ប៉ូលិសវៀតណាម បានតាមចាប់ក្រុមមនុស្សរត់ពន្ធមាស ពីកម្ពុជា ទៅវៀតណាម តាមច្រកព្រំដែន ក្នុងខេត្តអានយ៉ាង(វៀតណាម) ដែលជាប់នឹងខេត្តកណ្តាលរបស់ប្រទេសកម្ពុជា នេះបើយោងតាមសារព័ត៌មានវៀតណាម VN Expres ចេញថ្ងៃទី២៧ ខែកក្កដា ឆ្នាំ២០២៣នេះ ។
មន្ត្រីប៉ូលិសខេត្តអានយ៉ាង (An Giang) បាននិយាយថា ពួកគេបានធ្វើការឆ្មក់បង្ក្រាប កាលពីយប់ថ្ងៃអង្គារ៍ ទី២៥ ខែកក្កដា ឆ្នាំ២០២៣ ដោយមានមនុស្សមួយក្រុម បានរត់ពន្ធមាសចូលមកស្រុកឡុងប៊ិញ (Long Binh) នៃខេត្តអានយ៉ាង ដោយខុសច្បាប់ពីប្រទេសកម្ពុជា ដោយធ្វើដំណើរតាមទូក ។
អ្នកជិះទូកទាំងនោះ បានរត់គេចខ្លួន បន្ទាប់ពីគេប្រទះឃើញកម្លាំងប៉ូលិស ដោយបន្សល់ទុកនូវកញ្ចប់ជាច្រើននៅលើទូក ក្នុងនោះប៉ូលិសវៀតណាម ឆែករកឃើញមាសចំនួន ១៩គីឡូក្រាម ។
នៅថ្ងៃបន្ទាប់ បុរស០២នាក់ ដែលមានអាយុ ៦០ឆ្នាំ និង ២២ឆ្នាំ បានចូលខ្លួន ហើយបានសារភាពថា ពួកគេបានរត់ពន្ធមាស ពីប្រទេសកម្ពុជា ចូលទៅកាន់ប្រទេសវៀតណាម ដើម្បីលក់នៅហាង ក្នុងស្រុកឡុងប៊ិញ នៃខេត្តអានយ៉ាង ។ ករណីនេះ ប៉ូលិសវៀតណាម បាននិងកំពុងពង្រីកការស៊ើបអង្កេតជាបន្ត ៕