(ភ្នំពេញ) ៖ កម្ពុជា បានបញ្ជូនរថយន្ត ចំនួន១៤គ្រឿង ប្រភេទរថយន្តរថពាសដែក (MPV) និងសម្ភារប្រើប្រាស់ចំនួន ៥កុងទឺន័រ សម្រាប់បំពេញបន្ថែមលើរថយន្ត និងសម្ភារដែលមានស្រាប់ សម្រាប់កងអនុសេនាធំ កម្ទេចគ្រាប់មិន ទាន់ផ្ទុះ (EOD) ក្នុងបេសកកម្មអង្គការសហប្រជាជាតិ នៅសាធារណរដ្ឋម៉ាលី ។
លោក អ៊ុច បូររិទ្ធ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងការបរទេស ដំណាងដ៏ខ្ពង់ខ្ពស់ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងជាប្រធានគណៈកម្មាធិការជាតិ បញ្ជូនកងកម្លាំងរក្សាសន្តិភាព នាថ្ងៃទី៦ ខែមិថុនា ឆ្នាំ២០២៣ នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ នាស្រុកភ្នំស្រួច ខេត្តកំពង់ស្ពឺ បានអោយដឹងថា នៅថ្ងៃនេះ រថយន្ត និងសម្ភារដាក់ក្នុងទូរកុងទឺន័រ ដឹកបញ្ជូនទៅកាន់កំពង់ផែរអន្តរជាតិ ក្រុងព្រះសីហនុ ហើយនឹងបញ្ជូនបន្តតាមនាវា ទៅកាន់សាធារណរដ្ឋម៉ាលី នៅថ្ងៃទី៨ ខែមិថុនា ឆ្នាំ២០២៣ ខាងមុខនេះ ជាមួយគ្នារថយន្ត និងសម្ភារទាំងអស់ នឹងទៅដល់គោលដៅ នាពាក់កណ្តាលខែសីហា ឆ្នាំ២០២៣នេះ ផងដែរ។
លោក បានបញ្ជាក់ឲ្យដឹងថា ចំពោះរថយន្តរថពាសដែក និងសម្ភារទាំងអស់នេះ គឺសម្រាប់បំពេញបន្ថែម ទៅលើរថយន្ត និងសម្ភារ ដែលមានស្រាប់ កំពុងបម្រើការងារបេសកកម្ម ។
ជាមួយគ្នានោះ នាយឧត្តមសេនីយ៍ សែម សុវណ្ណនី អនុប្រធានទី១ គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានឱ្យដឹងដែរថា រថយន្តរថពាសដែក ទាំង១៤គ្រឿង គឺមានចំនួន ៤គ្រឿង បម្រើការងារជារថយន្តពេទ្យ ដែលបានបំពាក់សម្ភារបរិក្ខាវេជ្ជសាស្ត្រគ្រប់គ្រាន់ទាំងអស់ ចំណែករថយន្តរថពាសដែក ចំនួន១០គ្រឿងទៀត គឺសម្រាប់ដឹកកម្លាំងចុះប្រតិបត្តិការបេសកកម្ម ។ ការដែលបញ្ជូន រថយន្ត ប្រភេទរថពាសដែកនេះ ទៅកាន់តំបន់បេសកកម្មនៅសាធារណរដ្ឋម៉ាលី ដោយសារ នៅទីនោះ មានក្រុមឧទ្ទាម តែងពួនស្ទាក់ដាក់ បង្កៃគ្រាប់កែច្នៃ ឬគ្រាប់មីន នៅតាមដងផ្លូវ ធ្វើដំណើរ ។
នាយឧត្តមសេនីយ៍ សែម សុវណ្ណនី បានបញ្ជាក់ថា ចំពោះកងកម្លាំងមួកខៀវកម្ពុជា គឺបានកំពុងបន្តការងារ បេសកកម្មនៅសាធារណរដ្ឋម៉ាលី រួចស្រេចហើយ ។
សូមបញ្ជាក់ថា កងកម្លាំងកម្ពុជា មានចំនួនជាង៣០០នាក់ ចែកចេញជា ២កងអនុសេនាធំ គឺកងកម្ទេចគ្រាប់មិនទាន់ផ្ទុះ និងកងកម្លាំងវិស្វកម្ម ព្រលានយន្តហោះ ៕សហការី
