ភ្នំពេញ ៖ រថយន្តម៉ាកព្រុស ពណ៌ទឹកប្រាក់ ឆ្នាំ២០០៧ ពាក់ស្លាកលេខ ភ្នំពេញ 2BF-5946 មួយគ្រឿង ត្រូវបានជនសង្ស័យលួចយកពីខណ្ឌពោធិ៍សែនជ័យ បានមួយថ្ងៃ ក៏ត្រូវបានកម្លាំងសមត្ថកិច្ចខណ្ឌដង្កោ ស្រាវជ្រាវរហូតរកឃើញ និងឃាត់ខ្លួនជនសង្ស័យចំនួន៣នាក់ជាប់ពាក់ព័ន្ធទិញរថយន្តពីជនសង្ស័យដែលលួចថែមទៀតផង បង្កឱ្យមានការភ្ញាក់ផ្អើលនៅវេលាម៉ោង៥និង៣០នាទីល្ងាច ថ្ងៃទី១៦ ខែមិថុនា ឆ្នាំ២០២២ នៅចំណុចបុរីពិភពថ្មីចំការដូង ស្ថិតក្នុងសង្កាត់ដង្កោ ខណ្ឌដង្កោ ។
ហើយសមត្ថកិច្ចក៏បានធ្វើការដកហូតរថយន្តតូយ៉ូតាព្រុស ពណ៌ប្រផេះ ពាក់ស្លាកលេខ ភ្នំពេញ 2BF 5946 ជារបស់ជនរងគ្រោះ និងធ្វើការឃាត់ខ្លួនមនុស្សប្រុសចំនួន៣នាក់ (មិនបានអោយស្គាល់អត្តសញ្ញាណ) ជាប់ពាក់ព័ន្ធនឹងទិញរថយន្តពីជនសង្ស័យ។
យោងតាមប្រភពព័ត៌មានពីសមត្ថកិច្ច បានអោយដឹងថា ដំបូងឡើយ នៅម៉ោង៤និង៤០នាទីរសៀល ថ្ងៃទី១៥ ខែមិថុនា ឆ្នាំ២០២២ ជនរងគ្រោះជាម្ចាស់រថយន្ដខាងលើ និងជនសង្ស័យត្រូវជាមិត្តភ័ក្ដនឹងគ្នា ។ លុះនៅថ្ងៃកើតហេតុ ជនសង្ស័យបានជិះម៉ូតូកង់បីទៅលេងផ្ទះរបស់ជនរងគ្រោះ ស្ថិតនៅភូមិគោកព្រេច សង្កាត់សំរោងក្រោម ខណ្ឌពោធិ៍សែនជ័យ ។
សមត្ថកិច្ចបន្តថា នៅពេលជួបជនរងគ្រោះ ជនសង្ស័យបាននិយាយប្រាប់ថា «ទៅយកឯកសារឱ្យម្តាយនៅម្ដុំឈូកវ៉ា២» ភ្លាមៗនោះជនរងគ្រោះរវល់តែចូលបន្ទប់ទឹក ដោយទុកសោរថយន្ដ និងកាបូបលុយដែលមានកាតគ្រីរថយន្តនៅលើតុ ស្រាប់តែជនសង្ស័យឆ្លៀតឱកាសលួចយកកូនសោ និងកាតគ្រី ហើយចាក់សោរផ្ទះពីក្រៅ មិនអោយជនរងគ្រោះចេញមកក្រៅរួចនោះទេ និងបានបើករថយន្តរត់គេចខ្លួនបាត់តែម្តង ។
បន្ទាប់ពីដឹងថា ជនសង្ស័យលួចរថយន្តយកទៅបាត់ហើយ ជនរងគ្រោះរត់ទៅប្តឹងសមត្ថកិច្ចខណ្ឌពោធិ៍សែនជ័យ និងសមត្ថកិច្ចនៃព្រហ្មទណ្ឌ ក្រុង ដើម្បីអោយជួយធ្វើការស្រាវជ្រាវរកជនសង្ស័យផង ។
ប្រភពដដែលបានបន្តទៀតថា បន្ទាប់ពីទទួលបានពាក្យបណ្ដឹងរបស់ជនរងគ្រោះហើយ ដំណឹងនេះក៏ត្រូវបានផ្សព្វផ្សាយជូនដល់សមត្ថកិច្ចទាំង១៤ខណ្ឌអោយជួយពិនិត្យ និង ស្រាវជ្រាវរករថយន្តដែលត្រូវបានជនសង្ស័យលួចយកទៅ ។ លុះមកដល់ល្ងាចថ្ងៃទី១៦ ខែមិថុនា ឆ្នាំ២០២២ កម្លាំងសមត្ថកិច្ចខណ្ឌដង្កោ បានប្រទះឃើញរថយន្តដែលកំពុងតែបើកនៅក្នុងបុរីពិភពថ្មីចំការដូង ទើបកម្លាំងសមត្ថកិច្ចខណ្ឌដង្កោ ដឹកនាំដោយលោកវរៈសេនីយ៍ទោ ជាង ហុកសែរ អធិការរងទទួលផែនព្រហ្មទណ្ឌ បានធ្វើការដេញឃាត់រថយន្ដ និងមនុស្ស៣នាក់ដែលជិះក្នុងរថយន្តនោះ ហើយក៏បាននាំមនុស្សទាំង៣នាក់ រួមទាំងរថយន្ត យកទៅធ្វើការសាកសួរនៅផ្នែកជំនាញនៃអធិការនគរបាលខណ្ឌដង្កោតែម្តង ។
ប្រភពដដែលបន្តទៀតថា ចំពោះការសាកសួរមនុស្សទាំង៣នាក់បានឆ្លើយថា «រថយន្ដនេះ គឺពួកគេបានទិញពីជនសង្ស័យក្នុងតំលៃចំនួន៩៨០០ដុល្លារ ដោយតែរថយន្តនេះ មានឯកសារគ្រប់គ្រាន់ »។
បន្ទាប់ពីធ្វើការសួរនាំរួច ជនសង្ស័យដែលពាក់ព័ន្ធទាំង៣នាក់ រួមទាំងរថយន្ត ត្រូវបានសមត្ថកិច្ចខណ្ឌដង្កោ ប្រគល់អោយទៅខាងសមត្ថកិច្ចនៃអធិការដ្ឋាននគរបាលខណ្ឌពោធិ៍សែនជ័យ ដែលជាម្ចាស់ករណី ដើម្បីធ្វើការសាកសួរជាបន្ត និងចាត់ការតាមនីតិវិធីច្បាប់ ៕សហការី
