(ភ្នំពេញ) ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅម៉ោង០៨និង១៦នាទីយប់ថ្ងៃទី២២ ខែមិថុនា ឆ្នាំ២០២៣នេះ បានបដិសេធទាក់ទងទៅនឹងការបង្ហោះវីដេអូ ចែកចាយតាមបណ្ដាញសង្គម ថា មានករណីសមត្ថកិច្ចវាយបំបែកកញ្ចក់រថយន្ត១គ្រឿង ម៉ាកព្រុស Prius នោះ គឺជាការផ្សព្វផ្សាយព័ត៌មានមិនពិត ក្នុងគោលបំណងអាក្រក់ ទម្លាក់កំហុសមកលើមន្ត្រីអនុវត្តច្បាប់ ។
ក្រុមការងារព័ត៌មាន និងប្រតិកម្មរហ័ស បានបកស្រាយបំភ្លឺថា តាមការពិត ជាក់ស្ដែងនៅវេលាម៉ោង០២និង៤០នាទីរសៀលថ្ងៃទី ២២ ខែមិថុនា ឆ្នាំ២០២៣ មានរថយន្តមួយគ្រឿងម៉ាក Toyota Prius ពណ៌ប្រផេះ ពាក់ស្លាកលេខ 2BT-0591 បានបើកបរល្មើសភ្លើងសញ្ញាចរាចរណ៍ (ល្មើសភ្លើងស្តុបក្រហម) នៅចំណុចស្តុបស្ពានអាកាសផ្សារដីហុយ ពេលនោះ សមត្ថកិច្ច បានចេញមកឃាត់ តែអ្នកបើកបរមិនត្រឹមតែមិនព្រមឈប់ទេ ថែមទាំងបន្ថែមល្បឿន បើកបុកសមត្ថកិច្ច ថែមទៀតផង ដោយឃើញស្ថានភាពបែបនេះសមត្ថកិច្ច បានផ្តេកខ្លួនទៅក្បាលរថយន្ត ឃើញដូច្នេះ អ្នកបើកបររថយន្តមិនព្រមឈប់ នៅតែបើកបរទៅមុខរហូត ដល់ចម្ងាយជាង ១គីឡូ ។ ដោយមានការចេញជួយឃាត់ពីប្រជាពលរដ្ឋនៅម្ដុំនោះ ទើបរថយន្តបង្ក ព្រមឈប់ ជាសំណាងល្អ ដែលមិនបណ្ដាលឲ្យមានគ្រោះថ្នាក់ដល់សមត្ថកិច្ច ត្រឹមតែ រងរបួស តែប៉ុណ្ណោះ ។
ពេលនេះ សមត្ថកិច្ចជំនាញ កំពុងឃាត់ម្ចាស់រថយន្ត នាំខ្លួនយកមកការិយាល័យចរាចរណ៍ផ្លូវគោក ដើម្បីធ្វើការសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តបន្តតាមនីតិវិធីច្បាប់ ។
ចំណែកឯ ភាគីម្ចាស់រថយន្តម៉ាកព្រុស បានរៀបរាប់ប្រាប់អ្នកសារព័ត៌មាន ដែលផ្សាយផ្ទាល់ យ៉ាងដូច្នេះថា ៖ លោកបានធ្វើដំណើរពីព្រលានយន្តហោះ ឆ្ពោះទៅផ្សារដីហុយ តាមបណ្ដោយផ្លូវសហព័ន្ធរុស្ស៊ី ក្នុងទិសដៅ ពីលិចទៅកើត លុះមកដល់ចំណុចស្តុបក្រោមស្ពានអាកាសផ្សារដីហុយ លោកក៏បានបត់ឆ្វេង ដោយមិនបានមើលភ្លើងស្តុបក្រហម ក៏ត្រូវនគរបាលចរាចរណ៍ចេញមកឃាត់។ នៅពេលឃាត់នោះ ម្ចាស់រថយន្ត សួរថា តើខ្ញុំខុសអ្វី ? ហើយមន្ត្រីនគរបាល ប្រាប់និងធ្វើជាសញ្ញាថា ឲ្យចូលសិនៗ(អែបកៀន) ប៉ុន្តែលោកមិនបានចូលកៀនទេ ក៏បានបើកបរទៅមុខទៀត ពេលនោះ មានមន្ត្រីនគរបាលម្នាក់ បានហក់ឡើងតោងលើក្បាលរថយន្ត តែម្តង ។
សម្តីរបស់ម្ចាស់រថយន្ត ប្រាប់បន្តថា នៅពេលដែលសមត្ថកិច្ចហក់ឡើងតោងលើក្បាលរថយន្តនោះ លោកបានបើកបន្តដំណើរទៅមុខ លុះបានប្រមាណជាង២០០ម៉ែត្រ ទើបមានកម្លាំងសមត្ថកិច្ច ជិះម៉ូតូ០២គ្រឿង (១គ្រឿងមានស៊ីរ៉ែន) ប្រដេញតាមមកដល់ ក៏ឈប់ម៉ូតូស៊ីរ៉ែន បាំងមុខរថយន្ត។ ហើយមន្ត្រីនគរបាល ដែលជិះម៉ូតូ១គ្រឿងទៀត ចុះមកដកវិទ្យុទាក់ទង ID មកវាយយកៗ បណ្ដាលអោយបែកកញ្ចក់រថយន្ត តែម្តង៕សហការី
