(ព្រៃវែង) : ផ្ទះក្បឿងមួយខ្នង ខាងក្រោមថ្មខាងលើឈើ ទំហំ៩ម៉ែត្រគុណ៨ម៉ែត្រ ត្រូវបានព្រះអគ្គិលេបត្របាក់អស់ទាំងស្រុងនៅសល់តែគ្រោងឆ្អឹង ដោយសារតែទុស្សេខ្សែភ្លើង។ ហេតុការណ៍នេះ បានកើតឡើងកាលពីវេលាម៉ោង៨និង៣០នាទីព្រឹក ថ្ងៃទី១៧ ខែតុលា ឆ្នាំ២០២២នៅចំណុចភូមិស្គាក្ដី ឃុំព្នៅទី២ ស្រុកស៊ីធរកណ្តាល ខេត្តព្រៃវែង ។
ម្ចាស់ផ្ទះដែលត្រូវភ្លើងឆេះខាងលើនេះ មានឈ្មោះ ឈឿន វិចិត្រ ភេទប្រុស អាយុ៤០ឆ្នាំ និងមានប្រពន្ធឈ្មោះ ស៊ាន សុផល អាយុ៤១ឆ្នាំ។
យោងតាមរបាយការណ៍របស់មន្ត្រីអនុសាខាកាកបាទក្រហមស្រុកស៊ីធរកណ្តាល បានអោយដឹងថា មុនពេលកើតហេតុ ម្ចាស់ផ្ទះទាំងពីរនាក់ប្ដីប្រពន្ធបានទៅស្រែ ដោយទុកអោយកូនស្រីឈ្មោះ វិចិត្រ រក្សា អាយុ១៧ឆ្នាំ នៅចាំផ្ទះ តែមិនដឹងថា តើកូនស្រីរវល់ធ្វើអ្វី? បែរជាបណ្តោយអោយមានភ្លើងឆាបឆេះផ្ទះ រហូតអស់ទាំងស្រុងបែបនេះ។
ដោយឡែកខាងសមត្ថកិច្ចវិញ បានអោយដឹងថា អគ្គិភ័យនេះ បានឆាបឆេះឡើងដោយសារមូលហេតុទុស្សេខ្សែភ្លើង ហើយទ្រព្យសម្បត្តិដែលខូចខាតទាំងអស់រួមមាន ៖ ម៉ាស៊ីនកិនស្រូវ១គ្រឿង, ជីគីមី៧០បេ, កង់១គ្រឿង, ប្រេងម៉ាស៊ូត២១កាន, ប្រេងសាំង១កាន, ក្បាលខ្យល់បូមទឹក១គ្រឿង, ទូទឹកកក១គ្រឿង, បេច្រកស្រូវ៥០ដុំ, ទូរស័ព្ទ១គ្រឿង, ម៉ាស៊ីន POS វេរលុយ Amk និងសម្ភារៈមួយចំនួនទៀត ដែលសរុបជាទឹកប្រាក់ចំនួន ១៥.០០០.០០០ រៀល និង ៣០០០ ដុល្លារ៕សហការី