចំការលោកខឹម វាសនា ដដែលហើយចំពោះការដែលត្រូវដកកម្លាំងឱ្យអស់នៅ ពេលណានោះគឺមិនទាន់ដឹងនៅឡើយទេ។រីឯ ដីចម្ការ ២៥ ហិកតា ដែលប្រជាពលរដ្ឋ និង សកម្មជនបក្ស LDP កំពុងស្នាក់នៅរាល់ថ្ងៃនេះ ត្រូវបានសមត្ថកិច្ចបានធ្វើការស្រង់សិ្ថតិ រួចរាល់ហើយដែរ គឺ មានចំនួនជាង១០០នាក់ ក្នុងនោះមាន: ចាស់ ប្រុស ស្រី ក្មេង។
សូមរំលឹកផងដែរថា ការឃោសនារបស់លោក ខឹម វាសនា ថា មានលិចលង់ភព ផែនដី ដោយអះអាងថា មានតែ ដីចំការម្រេចរបស់លោកនៅជិតភ្នំគូលែនទេដែលអាចឱ្យពលរដ្ឋចៀសផុតពីសេចក្តីស្លាប់បាន ធ្វើឱ្យបងប្អូនប្រជាពលរដ្ឋ នៅគ្នា លក់ឡាន ដីធ្លី ម៉ូតូ បានលុយ រាប់លានដុល្លារ យកមកឱ្យខឹម វាសនាទាំងដុំៗ។ ការលើកឡើងរបស់លោក ខឹមវាសនា នៅក្នុងបណ្ដាញសង្គមហ្វេសប៊ុក បែបនេះបានធ្វើឱ្យពលរដ្ឋទាំងក្នុង និងក្រៅប្រទេសនាំគ្នាសម្រុកមករស់នៅក្នុងចំការម្រេចលោកខឹម វាសនា ប្រមាណជាជិត ២ម៉ឺននាក់ ហើយបច្ចុប្បន្ននេះពលរដ្ឋបានយល់ព្រមចាកចេញទៅវិញជិតអស់ហើយ នៅសល់តែជាងមួយពាន់នាក់តែប៉ុណ្ណោះ ដែលនៅក្រាញននាលមិនព្រមចាកចេញ ទៅលំនៅដ្ឋានរបស់ខ្លួនទេ។
សូមបន្ថែមទៀតថា សកម្មភាពរបស់ប្រជាពលរដ្ឋ ដែលចេញពីជំរុំ ដីចម្ការ លោក ខឹម វាសនា នៅ ម៉ោង ៦ ល្ងាច ដល់ ម៉ោង ៦ ព្រឹក ថ្ងៃទី០៧.០៩. ២០២២ នេះ ចេញសរុប ៦៤នាក់ ស្រី២៧ នាក់.ក្មេង៨នាក់សន្តិសុខស្ងប់ស្ងាត់ធម្មតា។
សូមបញ្ជាក់ថា ចំពោះលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ LDP នោះកំពុងលាក់ខ្លួនពួនអាត្មានៅអាស្រម របស់លោកមិនបានចេញមកក្រៅព្រមទាំងមិនឱ្យសមត្ថកិច្ច ឬអាជ្ញាធរចូលជួបបានទេ រហូតមកដល់ព្រឹកថ្ងៃទី៧ ខែកញ្ញា ឆ្នាំ២០២២ នេះ៕សហការី