(បន្ទាយមានជ័យ) ៖សង្ស័យជាក្មេងទំនើងចំនួន៥នាក់ ដែលប្រើប្រាស់ និងរក្សាទុកគ្រឿងញៀ.ន ព្រមទាំងធ្វើសកម្មភាពអុកឡុកអ្នកស្រុក រហូតប្តឹងអោយចាប់ខ្លួននោះ ត្រូវបានបញ្ជូនទៅកាន់តុលាការ នៅថ្ងៃទី១០ ខែតុលា ឆ្នាំ២០២២នេះ។
លោកវរសេនីយ៍ត្រី យ៉ាន់ សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណ បានប្រាប់ថា ជនសង្ស័យទាំង៥នាក់ខាងលើ រួមមាន ៖ ១- ឈ្មោះ សុខ សុគឿន ភេទប្រុស អាយុ២៨ឆ្នាំ ២- ឈ្មោះ វិត ដារ៉ា ភេទប្រុស អាយុ១៨ឆ្នាំ ៣- ឈ្មោះ ហៃ ខាវ ភេទប្រុស អាយុ១៧ឆ្នាំ ៤- ឈ្មោះ យឿង ណេត ភេទប្រុស អាយុ២៤ឆ្នាំ និង៥-ឈ្មោះ ចិន្តា សុខ ភេទប្រុស អាយុ១៧ឆ្នាំ ជនសង្ស័យទាំង៥នាក់ស្នាក់នៅភូមិបានណយ សង្កាត់ទឹកផ្លា ក្រុងសិរីសោភ័ណ។
លោកបានបញ្ជាក់ថា នៅពេលឃាត់ខ្លួនជនសង្ស័យ កម្លាំងកងរាជអាវុធហត្ថក្រុងបានទទួលព័ត៌មានពីអាជ្ញាធរមូលដ្ឋានថា មានក្មេងទំនើង១ក្រុមបានប្រើប្រាស់គ្រឿងញៀ.ន ហើយស្រែកឡូឡារំខានដល់អ្នកស្រុកក្បែរខាង។ បន្ទាប់ពីទទួលព័ត៌មានភ្លាម កម្លាំងជំនាញបានចុះស្រាវជ្រាវ និងកំណត់មុខសញ្ញា រួចឃាត់ខ្លួនជនសង្ស័យចំនួន៥នាក់ រួមនឹងវត្ថុតាងគ្រឿងញៀ.ន ដាវសាំម៉ូរ៉ៃ និងម៉ូតូ២គ្រឿងដែលជាមធ្យោបាយចែកចាយគ្រឿងញៀ.នផងដែរ ដែលការឃាត់ខ្លួននេះធ្វើឡើងកាលពីថ្ងៃទី០៨ ខែតុលា ឆ្នាំ២០២២ នៅចំណុចភូមិ២ សង្កាត់កំពង់ស្វាយ ក្រុងសិរីសោភ័ណ។
លោកវរសេនីយ៍ត្រី យ៉ាន់ សុវណ្ណ បានបញ្ជាក់ថា ក្រោយពេលឃាត់ខ្លួនជនសង្ស័យទាំង៥នាក់ខាងលើ សមត្ថកិច្ចបាននាំយកមកសាកសួរ និងធ្វើតេស្តមានសារធាតុញៀ.ន ហើយក៏ត្រូវបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ផងដែរ៕សហការី