(សៀមរាប) ៖ ថ្ងៃទី១៥ ខែមីនា ឆ្នាំ២០២៤ នៅបន្ទប់លេខ២ សាលាខេត្តបានរៀបចំជួបសម្តែងការគួរសម និងចុះហត្ថលេខាលេីលិខិតផ្តួចផ្តើមស្តីពីកិច្ចសហប្រតិបត្តិការ លើគម្រោង K-City Network រវាងខេត្តសៀមរាប នៃព្រះរាជាណាចក្រកម្ពុជា ដឹកនាំដោយឯកត្តម ប្រាក់ សោភ័ណ អភិបាលនៃគណៈអភិបាលខេត្ត និងក្រុមហ៊ុន BFLABS Inc., VERYWORDS Inc., GreeGo Inc. នៃសាធារណរដ្ឋកូរ៉េ ដឹកនាំដោយលោក Kim Jih Yuk នាយកក្រុមហ៊ុនBFLABS ព្រមទាំងមានការចូលរួមពីលោក យុន លីនណេ អភិបាលរងខេត្ត នាយករងរដ្ឋបាល និងទីចាត់ការពាក់ព័ន្ធផងដែរ។
លោក Kim Jih Yuk នាយកក្រុមហ៊ុនBFLABS បានថ្លែងអំណរគុណយ៉ាងជ្រាលជ្រៅចំពោះឯកឧត្តម អភិបាលខេត្តដែលឆ្លៀតឱកាសដ៏មានតម្លៃអញ្ជេីញជួបសម្តែងការគួរសមនាពេលនេះ។ លោក នាយកក្រុមហ៊ុនបានបន្តថាគោលបំណងជួបនាពេលនេះ ដើម្បីពិភាក្សាក្នុងការអនុវត្តសាកល្បងគម្រោងសេវាកម្ម ទោចក្រយានយន្តអគ្គិសនី ដែលប្រើប្រាស់បច្ចេកវិទ្យាផ្លាស់ប្តូរអាគុយ ដោយមានការគាំទ្រពីក្រសួងដែនដី ហេដ្ឋារចនា សម្ព័ន្ធ និងដឹកជញ្ជូន នៃសាធារណរដ្ឋកូរ៉េ។ គម្រោងនេះ ក៏បានអនុវត្តនៅខេត្តស្វយ័តពិសេស Jeju នៃសាធារណរដ្ឋកូរ៉េ ជាតំបន់ទេសចរណ៍ដែលមានសក្តានុពលដូចជាខេត្តសៀមរាបផងដែរ។
ឯកឧត្តម អភិបាលខេត្ត ក៏បានថ្លែងអំណរគុណដល់ប្រតិភូដែលឆ្លៀតពេលដ៏មានតម្លៃដេីម្បីចូលរួមជួបសម្តែងកាតគួរសម ដេីម្បីពិភាក្សាការងារអំពីសាកល្បងគម្រោងសេវាកម្ម ទោចក្រយានយន្តអគ្គិសនីនេះ។ ឯកឧត្តម ក៏បានឯកភាពគ្នាបង្កើតនូវលិខិតផ្តួចផ្តើមមួយ ក្នុងគោលបំណងដើម្បីអនុវត្តសាកល្បងគម្រោងសេវាកម្ម ទោចក្រយានយន្តអគ្គិសនីនៅខេត្តសៀមរាប ដេីម្បីកាត់បន្ថយនូវការបំពុលបរិស្ថាន៕
