(សៀមរាប) ៖ នៅថ្ងៃទី៩ ខែមេសា ឆ្នាំ២០២៤ លោក អ៉ឹង សុភ័ណ នាយករងរដ្ឋបាលសាលាខេត្ត បានទទួលកៅអីថ្ម(បង់អង្គុយនៅទីសាធារណៈ) ចំនួន ២០កៅអី ពីក្រុមហ៊ុនអាតូមី (ខេមបូឌា) ខូលិធីឌី ដើម្បីយកទៅដាក់នៅសួនច្បារសាធារណៈ ឬនៅចំណតរថយន្តក្រុងដែលទើបបង្កើតថ្មី។
ក្នុងនាមរដ្ឋបាលខេត្ត លោកបានថ្លៃងអំណរអរគុណដល់ក្រុមហ៊ុនអាតូមី (ខេមបូឌា) ខូលិធីឌី ដែលជាទូទៅក្រុមហ៊ុននេះបានផ្តល់នូវឱកាសការងារ ជាច្រើនដល់យុវជនយុវនារីកម្ពុជាតាមរយៈការលក់នូវផលិតផលគ្រឿងសម្អាង និងអាហារបំប៉នសុខភាពដែលផលិតនិង នាំចូលពីប្រទេសកូរ៉េ។ ក្រៅពីការវិនិយោគក្នុងវិស័យឯកជន ក្រុមហ៊ុនក៏បានដាក់ចេញនូវផែនការការងារ គឺត្រូវចូលរួម អភិវឌ្ឍន៍សង្គមជាតិកម្ពុជាតាមរយៈសកម្មភាពផ្សេងៗ ដែលក្រុមហ៊ុនអាចធ្វើបាន ជាក់ស្តែងក្នុងឆ្នាំ២០២៣មកនេះ ក្រុមហ៊ុនអាតូមីបានទទួលការគាំទ្រ និងសហការល្អពីរដ្ឋបាលក្រុងសៀមរាប ធ្វើការសំអាតបរិស្ថានក្នុងក្រុងសៀមរាប។
