(ភ្នំពេញ) ៖ ទីបំផុត! កម្លាំងសមត្ថកិច្ចជំនាញ នៃគណៈកម្មការគ្រប់គ្រងល្បែងពាណិជ្ជកម្មកម្ពុជា បានចុះសហការជាមួយកម្លាំងនគរបាលនាយកដ្ឋានប្រឆាំងបទល្មើសល្បែង នៃក្រសួងមហាផ្ទៃ បានចុះឆ្មក់ចុះបង្ក្រាបទីតាំងដែលបើកល្បែងស៊ីសងប្រភេទឡូតូ តូចធំដែលមានផ្លាកយីហោ” 8888″ ចំនួន ០២ទីតាំង ស្ថិតនៅក្នុងមូលដ្ឋានខណ្ឌ ៧មករា ដោយបានឃាត់ខ្លួនមនុស្ស ជាង១០នាក់ផងដែរ។ ក្នុងរង្វង់ប្រតិបត្តិការនេះផងដែរដោយមានការដឹកនាំផ្ទាល់ដោយព្រះរាជអាជ្ញារង យស វាសនា នៃអយ្យការអមសាលាដំបូងរាជធានីភ្នំពេញ ។
មន្ត្រីជំនាញបានឱ្យដឹងថា ក្នុងប្រតិបត្តិការនេះបានធ្វើឡើងនៅវេលាម៉ោង ៩ព្រឹកថ្ងៃទី២៥ ខែមករាឆ្នាំ ២០២៤នេះ មានចំនួន២ទីតាំង ជាក់ស្ដែងទីតាំងទី១, ស្ថិតនៅចំណុចទីតាំង តោះជុំគ្នាកាហ្វេ នៅតាមបណ្ដោយផ្លូវលេខ២៤២ សង្កាត់បឹងព្រលិត និងទីតាំងទី២, ស្ថិតនៅទីតាំងយីហោ ឃ្វីន សាឡន មូលដ្ឋានសង្កាត់មនោរម្យ ខណ្ឌ៧មករា រាជធានីភ្នំពេញ។
មន្ត្រីជំនាញ បានឱ្យដឹងទៀតថា នៅពេលដែលកម្លាំងបានចុះចំនួន០២ ទីតាំង ដោយទីតាំងនីមួយៗបានបើកអាជីវកម្មប្រភេទឡូតូតូចធំ យីហោ 8888 ក៏ប៉ុន្តែមន្ត្រីជំនាញមិនបានបញ្ជាក់ឲ្យស៊ីជម្រៅនោះទេថាល្បែងស៊ីសង ប្រភេទនេះមានច្បាប់ឬមិនមានច្បាប់អាជីវកម្មនោះឡើយ។
ក្នុងការចុះប្រតិបត្តិការនេះ មហាជនមានការងឿយឆ្ងល់ផងដែរថា កន្លងមកអាជ្ញាធរបានអះអាងថា ល្បែងស៊ីសងប្រភេទឡូតូតូចធំ 8888 នេះថាមានច្បាប់អាជីវកម្មត្រឹមត្រូវ ដោយមិនមានឃើញមានការចុះបង្ក្រាបនោះឡើយ។ ស្រាប់តែ ពេលនេះ មន្ត្រីជំនាញនៃគណៈកម្មការគ្រប់គ្រងល្បែងពាណិជ្ជកម្មកម្ពុជា សហការជាមួយ កម្លាំងនគរបាលនាយកដ្ឋានប្រឆាំងបទល្មើសល្បែង នៃក្រសួងមហាផ្ទៃ បានចុះមកបង្ក្រាបចំពោះល្បែងស៊ីសងប្រភេទឡូតូ 8888នេះ។
មហាជនបានលើកឡើងបន្តទៀតថា បើល្បែងស៊ីសងប្រភេទឡូតូ 8888នេះខុសច្បាប់មែន។ដូច្នេះ ទីតាំងល្បែងស៊ីសងប្រភេទនេះគឺមានច្រើនទីតាំងរីកដុះដាលពេញទីតាំងហាងកាហ្វេនិងភោជនីយដ្ឋានគ្រប់ទីកន្លែងក្នុងភូមិសាស្ត្ររាជធានីភ្នំពេញ៕សហការី