(កំពង់ធំ) ៖ ក្រុមជនសង្ស័យ ដែលតែងតែធ្វើសកម្មភាពឆក់កាបូប និងលួចទ្រព្យសម្បត្តិរបស់ប្រជាពលរដ្ឋ នៅចំណុចមុខផ្សារត្រពាំងវែង បណ្តាលឲ្យនារីម្នាក់ ធ្លាក់ពីលើម៉ូតូបោកក្បាលនឹងថ្នល់ស្លា.ប់ ត្រូវសមត្ថកិច្ច ស្រាវជ្រាវឃាត់ខ្លួនបានម្នាក់ហើយ កាលពីរសៀលថ្ងៃទី០៦ ខែកក្កដា ឆ្នាំ២០២៣ ។
ជនសង្ស័យបានធ្វើសកម្មភាពឆក់ កាលពីវេលាម៉ោង២១និង០៥នាទីថ្ងៃទី១៣ ខែមិថុនា ឆ្នាំ២០២៣ តាមបណ្ដោយផ្លូវជាតិលេខ ៦A ចំណុចមុខផ្សារត្រពាំងវែង ភូមិពោធិ៍សែនស្នាយ សង្កាត់ស្រយ៉ូវ ក្រុងស្ទឹងសែន ។
លោកវរសេនីយ៍ឯក គឹម សុខមករា អធិការនគរបាលក្រុងស្ទឹងសែន បានប្រាប់អោយដឹងថា បន្ទាប់ពីទទួលបានពត៌មានករណីចោរលួចឆក់ខាងលើនេះ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ម៉ែន លី ស្នងការនគរបាលខេត្ត និងមានការសម្របសម្រួលនីតិវិធីពីឯកឧត្តម ស៊ិន វិរៈ ព្រះរាជអាជ្ញាអមសាលាដំបូងខេត្ត កម្លាំងនគរបាល បានប្រើប្រាស់វិធានការជំនាញ ឈានទៅចាប់ឃាត់ខ្លួនបានជនល្មើសម្នាក់ នៅរាជធានីភ្នំពេញ នឹងកំពុងបន្តស្រាវជ្រាវចាប់ខ្លួនបក្ខពួកម្នាក់ទៀត ដែលរត់គេចខ្លួន ។
ជនសង្ស័យដែលសមត្ថកិច្ចឃាត់ខ្លួនបានមានឈ្មោះ ពិន ស៊ីថុល ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិទួលវិហារ ឃុំជ្រាប់ ស្រុកសន្ទុក ខេត្តកំពង់ធំ ។
ក្នុងនោះសមត្ថកិច្ចជំនាញ បានដកហូតវត្ថុតាង រួមមាន ៖ ម៉ូតូចំនួន ០១គ្រឿង ម៉ាកហុងដាឌ្រីម ពណ៌ខ្មៅ សេរ៊ីឆ្នាំ២០២២ ពាក់ស្លាកលេខកំពង់ធំ 1S-4055 និងទូរសព្ទដៃចំនួន ០១គ្រឿង ។
លោកវរសេនីយ៍ឯក គឹម សុខមករា បានបញ្ជាក់ថា នៅវេលាកើតហេតុ មានជនសង្ស័យចំនួន២នាក់ ជិះម៉ូតូមួយគ្រឿង បានធ្វើសកម្មភាពឆក់កាបូប ចំណុចមុខផ្សារត្រពាំងវែង បណ្តាលឲ្យមានជនរងគ្រោះចំនួន០៣នាក់ ក្នុងនោះអ្នករួមដំណើរម្នាក់ឈ្មោះ ញ៉េស ណារីដា ភេទស្រី បានស្លា.ប់ ពេលបញ្ជូនទៅមន្ទីពេទ្យកាល់ម៉ែត ។ ករណីខាងលើនេះ មន្ត្រីនគរបាលជំនាញ បានបញ្ជូនជនសង្ស័យ រួមទាំងវត្ថុតាង ទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់ ៕សហការី
