ប្រភពថ្មីៗពីប្រជាពលរដ្ឋរស់នៅ វ៉ើនសៃ និងស្រុកអូរជុំ ខេត្តរតនគិរី បានឲ្យដឹងថា បច្ចុប្បន្នឈ្មួញឈ្មោះ លាង នៅតែជួលឲ្យប្រជាពលរដ្ឋដឹកជញ្ជូនឈើពីស្រុកវ៉ើនសៃ និងពីឃុំកាឡៃ ស្រុកអូរជុំ ចូលទៅក្រុងបានលុង យ៉ាងគគ្រឹកគគ្រេងដោយគ្មានសមត្ថកិច្ចណាបង្ក្រាបទាល់តែសោះ។
សកម្មភាពដឹកជញ្ជូនឈើតាមម៉ូតូកែច្នៃពីស្រុកវ៉ើនសៃ និងស្រុកអូរជុំ ចូលទៅក្រុងបានលុង ចាប់ផ្ដើមពីព្រលប់រហូតដល់ជិតភ្លឺ ព្រោះឈ្មួញឈ្មោះ លាង មានទំនាក់ទំនងជិតស្និទ្ធជាមួយមន្រ្តីជំនាញ និងសមត្ថកិច្ចពាក់ព័ន្ធ។
ប្រជាពលរដ្ឋបានអំពាវនាវឲ្យលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី និងលោក ញ៉ែម សំអឿន អភិបាលខេត្តរតនគិរី ចាត់វិធានការបង្រ្កាបឈ្មួញឈ្មោះ លាង ជាបន្ទាន់។
សេចក្ដីរាយការណ៍ពីប្រជាពលរដ្ឋ បានឲ្យដឹងថា ចាប់តាំងពីយប់ថ្ងៃទី២០ ខែកុម្ភៈ ឆ្នាំ២០២២ឈ្មួញឈ្មោះ លាង ជាកូនប្រសាឈ្មួញឈើឈ្មោះ តុង ហាន ដែលមានលំនៅដ្ឋានជាប់របងវត្ត និងទល់មុខវត្តអូរជុំ បានធ្វើសកម្មភាពដឹកជញ្ជូនឈើតាមម៉ូតូកែច្នៃ ចូលទៅក្រុងបានលុង យ៉ាងគំហុក។
នៅតាមផ្លូវពីស្រុកអូរជុំ ទៅក្រុងបានលុង និងពីស្រុកវ៉ើនសៃ ចូលក្រុងបានលុង មានស្នាក់ការរដ្ឋបាលព្រៃឈើ ស្នាក់ការបរិស្ថាន និងប៉ុស្តិ៍ត្រួតពិនិត្យរបស់សមត្ថកិច្ចជាច្រើនកន្លែង ប៉ុន្តែឈ្មួញឈ្មោះ លាង នៅតែអាចដឹកជញ្ជូនឈើទៅដល់គោលដៅយ៉ាងរលូន។
ប្រការនេះកំពុងធ្វើឲ្យព្រៃឈើដែលនៅសេសសល់ក្នុងស្រុកវ៉ើនសៃ និងស្រុកអូរជុំ ខេត្តរតនគិរី ចៀសមិនផុតពីសេចក្ដីវិនាសឡើយ ព្រោះឈ្មួញឈ្មោះ លាង នៅតែអាចដឹកជញ្ជូនឈើយ៉ាងគឃ្លើន។
ប្រភពស្និទ្ធនឹងឈ្មួញឈ្មោះ លាង បានឲ្យដឹងថា មន្រ្តីជំនាញ និងសមត្ថកិច្ចពាក់ព័ន្ធក្នុងស្រុកវ៉ើនសៃ និងស្រុកអូរជុំ ទទួលបានផលប្រយោជន៍ពីឈ្មួញម្នាក់នេះ ជាប្រចាំទើបមិនចាត់វិធានការបង្ក្រាប ហើយបណ្ដោយឲ្យឈ្មួញឈ្មោះ លាង ធ្វើអ្វីៗតាមអំពើចិត្ត។
ហេតុនេះលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី និងលោក ញ៉ែម សំអឿន អភិបាលខេត្តរតនគិរី មិនគួរបណ្ដោយឲ្យឈ្មួញឈ្មោះ លាង ដឹកជញ្ជូនឈើខុសច្បាប់តាមអំពើចិត្តទៀតឡើយ។
ដោយហេតុថាបច្ចុប្បន្នឈ្មួញឈ្មោះ លាង នៅតែជួលប្រជាពលរដ្ឋឲ្យដឹកឈើតាមម៉ូតូកែច្នៃពីស្រុកវ៉ើនសៃ និងស្រុកអូរជុំ ចូលមកក្រុងបានលុង យ៉ាងពេញបន្ទុកដោយគ្មានញញើតអ្វីទាំងអស់៕
