(ភ្នំពេញ) ៖ បុរសម្នាក់ដោយមានការអះអាងថាជាមន្ត្រីបម្រើ ការងារ នៅសាលាឃុំមួយក្នុងស្រុកថ្ពង ខេត្តកំពងស្ពឺ ត្រូវបានកម្លាំងសមត្តកិច្ចកងរាជអាវុធហត្ថចាប់បញ្ជូនទៅសាលាដំបូងរាជធានីភ្នំពេញ កាលពីរសៀលថ្ងៃទី១៣ ខែឧសភា ឆ្នាំ២០២៣ ពាក់ព័ន្ធពីបទរំលោភលើទំនុកចិត្តដែលមានទឹកប្រាក់ប្រមាណជាង ២០ម៉ឺនដុល្លារអាមេរិក ។
បុរសនោះឈ្មោះ ថា ប៊ុនថន អាយុ២៨ ឆ្នាំ មុខរបរ ជានិស្សិត មានទីលំនៅភូមិរាមកណ្តាល ឃុំវាលពន់ ស្រុកថ្ពង ខេត្តកំពង់ស្ពឺ ។ អង្គហេតុពីការឃាត់ខ្លួនបុរសនោះត្រូវបានគេដឹងថា គឺជាការធ្វើឡើងតាមពាក្យបណ្តឹងរបស់អាជីវករម្នាក់ ប្តឹងចោទប្រកាន់ឈ្មោះ ថា ប៊ុនថន ដែលជាមនុស្សរាប់អានគ្នា កាលពីអំឡុងខែមករា ឆ្នាំ២០២២ បានទៅខ្ចីប្រាក់ពីដើមបណ្តឹងថា យកទៅធ្វើដើមទុនពង្រីកមុខរបររកស៊ី ដំបូងខ្ចីត្រឹម ៥.៥០០ ដុល្លារអាមេរិកប៉ុណ្ណោះទេ ហើយក៏សងវិញគ្រប់ចំនួន ។
ក្រោយ មកទៀតជនសង្ស័យ ចេះតែទៅទទូចខ្ចីប្រាក់ពីដើមបណ្តឹងជាបន្ត បន្ទាប់ ម្តង ១០ ០០០ ម្តង ២០ ០០០ ដុល្លារ មានពេលខ្លះខ្ទង់ ពាន់ដុល្លារ ខ្ចីចំនួន១០ លើក សរុបទាំងអស់ ២០៥.២១៦ អាមេរិក ។ បានជាដើមបណ្តឹងចេះតែឲ្យខ្ចីតាមតម្រូវការនោះ ដោយទុកចិត្ត ជនសង្ស័យជាមន្ត្រីបម្រើការងារនៅសាលាឃុំ ហើយក៏ជាមនុស្សរាប់អានគ្នាជិតស្និតទៀតផង ដែលមិនអាចក្បត់កិច្ចសន្យានោះទេ ទីបំផុតបានត្រឹមចម្លើយមកវិញថា “គេនៅតែសងដោយមិនគេចវេសពីបំណុលនោះឡើយ” ។
ប៉ុន្តែការសន្យាដោយបានទុកពេលជាច្រើនលើក ទំនងមិនអាចជឿទុកចិត្តបាន ទើបដើមបណ្តឹងសម្រេចចិត្តប្តឹងសមត្ថកិច្ច ឲ្យចាត់ការលើបុគ្គលរូបនោះតាមផ្លូវច្បាប់ ។ ជនសង្ស័យកំពុងស្ថិតនៅក្នុងដំណាក់កាលតំណាងអយ្យការបើកការស៊ើបសួរនៅឡើយ ៕សហការី
