(ខេត្តសៀមរាប) : សាច់សត្វសុនខ (ឆ្កែ) ក្លាស្សេ ដែលឈ្មួញដឹកចេញពីខេត្តបន្ទាយមានជ័យ ឆ្លងកាត់ខេត្តសៀមរាប បម្រុងលោតឆត្រយកទៅលក់នៅភ្នំពេញ ត្រូវបានសមត្ថកិច្ចចម្រុះ សហការជាមួយមន្ត្រីជំនាញនៃមន្ទីរកសិកម្មរុក្ខាប្រម៉ាញ់និងនេសាទខេត្តសៀមរាបបង្ក្រាបបាន ។ ហេតុការណ៍ការដុតកម្ទេចចោលនេះ ធ្វើឡើងកាលពីរសៀលថ្ងៃទី១៦ សីហា ក្រោមការដឹកនាំពីសំណាក់តំណាងអយ្យការអមសាលដំបូងខេត្ត, លោកប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប និងមន្ត្រីជំនាញមួយចំនួនទៀតផងដែរ ។
លោក ព្រំ វិច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្តសៀមរាបបានឱ្យដឹង នារសៀលថ្ងៃទី១៦ សីហា ថា មុនកើតហេតុ នៅវេលាម៉ោង ០១និង៣០នាទី រសៀលថ្ងៃទី១៦ ខែ សីហា ឆ្នាំ២០២២ មន្ត្រីជំនាញបានឃាត់រថយន្ត កូរ៉េ ដឹកទំនិញ ០១គ្រឿង ម៉ាក KIA ពណ៌ស ពាក់ស្លាកលេខ កំពត 2A.1924 មានបទល្មើសដឹកសត្វសុនខ (ឆ្កែ)ក្លាសេ(ពិឃាតរួច)ចំនួន៣ធុងធំ និង១ធុងតូច ចំនួន១៣៤ក្បាល ទម្ងន់ប្រមាណ១៣០០គីឡូក្រាម ប្រព្រឹត្តដោយឈ្មោះ ណាន ឆាត ភេទប្រុស អាយុ២៥ ឆ្នាំ រស់នៅភូមិប្រយុទ្ធ ឃុំទំនប់ ស្រុកបាធាយ ខេត្តកំពង់ចាម។ លោកបានបន្តថា តាមការឆ្លើយបំភ្លឺពីម្ចាស់សត្វសុនខ (ឆ្កែ) បានប្រាប់នៅមុខសមត្ថកិច្ចយើងថាសត្វសុនខ (ឆ្កែ) ទាំងនេះ ដែលបានដឹកចេញ ពីខេត្តបន្ទាយមានជ័យ ឆ្ពោះទៅរាជធានីភ្នំពេញ ។
លោកបញ្ជាក់ថា ដោយមានការចូលរួមណែនាំពីលោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទ និងលោក ង៉ិល សុវណ្ណារិទ្ធ ព្រះ រាជអាជ្ញារង នៃសាលាដំបូងខេត្តសៀមរាប នៅម៉ោង៣និង០០នាទីរសៀល ថ្ងៃដដែល ក្រុមការងារដោយមានការរៀបចំពីមន្ត្រីជំនាញ បានអនុវត្តដោយការដុតកម្ទេច និងកប់ចោលតាមវិធានការបសុពេទ្យ ។
ចំណែករថយន្តដឹកសត្វសុនខ មន្ត្រីជំនាញយកមករក្សាទុកនៅមន្ទីរកសិកម្ម រុក្ខាប្រមាញ់និងនេសាទ ខេត្តសៀមរាប ។ចំណែក ម្ចាស់ឱ្យត្រឡប់ទៅផ្ទះវិញ ដើម្បីរងចាំឱ្យចូលខ្លួនមកដោះស្រាយ តាមនីតិវិធីច្បាប់។ លោក ព្រំ វិច បានសំណូមពរចំនួន ៣ចំណុចថា ទី១-សូមឱ្យអាជីវករទាំង អស់រកមុខរបរថ្មី ថ្លៃថ្នូរស្របច្បាប់។ ទី២-លើកតម្លៃខេត្តសៀមរាប ជាខេត្តវប្បធម៌ផងដែរ និងទី៣-ចំពោះអ្នកនិយមពិសារសាច់សុនខ ក្នុងរយៈកាលកន្លងមក មេត្តាអធ្យាស្រ័យយល់យោគ ពីព្រោះវាអាចប៉ះពាល់សេចក្តីថ្លៃថ្នូររបស់អ្នកហូប និងអាចប៉ះពាល់ដល់សុខភាពផងដែរ ព្រោះសត្វសុនខ
(ឆ្កែ) ទាំងនោះវាមិនមែនមានសុខភាពល្អទាំងអស់នោះទេ។
គួររម្លឹកថា ថ្នាក់ដឹកនាំនៃក្រសួងកសិកម្មរុក្ខាប្រម៉ាញ់និងនេសាទ និង អាជ្ញាធរខេត្ត សៀមរាប បានយកចិត្តទុកដាក់ និងជំរុញឱ្យមានការឈប់ជួញដូរសាច់សុនខ(ឆ្កែ) ដើម្បីលើកមុខមាត់នៃខេត្តទេសចរណ៍ និងដើម្បីការពារសុខភាពពលរដ្ឋផងដែរ៕សហការី
