ខេត្តព្រះសីហនុ៖ សមត្ថកិច្ចចម្រុះ បានបង្ក្រាបករណីជួញដូរអាវុធ កាលពីថ្ងៃទី១៥ ខែមិថុនា ឆ្នាំ២០២២ នៅភូមិ៦ សង្កាត់៤ ក្រុងព្រះសីហនុ ខេត្តព្រះសីហនុ។ ប៉ុន្តែរហូតដល់ថ្ងៃទី១៩ ខែមិថុនា ឆ្នាំ២០២២ ទើបឈានទៅចាប់ខ្លួនជនសង្ស័យ នៅក្នុងផ្ទះ ស្ថិតក្នុងបូរីទួលសង្កែ ក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ខេត្ដកណ្ដាល។
ជនសង្ស័យ ឈ្មោះ យិន ថារ៉ា ភេទប្រុស អាយុ ៣៥ឆ្នាំ ជាជាងដែក មានទីលំនៅក្នុងបូរីទួល សង្កែ ភូមិអរិយក្សត្រ ឃុំអរិយក្សត្រ ស្រុកល្វាឯម ខេត្ដកណ្ដាល។
វត្ថុតាង ដែលសមត្ថកិច្ច ចាប់យក រួមមាន៖ អាវុធចំនួន ៣ដើម គឺ១.អាវុធខ្លីម៉ាកGlook19 លេខBPRV205
២.អាវុធខ្លីម៉ាកGlook លេខEVO403
៣.អាវុធវែងម៉ាក CZ SCORPION EVO3A1។
ក្នុងនោះ ក៏មានបំពង់ខ្ទប់សម្លេង ចំនួន១០។ គ្រាប់អាវុធខ្លី ប្រភេទ 9mm ចំនួន៤២៦គ្រាប់ និងបង់ចំនួន០៦ ខ្លីចំនួន០៤ វែងចំនួន០២ រួមទាំងសំភារ:ជួសជុលអាវុធមួយចំនួន។
ជនសង្ស័យ និងវត្ថុតាង ចាប់យកខាងលើ ត្រូវបានប្រគល់ជូនអធិការរដ្ឋាននគរបាលក្រុងព្រះសីហនុ ដើម្បីចាត់ការបន្តតាមនីតិវិធីច្បាប់៕សហការី
