(សៀមរាប) ៖ ព្រឹកថ្ងៃទី១៥ ខែកុម្ភៈ ឆ្នាំ២០២៤ រដ្ឋបាលខេត្តបានចាប់ផ្ដើមដំណើរការអនុវត្តសាកល្បងរថយន្តក្រុងដឹកជញ្ជូនសាធារណៈដោយឥតគិតថ្លៃដែលគោលដៅចេញពីក្រុងរុនតាឯកតេជោសែនមកក្រុងសៀមរាប និងចេញពីក្រុងសៀមរាបទៅក្រុងរុនតាឯកតេជោសែន ខេត្តសៀមរាប។ ក្នុងថ្ងៃទី១នេះ រថយន្តចំនួន ១០គ្រឿង ក្នុងនោះរថយន្ត ៥គ្រឿង ចេញពីក្រុងរុនតាឯកតេជោសែនមកក្រុងសៀមរាប និងរថយន្ត ៥គ្រឿង ចេញពីក្រុងសៀមរាបទៅក្រុងរុនតាឯកតេជោសែន។
គិតត្រឹមម៉ោង ១២ថ្ងៃត្រង់នេះ ប្រជាពលរដ្ឋបានចូលរួមប្រើប្រាស់រថយន្តក្រុងដឹកជញ្ជូនសាធារណៈ ពេលព្រឹកក្នុងថ្ងៃដំបូងនេះសរុបបានចំនួន ៣៨នាក់ ស្រី ២ នាក់ ក្នុងនោះ រថយន្ត ៥គ្រឿងចេញពីរុនតាឯកមកក្រុងសៀមរាប សរុបចំនួន ១១នាក់ រថយន្ត ៥គ្រឿងចេញពីក្រុងសៀមរាបទៅរុនតាឯក សរុបចំនួន ២៧នាក់ ស្រី ២នាក់។
សូមបញ្ជាក់ថា ពេលវេលាចេញដំណើររថយន្តក្រុងដឹកជញ្ជូនសាធារណៈសួនច្បារហាត់ប្រាណមាត់ស្ទឹង សៀមរាបវេលាម៉ោង០៦:០០នាទីព្រឹករហូតដល់ម៉ោង១៨៖០០នាទីល្ងាច និងចេញពីរុនតាឯកពីម៉ោង០៦:០០នាទីព្រឹករហូតដល់ម៉ោង១៨៖០០នាទីល្ងាច៕