(សៀមរាប) ៖ ថ្ងៃទី៤ ខែមីនា ឆ្នាំ២០២៤ នៅបន្ទប់ប្រជុំសាលាខេត្តបានរៀបចំកិច្ចប្រជុំត្រួតពិនិត្យវឌ្ឍនភាពការងាររៀបចំបុណ្យទន្លេលេីលទី៨ នៅខេត្តសៀមរាបក្រោមការដឹកនាំលោក លី វណ្ណៈ នាយករដ្ឋបាលសាលាខេត្ត ដោយមានការចូលរួមពីលោក នាយករងរដ្ឋបាល នាយកទីចាត់ការ អង្គភាព មន្ទីរពាក់ព័ន្ធ និងក្រុង ស្រុកទាំង៦ដែលជាប់នឹងបឹងទន្លេសាប។
លោក កុសល មករាពិសិទ្ធ នាយកទីចាត់ការទំនាក់ទំនង និងសហប្រតិបត្តិការអន្តរជាតិបានរាយការណ៍អំពីវឌ្ឍនភាពការងារដោយមកដល់ពេលនេះរដ្ឋបាលខេត្តបានសហការជាមួយក្រសួងសម្រេចបាននូវកិច្ចការមួយចំនួន។ ជាមួយគ្នានេះ លោក នាយកទីចាត់ការក៏បានរាយការណ៍បន្ថែមអំពីសេចក្តីព្រាងសកម្មភាពមួយចំនួនរៀបចំដោយរដ្ឋបាលខេត្ត ក្នុងកម្មវិធីបុណ្យទន្លេរយៈពេល៣ថ្ងៃ(ថ្ងៃទី១៥-១៦-១៧ ខែមីនាឆ្នាំ២០២៤)នេះរួមមាន :
១-ពិព័រណ៍រូបភាពសត្វស្លាប និងគូរគំនូរ
២-ពិព័រណ៍តុក្តាត្រី និងជីវិតរស់នៅលើទឹក/ទន្លេ
៣-ការប្រឡងប្រជែងអានអត្ថបទ និងស្មូតកំណាព្យក្រោមប្រធានបទ “ទន្លេដើម្បីសន្តិភាព និងការអភិវឌ្ឍ”
៤-ពិព័រណ៍តុក្តា និងរូបភាពសហគមន៍ជាប់ទន្លេសាប
៥-អប់រំ-សំអាតបរិស្ថានទន្លេ
៦-ប្រលែងកូនត្រី
៧-ពិព័រណ៌ម្ហូបអាហារខ្មែរ
៨-ស្តង់ពិព័រណ៍ពាណិជ្ជកម្ម
៩-ការប្រគុំតន្ត្រី
១០ការប្រកួតវាយកូនហ្គោល
ក្រោមពីស្តាប់របាយការណ៍វឌ្ឍនភាព និងការចូលរួមមតិយោបល់រួចមក លោក លី វណ្ណៈ បានណែនាំដល់ក្រុមការងារ ពិសេសក្រុង ស្រុក ត្រូវរៀបចំតុបតែងចងទង់ជាតិតាមមុខផ្ទះ សម្អាតបរិស្ថាន សណ្តាប់ធ្នាប់ និងជួយសម្រួលចរាចរណ៍ដល់ប្រតិភូ ព្រមទាំងភ្ញៀវទេសចរចូលមកកំសាន្តនៅពេលពិធីបុណ្យទន្លេ ហេីយរដ្ឋបាលក្រុងត្រូវសហការជាមួយស្នងការដ្ឋាននគរបាលខេត្តរៀបចំសណ្តាប់ធ្នាប់ និងពិនិត្យទីតាំងចំណតទាំងកន្លែងប្រារព្ធពិធី និងភ្ញៀវទេសចរមកកំសាន្ត ពិសេសការចត និងសណ្តាប់ធ្នាប់នៅតំបន់ផាប់ស្ទ្រីត។ ទន្ទឹមនឹងនេះ លោក នាយករដ្ឋបាលក៏បានជំរុញដល់ក្រុមការងារទាំងអស់ត្រូវផ្អាកកម្មវិធីមួយចំនួននៅពេលដែលប្រារព្ធពិធីបេីកជាផ្លូវការ។
លោក នាយករដ្ឋបាលក៏បានណែនាំដល់អាជ្ញាធរក្រុង ស្រុកឱ្យអំពាវនាវដល់បងប្អូនប្រជាពលរដ្ឋចូលរួមសហការជាមួយអាជ្ញាធរដោយសម្អាតបរិស្ថានព្រមទាំងធ្វេីតុបតែងដោយចងនូវទង់ជាតិលម្អគេហដ្ឋានរៀងខ្លួនៗដែលនៅតាមដងផ្លូវ៕